ନୂଆଦିଲ୍ଲୀ: ସୁପ୍ରିମକୋର୍ଟଙ୍କ ବଡ଼ ରାୟ । ଏଣିକି ବେପାରୁଆ ଢଙ୍ଗରେ ଗାଡ଼ି ଚଳାଇ ଦୁର୍ଘଟଣା ଘଟିଲେ କିମ୍ବା ଅସାବଧନତାରେ ଗାଡ଼ି ଚଳାଇବା ବେଳେ ନିଜ ଭୂଲ ଯୋଗୁଁ ମୃତ୍ୟୁ ଘଟିଲେ ମିଳିବନି କୌଣସି ବୀମାରାଶି । ଏନେଇ ସୁପ୍ରିମକୋର୍ଟ ବଡ଼ ନିଷ୍ପତି ଶୁଣାଇଛନ୍ତି । ସୁପ୍ରିମକୋର୍ଟ ଏକ ନିଷ୍ପତ୍ତିରେ କହିଛନ୍ତି ଯେ ଯଦି ଡ୍ରାଇଭରଙ୍କ ଅବହେଳା, ଷ୍ଟଣ୍ଟ କରିବା, ଦ୍ରୁତ ଗତିରେ ଗାଡ଼ି ଚଲାଇବା ଯୋଗୁଁ ଦୁର୍ଘଟଣା ଘଟେ, ତେବେ ଏଥିପାଇଁ ବୀମା କମ୍ପାନୀ ବୀମା ଦେବାକୁ ବାଧ୍ୟ ନୁହେଁ । ସୁପ୍ରିମକୋର୍ଟଙ୍କ ଏହି ନିଷ୍ପତ୍ତି ପ୍ରତିଦିନ ରାସ୍ତାରେ ଷ୍ଟଣ୍ଟ କରୁଥିବା ଲୋକଙ୍କ ପାଇଁ ଏକ ଚେତାବନୀ। 

ଏକ ମାମଲାରେ ରାୟ ଦେବା ପରେ, ଜଷ୍ଟିସ୍ ପି.ଏସ୍. ନରସିଂହ ଏବଂ ଆର. ମହାଦେବନଙ୍କ ଖଣ୍ଡପୀଠ ଦ୍ରୁତଗତିରେ ଏବଂ ଅସାବଧାନତାରେ ଗାଡ଼ି ଚଲାଉଥିବା ଜଣେ ବ୍ୟକ୍ତିଙ୍କ ମାମଲାରେ କୋର୍ଟର ଏହି ନିଷ୍ପତ୍ତି ଦିଆଯାଇଛି। ଏହା ପ୍ରାୟ ୧୮ ଜୁନ୍ ୨୦୧୪ର କଥା, ଯେତେବେଳେ ଏନ.ଏସ ରବିଶଙ୍କର ତାଙ୍କ ଫିଆଟ୍ ଲାଇନିଆ କାରରେ କର୍ଣ୍ଣାଟକର ଆର୍ସିକେର ସହରକୁ ଯାଉଥିଲେ। ତାଙ୍କ ସହିତ ପରିବାର ଲୋକ ଥିଲେ। କାରର ଗତି ବହୁତ ଅଧିକ ଥିଲା। ଦ୍ରୁତ ଗତି ଯୋଗୁଁ ରବିଶଙ୍କର କାରକୁ ନିୟନ୍ତ୍ରଣ କରିପାରି ନଥିଲେ, ଯାହା ଫଳରେ କାରଟି ରାସ୍ତାରେ ଓଲଟି ପଡ଼ିଥିଲା। ଏହି ଭୟଙ୍କର ଦୁର୍ଘଟଣାରେ ରବିଶଙ୍କର ମୃତ୍ୟୁ ହୋଇଥିଲା। 

ଘଟଣା ପରେ, ପରିବାର ୟୁନାଇଟେଡ୍ ଇଣ୍ଡିଆ ଇନସୁରାନ୍ସ କମ୍ପାନୀଠାରୁ ୮୦ ଲକ୍ଷ ଟଙ୍କାର କ୍ଷତିପୂରଣ ଦାବି କରିଥିଲେ। ପରିବାର କହିଥିଲେ ଯେ ରବିଶ ପ୍ରତି ମାସରେ ୩ ଲକ୍ଷ ଟଙ୍କା ରୋଜଗାର କରୁଥିଲେ। ତଥାପି, ପୋଲିସ ଚାର୍ଜସିଟରେ ସ୍ପଷ୍ଟ ଭାବରେ ଉଲ୍ଲେଖ କରାଯାଇଛି ଯେ ଦୁର୍ଘଟଣା ଅସାବଧାନତା ଏବଂ ଦ୍ରୁତ ଗତି ଯୋଗୁଁ ଘଟିଥିଲା। ଏହି କାରଣରୁ ମୋଟର ଦୁର୍ଘଟଣା ଟ୍ରିବ୍ୟୁନାଲ୍ ପରିବାରର କଥା ଶୁଣି ନଥିଲେ। ଏହା ପରେ ପରିବାର କର୍ଣ୍ଣାଟକ ହାଇକୋର୍ଟର ଦ୍ୱାରସ୍ଥ ହୋଇଥିଲେ। କିନ୍ତୁ ହାଇକୋର୍ଟ ମଧ୍ୟ ପରିବାରର ଆବେଦନକୁ ଖାରଜ କରିଦେଇଥିଲେ। ଏହା ପରେ, ସୁପ୍ରିମକୋର୍ଟ ଏବେ ହାଇକୋର୍ଟର ନିଷ୍ପତ୍ତିକୁ ବଜାୟ ରଖିଛନ୍ତି।