ଲକ୍ଷ୍ନୌ: ଦିଲ୍ଲୀରେ ଚାଲିଥିବା ବ୍ରିକ୍ସ ଶିଖର ସମ୍ମିଳନୀକୁ ନେଇ ପ୍ରତିକ୍ରିୟା ରଖିଛନ୍ତି ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ। ସେ କହିଛନ୍ତି ଯେ ଏହି ବିଶ୍ୱସ୍ତରୀୟ ସମ୍ମିଳନୀ ଆଜିର 'ନୂତନ ଭାରତ'ର ପ୍ରକୃତ ପ୍ରତିଛବି ଏବଂ ଦେଶର ବଢ଼ୁଥିବା ବିଶ୍ୱ ଶକ୍ତିକୁ ସ୍ପଷ୍ଟ ଭାବରେ ଦର୍ଶାଉଛି।

ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ଗତ କିଛି ବର୍ଷ ଭିତରେ ଭାରତ ବିଶ୍ୱ ଦରବାରରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଛି। ଆଜିର ଭାରତ ଆଉ କାହା ପଛରେ ଚାଲୁଥିବା ଦେଶ ନୁହେଁ, ବରଂ ବିଶ୍ୱର ଜଣେ ଶକ୍ତିଶାଳୀ ଅଗ୍ରଣୀ ରାଷ୍ଟ୍ର ଭାବେ ପ୍ରତିଷ୍ଠିତ ହୋଇଛି। ପ୍ରଧାନମନ୍ତ୍ରୀଙ୍କ ସଫଳ ନେତୃତ୍ୱ ଯୋଗୁଁ ଭାରତ ଆଜି ବିଶ୍ୱର ଶ୍ରେଷ୍ଠ ୫ଟି ଅର୍ଥନୀତିରେ  ସ୍ଥାନ ପାଇପାରିଛି ଏବଂ ସଫଳ ଜି-୨୦ ଆୟୋଜନ ମାଧ୍ୟମରେ ଦେଶ ନିଜର ଦକ୍ଷତା ପ୍ରମାଣିତ କରିଛି।

ପିଏମ୍ ମୋଦିଙ୍କ ୨୫ ବର୍ଷର ଜନସେବା 

ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଗୁଜରାଟର ମୁଖ୍ୟମନ୍ତ୍ରୀରୁ ଆରମ୍ଭ କରି ପ୍ରଧାନମନ୍ତ୍ରୀ ପର୍ଯ୍ୟନ୍ତ ୨୫ ବର୍ଷର ସଫଳ ସାର୍ବଜନୀନ ଜୀବନ ସମ୍ପର୍କରେ ଆଲୋଚନା କରି ସିଏମ୍ ଯୋଗୀ କହିଛନ୍ତି ଯେ ତାଙ୍କର ନିଷ୍ଠାପର ନୀତି ଓ ଯୋଜନାଗୁଡ଼ିକର ସଫଳ ରୂପାୟନ ସମଗ୍ର ବିଶ୍ୱ ଦେଖିଛି। ଏହି ପରିପ୍ରେକ୍ଷୀରେ ଆସନ୍ତା ସେପ୍ଟେମ୍ବର ୧୭ରୁ ଅକ୍ଟୋବର ୧୭ ପର୍ଯ୍ୟନ୍ତ ପୂରା ଏକ ମାସ ଧରି 'ସେବା ଦିବସ' ରୂପେ ବିଭିନ୍ନ କାର୍ଯ୍ୟକ୍ରମ ଅନୁଷ୍ଠିତ ହେବ। ଏହି କାର୍ଯ୍ୟକ୍ରମ ଜରିଆରେ ସରକାରୀ ଯୋଜନା ଓ ପ୍ରଧାନମନ୍ତ୍ରୀଙ୍କ ଜନକଲ୍ୟାଣକାରୀ କାର୍ଯ୍ୟଗୁଡ଼ିକୁ ଘରଘର ପର୍ଯ୍ୟନ୍ତ ପହଞ୍ଚାଯିବ।

କରୋନା ମହାମାରୀ ସମୟର ସ୍ମୃତିଚାରଣ କରି ସିଏମ୍ ଯୋଗୀ କହିଛନ୍ତି ଯେ ପୂର୍ବକାଳରେ ଯେଉଁ ଭ୍ଯାକ୍ସିନ୍ ଦେଶକୁ ଆସିବା ପାଇଁ ଶହେ ବର୍ଷ ଲାଗୁଥିଲା, ସେହି ଟିକା କରୋନା ସମୟରେ ମାତ୍ର କିଛି ମାସ ଭିତରେ ଦେଶବାସୀଙ୍କ ପାଇଁ ଉପଲବ୍ଧ କରାଯାଇଥିଲା। କେନ୍ଦ୍ର ସରକାରଙ୍କ ଦ୍ୱାରା ଦେଶର ୮୦ କୋଟିରୁ ଅଧିକ ଲୋକଙ୍କୁ ମାଗଣା ରାସନ୍, ୧୨ କୋଟିରୁ ଅଧିକ ଶୌଚାଳୟ ଏବଂ ୩ କୋଟିରୁ ଅଧିକ ପରିବାରକୁ ବିଦ୍ୟୁତ୍ ସଂଯୋଗ ପ୍ରଦାନ କରାଯାଇଥିବା ସେ କହିଛନ୍ତି।