ନୂଆଦିଲ୍ଲୀ:ମହାକୁମ୍ଭରେ ଚର୍ଚ୍ଚାରେ ରହିଥିବା ହରିୟାଣାର IITian ବାବା ଅଭୟ ସିଂହ ଦୀର୍ଘ ସମୟ ପରେ ନିଜ ପୈତୃକ ସ୍ଥାନ ଝଜ୍ଜରରେ ପହଞ୍ଚିଛନ୍ତି। କିନ୍ତୁ ଏହି ସମୟରେ ସେ ଏକା ଆସିନାହାନ୍ତି, ତାଙ୍କ ସହ ତାଙ୍କ ପତ୍ନୀ ମଧ୍ୟ ଉପସ୍ଥିତ ଥିଲେ। ଆପଣ ଠିକ ପଢିଛନ୍ତି,IITian ବାବା ଅଭୟ ସିଂହ ବିବାହ କରିଛନ୍ତି। ସେ ଦୁଇ ମାସ ପୂର୍ବରୁ ବିବାହ କରିସାରିଥିଲେ, କିନ୍ତୁ ଏହି କଥାକୁ ସମସ୍ତଙ୍କଠାରୁ ଲୁଚାଇ ରଖାଯାଇଥିଲା। ତାଙ୍କ ବିବାହ ଖବର ସାମ୍ନାକୁ ଆସିବା ପରେ ଲୋକେ ଏବେ ସୋସିଆଲ ମିଡିଆରେ ତାଙ୍କ ପତ୍ନୀଙ୍କ ବିଷୟରେ ସର୍ଚ୍ଚ କରୁଛନ୍ତି। ଅଭୟ ସିଂହଙ୍କ ପତ୍ନୀ କିଏ ଏବଂ ସେ କ’ଣ କରନ୍ତି, ଚାଲନ୍ତୁ ଜାଣିବା।

IITian ବାବାଙ୍କ ପତ୍ନୀ ଜଣେ ଇଞ୍ଜିନିୟର

IITian ବାବା କର୍ଣ୍ଣାଟକର ରାଜଧାନୀ ବେଙ୍ଗାଲୁରୁର ବାସିନ୍ଦା ପ୍ରତୀକାଙ୍କୁ ବିବାହ କରିଛନ୍ତି। ଦୁହେଁ ଫେବୃଆରୀ ମାସରେ ମନ୍ଦିରରେ ସାତଫେରା ନେଇ ପରସ୍ପରକୁ ଆପଣେଇ ନେଇଥିଲେ। ପ୍ରତୀକା ଇଞ୍ଜିନିୟରିଂ ପାଠ ପଢ଼ିଛନ୍ତି। ପ୍ରତୀକା ଏବଂ ଅଭୟ ସିଂହ ପରସ୍ପରକୁ ଏକ ବର୍ଷ ହେବ ଜାଣିଛନ୍ତି। ଦୁହେଁ ପ୍ରଥମେ ବନ୍ଧୁ ଥିଲେ ଏବଂ ପରେ ଦୁହିଁଙ୍କ ମଧ୍ୟରେ ପ୍ରେମ ହୋଇଥିଲା। ଏହାପରେ ଦୁହେଁ ବିବାହ କରିବାକୁ ନିଷ୍ପତ୍ତି ନେଇଥିଲେ। ବିବାହ ପରେ ସେମାନେ ବହୁତ ଖୁସି ଅଛନ୍ତି ବୋଲି କହିଛନ୍ତି।

ଦୁହେଁ କାହିଁକି ଝଜ୍ଜର ଆସିଲେ?

ବାବା ଅଭୟ ସିଂହ ବ୍ୟାଙ୍କ ଆକାଉଣ୍ଟର KYC ଅପଡେଟ୍ କରିବା ପାଇଁ ପତ୍ନୀ ପ୍ରତୀକାଙ୍କ ସହ ଝଜ୍ଜରରେ ପହଞ୍ଚିଥିଲେ। ତହସିଲ ପରିସରରେ ନିଜ ଓକିଲ ପିତାଙ୍କ ଚ୍ୟାମ୍ବରରେ ସେ କିଛି ସମୟ ପାଇଁ ଗଣମାଧ୍ୟମ ସହ ଆଲୋଚନା କରିଥିଲେ। ସେଠାରେ IITian ବାବାଙ୍କ ସହ ସେଲଫି ନେବା ପାଇଁ ଲୋକଙ୍କ ପ୍ରବଳ ଭିଡ଼ ଜମିଥିଲା। ଅଭୟ ସିଂହ କହିଛନ୍ତି ଯେ ସେ ଏବଂ ତାଙ୍କ ପତ୍ନୀ ପ୍ରତୀକା ଗୋଟିଏ ଭିଜନ ଉପରେ କାମ କରୁଛନ୍ତି। ପିତାମାତାଙ୍କୁ ଭେଟିବା ପ୍ରଶ୍ନରେ ସେ କହିଛନ୍ତି ଯେ, ସେମାନଙ୍କୁ ନିଶ୍ଚୟ ଭେଟିବି, କିନ୍ତୁ ବଡ଼ ପରିବାର ପାଇଁ ଛୋଟ ପରିବାରକୁ ଛାଡ଼ିବାକୁ ପଡ଼ିଥାଏ।

ୟୁନିଭର୍ସିଟି ଗଠନ ଉପରେ ଦୁହେଁ କାମ କରୁଛନ୍ତି

ଅଭୟ ସିଂହ ଜଣାଇଛନ୍ତି ଯେ ସେ ନିଜ ପତ୍ନୀଙ୍କ ସହ ମିଶି ‘ଶ୍ରୀ ୟୁନିଭର୍ସିଟି’ ଗଠନ ଉପରେ କାମ କରୁଛନ୍ତି। ଏହି ବିଶ୍ୱବିଦ୍ୟାଳୟରେ ଶିକ୍ଷା ଏବଂ ସାଧନା ସମ୍ପର୍କିତ ଜ୍ଞାନ ଉପରେ କାମ କରାଯିବ। ଏଥିରେ ବିଭିନ୍ନ ପ୍ରକାରର ସାଧନା ବିଷୟରେ ଜାଣିବା ଏବଂ ଶିଖାଇବା ଉପରେ ଗୁରୁତ୍ୱ ଦିଆଯାଇଛି। ସେ ବର୍ତ୍ତମାନ ହିମାଚଳ ପ୍ରଦେଶରେ ରହୁଛନ୍ତି ବୋଲି ସୂଚନା ଦେଇଛନ୍ତି।