ଜାମନଗର: ଭାରତୀୟ ବାୟୁ ସେନାର ଲଢୁଆ ବିମାନ ‘ଜାଗୁଆର’ ବୁଧବାର ରାତିରେ ଦୁର୍ଘଟଣାଗ୍ରସ୍ତ ହୋଇଛି। ଏହି ଦୁର୍ଘଟଣାରେ ବାୟୁସେନାର ଜଣେ ପାଇଲଟଙ୍କ ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ପାଇଲଟ ମେଡିକାଲରେ ଚିକିତ୍ସିତ ହେଉଛନ୍ତି।

ସୂଚନା ଅନୁସାରେ, ବୁଧବାର ରାତିରେ ଗୁଜୁରାଟର ଜାମନଗରରେ ଲଢୁଆ ବିମାନ ଦୁର୍ଘଟଣାଗ୍ରସ୍ତ ହୋଇଥିଲା।ବିମାନ ଉଡ଼ାଣ ଭରିବା ପରେ ସେଥିରେ ପାଇଲଟମାନେ ଯାନ୍ତ୍ରିକ ତ୍ରୁଟି ରହିଛି ବୋଲି ଜାଣିବାକୁ ପାଇଥିଲେ। ଜାମନଗରରୁ ୧୨ କିଲୋମିଟର ଦୂରରେ ଥିବା ସୁବରଡ଼ା ଗାଁ’ରେ ନିକଟରେ ବିମାନଟିରେ ନିଆଁ ଲାଗିଯାଇଥିଲା। ବିମାନଟି ତଳେ ପଡିଯାଇଥିଲା। ଉକ୍ତ ଅଞ୍ଚଳ ଧୂଆଁମୟ ହୋଇଯାଇଥିଲା। ସ୍ଥାନୀୟ ଅଞ୍ଚଳରେ ଚାଞ୍ଚଲ୍ୟ ଖେଳାଇଦେଇଥିଲା। ଏହି ଦୁର୍ଘଟଣାରେ ଜଣେ ପାଇଲଟଙ୍କ ମୃତ୍ୟୁ ହୋଇଛି। ଅନ୍ୟ ଜଣେ ପାଇଲଟ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ବାୟୁସେନାର ଉଚ୍ଚ ଅଧିକାରୀମାନେ ଖବର ପାଇ, ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ଜାରି କରିଛନ୍ତି ।

ପାଇଲଟଙ୍କ ମୃତ୍ୟୁ ଖବର ଶୁଣି ଭାରତୀୟ ବାୟୁସେନା ପକ୍ଷରୁ କୁହାଯାଇଛି ଯେ, ପାଇଲଟଙ୍କ ମୃତ୍ୟୁରେ ଗଭୀର ଦୁଃଖ ପ୍ରକାଶ କରୁଛି। ଶୋକସନ୍ତପ୍ତ ପରିବାରକୁ ମଧ୍ୟ ଆମେ ସମବେଦନା ଜଣାଉଛୁ।