୨୦୨୭ ଉତ୍ତର ପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ରାଜ୍ୟ ରାଜନୀତିରେ ସରଗରମ ବୃଦ୍ଧି ପାଇଛି। ସମାଜବାଦୀ ପାର୍ଟି (SP) ଅଧ୍ୟକ୍ଷ ଅଖିଲେଶ ଯାଦବ ନିକଟରେ ରାମ୍ପୁର ଜେଲ୍ରେ ବନ୍ଦୀ ଥିବା ଦଳର ବରିଷ୍ଠ ନେତା ଆଜମ୍ ଖାନ୍ ଙ୍କୁ ଭେଟିବା ପରେ ଅନେକ ପ୍ରକାରର ଆଲୋଚନା ଓ କଳ୍ପନାଜଳ୍ପନା ଜୋର୍ ଧରିଛି। 

ରାଜନୈତିକ ମହଲରେ ଦାବି କରାଯାଉଥିଲା ଯେ କଂଗ୍ରେସ ଏବଂ ସମାଜବାଦୀ ପାର୍ଟି ମଧ୍ୟରେ ସିଟ୍ ବଣ୍ଟାକୁ ନେଇ ଆଲୋଚନା ହୋଇସାରିଛି ଏବଂ କଂଗ୍ରେସ ପକ୍ଷରୁ ୧୭୨ଟି ଆସନର ଏକ ଫର୍ମୁଲା କିମ୍ବା ଲିଷ୍ଟ୍ ଦିଆଯାଇଛି, ଯାହାକୁ ନେଇ ଅଖିଲେଶ, ଆଜମ୍ ଖାନ୍ ଙ୍କ ସହ ଆଲୋଚନା କରିବାକୁ ଜେଲ୍ ରେ ପହଞ୍ଚିଥିଲେ।

ଜେଲରେ ୪୫ ମିନିଟର ଆଲୋଚନା

ଅଖିଲେଶ ଯାଦବ ରାମ୍ପୁର ଜିଲ୍ଲା ଜେଲ୍ ରେ ପହଞ୍ଚି ଆଜମ୍ ଖାନ୍ ଙ୍କ ସହ ପ୍ରାୟ ୪୫ ମିନିଟ୍ ଧରି ଏକାନ୍ତରେ ଆଲୋଚନା କରିଥିଲେ। ଏହାପରେ ସେ ଆଜମ୍ ଖାନ୍ ଙ୍କ ବାସଭବନକୁ ଯାଇ ତାଙ୍କ ପତ୍ନୀ ତଞ୍ଜିମ୍ ଫାତିମାଙ୍କୁ ମଧ୍ୟ ଭେଟିଥିଲେ। ଜେଲ୍ରୁ ବାହାରିବା ପରେ ଅଖିଲେଶ ଗଣମାଧ୍ୟମ ସାମ୍ନାରେ କହିଥିଲେ ଯେ, ଆଜମ୍ ଖାନ୍ ଙ୍କୁ ମିଥ୍ୟା ମାମଲାରେ ଫସାଯାଇଛି ଏବଂ ତାଙ୍କୁ ହଇରାଣ କରାଯାଉଛି। ତାଙ୍କ ସରକାର କ୍ଷମତାକୁ ଆସିଲେ ଆଜମ୍ ଖାନ୍ ଜେଲ୍ ରୁ ମୁକ୍ତ ହେବେ।

ସିଟ୍ ବଣ୍ଟା ଏବଂ ୧୫ ସିଟ୍ ର ଦାବି ଉପରେ ଅଖିଲେଶଙ୍କ ସ୍ପଷ୍ଟୀକରଣ

ଆଜମ୍ ଖାନ୍ ୨୦୨୭ ନିର୍ବାଚନ ପାଇଁ ୧୫ଟି ନିର୍ଦ୍ଦିଷ୍ଟ ବିଧାନସଭା ଆସନ ଦାବି କରିଥିବା ନେଇ ଗଣମାଧ୍ୟମରେ ଚର୍ଚ୍ଚା ହେଉଥିଲା। ଏହି ଦାବିକୁ ଅଖିଲେଶ ସମ୍ପୂର୍ଣ୍ଣ ଭାବେ ପ୍ରତ୍ୟାଖ୍ୟାନ କରିଛନ୍ତି। ସେ କହିଛନ୍ତି ଯେ ଆଜମ୍ ଖାନ୍ କୌଣସି ନିର୍ଦ୍ଦିଷ୍ଟ ସିଟ୍ କିମ୍ବା ଟିକେଟ୍ ମାଗିନାହାନ୍ତି, ବରଂ ସମଗ୍ର ଉତ୍ତର ପ୍ରଦେଶର ୪୦୩ଟି ଯାକ ବିଧାନସଭା ଆସନର ସ୍ଥିତି ଏବଂ ରଣନୀତି ଉପରେ ଚର୍ଚ୍ଚା ହୋଇଛି।

ଆଜମଙ୍କୁ ଭେଟିବା ପଛର ସାମାଜିକ ଓ ରାଜନୈତିକ ସମୀକରଣ

ଉତ୍ତର ପ୍ରଦେଶ ନିର୍ବାଚନ ପୂର୍ବରୁ ମୁସଲିମ୍ ଭୋଟ୍ବ୍ୟାଙ୍କ୍କୁ ନିଜ ସହ ଯୋଡ଼ି ରଖିବା ସମାଜବାଦୀ ପାର୍ଟି ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଅସଦୁଦ୍ଦିନ୍ ଓୱେସୀଙ୍କ AIMIM ଏବଂ ଅନ୍ୟାନ୍ୟ ଦଳ ମୁସଲିମ୍ ଭୋଟରଙ୍କୁ ଆକୃଷ୍ଟ କରିବାକୁ ଚେଷ୍ଟା କରୁଥିବା ବେଳେ, ଅଖିଲେଶ ଯାଦବ ଆଜମ୍ ଖାନ୍ଙ୍କୁ ସାକ୍ଷାତ କରି ଦଳ ମଧ୍ୟରେ ତାଙ୍କର ଗୁରୁତ୍ୱ ଓ ସମ୍ମାନ କାଏମ୍ ଥିବା ସନ୍ଦେଶ ଦେବାକୁ ଚାହିଁଛନ୍ତି। କଂଗ୍ରେସ ସହ ମେଣ୍ଟ ଏବଂ ସିଟ୍ ସମୀକରଣ କ୍ଷେତ୍ରରେ ଆଜମ୍ ଖାନ୍ ଙ୍କ ମତାମତ ସପା ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛି।