କୋଲକାତା: ସୁପ୍ରିମକୋର୍ଟରୁ ଆଜି ପଶ୍ଚିମବଙ୍ଗର ମମତା ବାନାର୍ଜୀ ସରକାରଙ୍କୁ ବଡ଼ ଝଟକା ଲାଗିଛି। ସର୍ବୋଚ୍ଚ ନ୍ୟାୟାଳୟ ରାଜ୍ୟର ୨୬ ହଜାର ଶିକ୍ଷକ ଓ ଅନ୍ୟ କର୍ମଚାରୀଙ୍କ ନିଯୁକ୍ତିକୁ ବେଆଇନ ଘୋଷିତ କରିଛି। ଏହା ପରେ ରାଜନୀତି ଜୋର ଧରିଛି। ଏହି ପ୍ରସଙ୍ଗରେ ବିଜେପି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଇସ୍ତଫା ଦାବି କରିଛି। ସୁପ୍ରିମକୋର୍ଟଙ୍କ ନିଷ୍ପତ୍ତିରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ଅସନ୍ତୋଷ ବ୍ୟକ୍ତ କରିଛନ୍ତି। ସେ କହିଛନ୍ତି ନ୍ୟାୟପାଳିକା ପ୍ରତି ମୋର ବହୁତ ସମ୍ମାନ ରହିଛି। ମାତ୍ର ନିଷ୍ପତ୍ତିକୁ ସ୍ଵୀକାର କରି ପାରିବି ନାହିଁ।

ମମତା କହିଛନ୍ତି, ସେ ଚାକିରି ହରାଇଥିବା ଲୋକଙ୍କୁ ଭେଟିବେ ଏବଂ ଆଶା ନ ହରାଇବା ପାଇଁ କହିବେ। ବିଜେପି ରାଜ୍ୟ ସଭାପତି ତଥା କେନ୍ଦ୍ର ମନ୍ତ୍ରୀ ସୁକାନ୍ତ ମଜୁମଦାର ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ମମତା ବାନାର୍ଜୀଙ୍କ ସରକାରକୁ ଟାର୍ଗେଟ୍ କରିଛନ୍ତି। ସେ କହିଛନ୍ତି ଶିକ୍ଷକ ନିଯୁକ୍ତିରେ ବ୍ୟାପକ ଦୁର୍ନୀତି ରାଜ୍ୟ ମୁଖ୍ୟମନ୍ତ୍ରୀଙ୍କ ବିଫଳତାକୁ ଦର୍ଶାଉଛି। ସୁପ୍ରିମକୋର୍ଟଙ୍କ ନିଷ୍ପତ୍ତିରୁ ସ୍ପଷ୍ଟ ହୋଇଛି ଯେ, ମମତାଙ୍କ ଶାସନ କାଳରେ କେମିତି ରାଜ୍ୟର ଶିକ୍ଷିତ ବେରୋଜଗାର ଯୁବକଙ୍କ ଯୋଗ୍ୟତାକୁ ଟଙ୍କାରେ ବିକ୍ରି କରାଯାଉଛି। 

ସେ ଏକ୍ସରେ ପୋଷ୍ଟ କରି  ଆହୁରି ଲେଖିଛନ୍ତି ଯେ ମମତା ବାନାର୍ଜୀ କେବଳ ଯୋଗ୍ୟ ପ୍ରାର୍ଥୀଙ୍କୁ ଧୋକା ଦେଇନାହାନ୍ତି ବରଂ ସେମାନଙ୍କ ପରିବାର ଲୋକଙ୍କୁ ମଧ୍ୟ ଧୋକା ଦେଇଛନ୍ତି । ଟିଏମସି ସାଂସଦ ଡୋଲା ସେନ୍ କହିଛନ୍ତି ଯେ ପାର୍ଟି କୋର୍ଟଙ୍କ ନିଷ୍ପତ୍ତିକୁ ସମ୍ମାନ କରୁଛି, କିନ୍ତୁ ଏହା ମଧ୍ୟ ସତ ଯେ ଆମେ ଦୁର୍ନୀତି ବିରୋଧରେ ଲମ୍ବା ଲଢେଇ ଲଢିଛୁ ।

ତେଣୁ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ନିଜ ପଦରୁ ଇସ୍ତଫା ଦେବା ଉଚିତ୍। ଏହା ଉପରେ ମମତା ବାନାର୍ଜୀ ପ୍ରଶ୍ନ କରିଛନ୍ତି ଯେ, କଣ ବିଜେପି ଚାହୁଁଛି ପଶ୍ଚିମବଙ୍ଗର ଶିକ୍ଷା ପ୍ରଣାଳୀ ଧ୍ଵସ୍ତ ହୋଇଯାଉ। ପଶ୍ଚିମବଙ୍ଗର  ପୂର୍ବତନ ଶିକ୍ଷା ମନ୍ତ୍ରୀ ଜେଲ୍ରେ। ବିଜେପି ଜଣାଉ ମଧ୍ୟ ପ୍ରଦେଶରେ ବ୍ୟାପମ ମାମଲାରେ ବିଜେପିର କେତେ ଜଣ ନେତା ଗିରଫ ହୋଇଛନ୍ତି।