ନୂଆଦିଲ୍ଲୀ: ବ୍ରିକ୍ସ ମଞ୍ଚରୁ ପାକିସ୍ତାନକୁ ବଡ଼ ବାର୍ତ୍ତା ଦିଆଯାଇଛି । ବ୍ରିକ୍ସ ସୀମାପାର ଆତଙ୍କବାଦୀକୁ କଡ଼ା ନିନ୍ଦା କରିଛି । ଖାଲି ସେତିକି ନୁହେଁ ପହଲଗାମ ଆକ୍ରମଣକୁ କଡ଼ା ନିନ୍ଦା କରାଯିବା ସହିତ ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ପାଇଁ ଆହ୍ୱାନ ଦେଇଛନ୍ତି ବ୍ରିକ୍ସ ସଦସ୍ୟ ରାଷ୍ଟ୍ର ଏବଂ ଏହି ବିପଦର ମୁକାବିଲାରେ ଦ୍ୱୈତ ଦୋମୁହାଁ ନୀତିକୁ ପ୍ରତ୍ୟାଖ୍ୟାନ କରାଯାଇଛି । 

ପହଲଗାମ ଆକ୍ରମଣର କଡ଼ା ନିନ୍ଦା କରିବା ସ୍ପଷ୍ଟ ଭାବରେ ବୁଝାଏ ଯେ ବ୍ରିକ୍ସ ଦେଶମାନେ ପାକିସ୍ତାନର ନାମ ନ ନେଇ ପାକିସ୍ତାନକୁ ଏକ କଡ଼ା ବାର୍ତ୍ତା ଦେଇଛନ୍ତି । ସେମାନେ ସ୍ପଷ୍ଟ କରିଛନ୍ତି ଯେ ଆତଙ୍କବାଦକୁ ପ୍ରଶ୍ରୟ ଦେଉଥିବା ଦେଶଗୁଡ଼ିକ ସହିତ ଦୃଢ଼ ମୁକାବିଲା କରାଯିବା ଉଚିତ। ସମସ୍ତ ପ୍ରକାରର ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ଏବଂ ଏହି ବିପଦର ମୁକାବିଲା କରିବାରେ ଦୋମୁହାଁ ନୀତି ପରିତ୍ୟାଗ କରିବା ପାଇଁ ଭାରତର ଆହ୍ୱାନକୁ ବ୍ରିକ୍ସ ଦେଶମାନେ ପୂର୍ଣ୍ଣ ସମର୍ଥନ କରିଛନ୍ତି । ବ୍ରିକ୍ସ ସମ୍ମିଳନୀରେ ଏହି ଘୋଷଣାନାମା ସର୍ବସମ୍ମତିକ୍ରମେ ଗୃହୀତ ହୋଇଥିଲା। 

ଘୋଷଣା ପତ୍ର କୁହାଯାଇଛି ଯେ , "ଆମେ ସମସ୍ତ ପ୍ରକାରର ଆତଙ୍କବାଦର ମୁକାବିଲା ପାଇଁ ଆମର ପ୍ରତିବଦ୍ଧତାକୁ ପୁନର୍ବାର ଦୋହରାଉଛୁ, ଯେଉଁଥିରେ ଆତଙ୍କବାଦୀଙ୍କ ସୀମାପାର ଗତିବିଧି, ଆତଙ୍କବାଦୀ ପାଣ୍ଠି ଏବଂ ନିରାପଦ ଆଶ୍ରୟସ୍ଥଳ ଅନ୍ତର୍ଭୁକ୍ତ।" ଘୋଷଣାପତ୍ରରେ ଆହୁରି କୁହାଯାଇଛି, "ଆମେ ପୁନରାବୃତ୍ତି କରୁଛୁ ଯେ ଆତଙ୍କବାଦକୁ କୌଣସି ଧର୍ମ, ଜାତୀୟତା, ସଭ୍ୟତା କିମ୍ବା ଜାତିଗତ ଗୋଷ୍ଠୀ ସହିତ ଜଡିତ କରାଯିବା ଉଚିତ୍ ନୁହେଁ ଏବଂ ଆତଙ୍କବାଦୀ କାର୍ଯ୍ୟରେ ସମ୍ପୃକ୍ତ ଏବଂ ସମର୍ଥନ କରୁଥିବା ସମସ୍ତଙ୍କୁ ଦାୟୀ କରାଯିବା ଉଚିତ ଏବଂ ପ୍ରାସଙ୍ଗିକ ଜାତୀୟ ଏବଂ ଅନ୍ତର୍ଜାତୀୟ ଆଇନ ଅନୁଯାୟୀ ନ୍ୟାୟ ପ୍ରଦାନ କରାଯିବା ଉଚିତ।" ବ୍ରିକ୍ସ ଜୋର ଦେଇଛି ଯେ ଆତଙ୍କବାଦ ବିରୋଧରେ ଲଢ଼ିବା ହେଉଛି ଦେଶଗୁଡ଼ିକର ପ୍ରାଥମିକ ଦାୟିତ୍ୱ ଏବଂ ଆତଙ୍କବାଦୀ ବିପଦକୁ ରୋକିବା ଏବଂ ମୁକାବିଲା କରିବା ପାଇଁ ବିଶ୍ୱବ୍ୟାପୀ ପ୍ରୟାସ ଜାତିସଂଘ ଚାର୍ଟର ସମେତ ଅନ୍ତର୍ଜାତୀୟ ଆଇନ ଅନୁଯାୟୀ ସେମାନଙ୍କର ଦାୟିତ୍ୱକୁ ସମ୍ପୂର୍ଣ୍ଣ ପାଳନ କରିବା ଉଚିତ।

ଘୋଷଣାପତ୍ରରେ ଏହା ମଧ୍ୟ କୁହାଯାଇଛି, "ଆମେ ଯେକୌଣସି ଆତଙ୍କବାଦ କାର୍ଯ୍ୟକୁ ଦୃଢ଼ ନିନ୍ଦା କରୁ, ଅପରାଧୀ ବୋଲି ଘୋଷଣା କରୁଛୁ ଏବଂ ନିନ୍ଦା କରୁ, ତା'ର ପ୍ରେରଣା ଯାହା ହେଉ ନା କାହିଁକି, ଯେତେବେଳେ, ଯେଉଁଠାରେ ଏବଂ ଯିଏ କରିଛି।" ଏଥିରେ ଆହୁରି ମଧ୍ୟ କୁହାଯାଇଛି, "ଆମେ ୨୨ ଏପ୍ରିଲ୍, ୨୦୨୫ରେ ଜମ୍ମୁ ଏବଂ କାଶ୍ମୀରରେ ହୋଇଥିବା ଆତଙ୍କବାଦୀ ଆକ୍ରମଣକୁ ଦୃଢ଼ ନିନ୍ଦା କରୁ, ଯାହା ଫଳରେ ୨୬ ଜଣଙ୍କର ମୃତ୍ୟୁ ହୋଇଥିଲା ଏବଂ ଅନେକ ଆହତ ହୋଇଥିଲେ।"