ପ୍ରବର୍ତ୍ତନ ନିର୍ଦ୍ଦେଶାଳୟ (ED) ଆମ ଆଦମୀ ପାର୍ଟି (AAP) ର ନେତା ଦୀପକ ସିଙ୍ଗଲାଙ୍କୁ ବ୍ୟାଙ୍କ ପ୍ରତାରଣା ଏବଂ ମନି ଲଣ୍ଡରିଂ ମାମଲାରେ ଗିରଫ କରିଛି। ଆପ୍ ଏହାକୁ କେନ୍ଦ୍ରୀୟ ଏଜେନ୍ସିଗୁଡ଼ିକର ଅପବ୍ୟବହାର ଏବଂ ଗୋଆ ନିର୍ବାଚନ ପୂର୍ବରୁ ଦଳକୁ ଦୁର୍ବଳ କରିବାର ଏକ ପ୍ରୟାସ ବୋଲି ଅଭିହିତ କରିଛି।

ଦିଲ୍ଲୀ ଏବଂ ଗୋଆରେ ସୋମବାର (୧୮ ମେ) ପ୍ରବର୍ତ୍ତନ ନିର୍ଦ୍ଦେଶାଳୟ (ED) ର ଏକ ବଡ଼ କାର୍ଯ୍ୟାନୁଷ୍ଠାନ ଦେଖିବାକୁ ମିଳିଛି। ଆମ ଆଦମୀ ପାର୍ଟିର ନେତା ତଥା ଗୋଆ ସହ-ପ୍ରଭାରୀ ଦୀପକ ସିଙ୍ଗଲାଙ୍କୁ କଥିତ ବ୍ୟାଙ୍କ ଠକେଇ ଏବଂ ମନି ଲଣ୍ଡରିଂ ମାମଲାରେ ଗିରଫ କରାଯାଇଛି। ଅଧିକାରୀଙ୍କ ସୂଚନା ଅନୁଯାୟୀ, ED ଦିଲ୍ଲୀ ଏବଂ ଗୋଆରେ ସିଙ୍ଗଲାଙ୍କ ସହ ଜଡ଼ିତ ଅନେକ ସ୍ଥାନରେ ଚଢ଼ାଉ କରିଥିଲା ଏବଂ ଏହା ସହିତ ଅନେକ ଘଣ୍ଟା ଧରି ପଚରାଉଚରା କରିବା ପରେ ତାଙ୍କୁ ହେପାଜତକୁ ନେଇଥିଲା।

ସୂତ୍ର ଅନୁଯାୟୀ, ସୋମବାର ସକାଳେ ED ଟିମ୍ ଦିଲ୍ଲୀ ଏବଂ ଗୋଆରେ ସିଙ୍ଗଲାଙ୍କ ସହ ଜଡ଼ିତ ଅନେକ ଠିକଣାରେ ପହଞ୍ଚିଥିଲେ। ଏଜେନ୍ସି ବ୍ୟାଙ୍କ ଋଣ ଜାଲିଆତି ସହ ଜଡ଼ିତ ଦସ୍ତାବିଜ ଏବଂ କାରବାରର ଯାଞ୍ଚ କରିଥିଲା। ପଚରାଉଚରା ସମୟରେ ED ସିଙ୍ଗଲାଙ୍କୁ ଅନେକ ପ୍ରଶ୍ନ ପଚାରିଥିଲା, କିନ୍ତୁ ସେ ସନ୍ତୋଷଜନକ ଉତ୍ତର ଦେଇପାରିନଥିଲେ। ଏହାପରେ ଏଜେନ୍ସି ତାଙ୍କୁ ଗିରଫ କରିଥିଲା। ED ର ଏହି କାର୍ଯ୍ୟାନୁଷ୍ଠାନ ମନି ଲଣ୍ଡରିଂ ମାମଲାରେ ନିଆଯାଇଛି। ତେବେ ବର୍ତ୍ତମାନ ସୁଦ୍ଧା ଏଜେନ୍ସି ପକ୍ଷରୁ କୌଣସି ଆଧିକାରୀକ ବୟାନ ସାମ୍ନାକୁ ଆସିନାହିଁ।

'ବିଜେପିରେ ସାମିଲ ନହେବାରୁ ଗିରଫଦାରୀ ହେଲା'

ଏହି କାର୍ଯ୍ୟାନୁଷ୍ଠାନ ପରେ ରାଜନୈତିକ ମାହୋଲ ସରଗରମ ହୋଇଯାଇଛି। ଆପ୍ ଏହାକୁ କେନ୍ଦ୍ର ସରକାରଙ୍କ ଦ୍ୱାରା ବିରୋଧୀଙ୍କୁ ଡରାଇବା ଏବଂ ନିର୍ବାଚନ ପୂର୍ବରୁ ସଂଗଠନକୁ ଦୁର୍ବଳ କରିବାର ଏକ ପ୍ରୟାସ ବୋଲି କହିଛି। ଆମ ଆଦମୀ ପାର୍ଟିର ସଂଯୋଜକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏହି କାର୍ଯ୍ୟାନୁଷ୍ଠାନକୁ ନେଇ ବିଜେପି ଉପରେ ନିଶାନା ସାଧିଛନ୍ତି। ସେ ସୋସିଆଲ ମିଡିଆରେ ଏକ ପୋଷ୍ଟ ସେୟାର କରି କହିଛନ୍ତି, "ଦୀପକ ସିଙ୍ଗଲାଙ୍କୁ କୌଣସି ଅପରାଧ ପାଇଁ ଗିରଫ କରାଯାଇ ନାହିଁ। ବରଂ, ବିଜେପି ବିରୁଦ୍ଧରେ କାମ କରିବା ଏବଂ ବିଜେପିରେ ସାମିଲ ହେବାକୁ ମନା କରିବା ଯୋଗୁଁ ତାଙ୍କୁ ଗିରଫ କରାଯାଇଛି। ଦୀପକ ସାହସୀ ଅଟନ୍ତି ଏବଂ ଦେଶ ପାଇଁ ଲଢ଼ୁଛନ୍ତି।"

ବିଜେପି ବିରୁଦ୍ଧରେ କେନ୍ଦ୍ରୀୟ ଏଜେନ୍ସିଗୁଡ଼ିକର ଅପବ୍ୟବହାର ଅଭିଯୋଗ

ଅନ୍ୟପଟେ ଦଳର ବରିଷ୍ଠ ନେତ୍ରୀ ତଥା ଦିଲ୍ଲୀ ବିଧାନସଭାର ବିରୋଧୀ ଦଳ ନେତ୍ରୀ ଆତିଶୀ ବିଜେପି ବିରୁଦ୍ଧରେ କେନ୍ଦ୍ରୀୟ ଏଜେନ୍ସିଗୁଡ଼ିକର ଅପବ୍ୟବହାର ଅଭିଯୋଗ ଆଣିଛନ୍ତି। ସେ ସୋସିଆଲ ମିଡିଆ ପୋଷ୍ଟ ଏବଂ ଭିଡିଓ ବାର୍ତ୍ତା ଜାରି କରି କହିଛନ୍ତି ଯେ, ଗୋଆରେ ଆପ୍ର ବଢ଼ୁଥିବା ଲୋକପ୍ରିୟତାକୁ ଦେଖି ବିଜେପି ଭୟଭୀତ ହୋଇପଡ଼ିଛି। ସେ ଦାବି କରିଛନ୍ତି ଯେ ସୋମବାର ସକାଳୁ ଦୀପକ ସିଙ୍ଗଲାଙ୍କ ଘର ବ୍ୟତୀତ ଗୋଆରେ ପାର୍ଟି କର୍ମକର୍ତ୍ତାଙ୍କ ଘରେ ମଧ୍ୟ ED ର ଚଢ଼ାଉ ଚାଲିଛି। ସେ ଅଭିଯୋଗ କରିଛନ୍ତି ଯେ, ଏହି କାର୍ଯ୍ୟାନୁଷ୍ଠାନ କେବଳ ଡରାଇବା ପାଇଁ ନୁହେଁ, ବରଂ ଦଳର ସାଂଗଠନିକ ଡାଟା (ଡେଟା) ହାସଲ କରିବା ଉଦ୍ଦେଶ୍ୟରେ କରାଯାଉଛି। ସେ କହିଛନ୍ତି, "ବିଜେପି ଜାଣିଛି ଯେ ଗୋଆର ଜନସାଧାରଣ ରାଜ୍ୟ ସରକାରଙ୍କ ଉପରେ ଅସନ୍ତୁଷ୍ଟ ଅଛନ୍ତି ଏବଂ ଆଗାମୀ ନିର୍ବାଚନରେ ତାଙ୍କୁ କ୍ଷମତାରୁ ବାହାର କରିପାରନ୍ତି। ଏହି କାରଣରୁ ED ଜରିଆରେ AAP କୁ ଟାର୍ଗେଟ୍ କରାଯାଉଛି।"

'ଦଳ ED ର କାର୍ଯ୍ୟାନୁଷ୍ଠାନକୁ ଡରିବାର ନାହିଁ'

ଆତିଶୀ କହିଛନ୍ତି ଯେ ଯେଉଁ ନେତାମାନେ ବିଜେପିରେ ସାମିଲ ହେଲେ ନାହିଁ, ସେମାନଙ୍କୁ ଏଜେନ୍ସିଗୁଡ଼ିକ ଜରିଆରେ ହଇରାଣ କରାଗଲା। ସେ ସମ୍ପ୍ରତି ଗିରଫ ହୋଇଥିବା ପଞ୍ଜାବର ମନ୍ତ୍ରୀ ତଥା ଆପ୍ ନେତା ସଞ୍ଜୀବଙ୍କ କଥା ମଧ୍ୟ ଉଲ୍ଲେଖ କରିଛନ୍ତି। ସେ କହିଛନ୍ତି ଯେ ଦଳ ED ର କାର୍ଯ୍ୟାନୁଷ୍ଠାନକୁ ଭୟ କରିବାର ନାହିଁ। ଗୋଆର ଜନସାଧାରଣ ଗତ କେତେ ବର୍ଷ ହେବ ବିଜେପି ସରକାରଙ୍କ ଉପରେ ଅସନ୍ତୁଷ୍ଟ ଅଛନ୍ତି ଏବଂ ଏବେ ପରିବର୍ତ୍ତନ ଚାହୁଁଛନ୍ତି। ଆତିଶୀ ଦାବି କରିଛନ୍ତି ଯେ କେନ୍ଦ୍ରୀୟ ଏଜେନ୍ସିଗୁଡ଼ିକର ବ୍ୟବହାର କରି ବିଜେପି ରାଜନୈତିକ ଫାଇଦା ନେବାକୁ ଚେଷ୍ଟା କରୁଛି, କିନ୍ତୁ ଜନସାଧାରଣ ସବୁ ଦେଖୁଛନ୍ତି।

ମନୀଷ ସିସୋଦିଆଙ୍କ ତୀବ୍ର ଆକ୍ରମଣ

ଏହି ସମୟରେ ଆପ୍ ନେତା ମନୀଷ ସିସୋଦିଆ ସୋସିଆଲ ମିଡିଆରେ ଲେଖିଛନ୍ତି, "ଇଡି, ସିବିଆଇ ଏବଂ ନିର୍ବାଚନ କମିଶନ ଭଳି ସଂସ୍ଥାଗୁଡ଼ିକୁ ନିଜର ବ୍ୟକ୍ତିଗତ ଗୁଣ୍ଡା ଭଳି ବ୍ୟବହାର କରି ମୋଦୀ ଜୀ ବିରୋଧୀ ଦଳର ନେତାମାନଙ୍କୁ ନିର୍ବାଚନ ଜିତିବାରୁ ରୋକି ପାରିବେ। କିନ୍ତୁ ଦେଶର ଅର୍ଥନୀତିକୁ ଏବଂ ଟଙ୍କାର କ୍ରମାଗତ ହ୍ରାସ ପାଉଥିବା ସମ୍ମାନକୁ ସମ୍ଭାଳି ପାରିବେ ନାହିଁ।"

ଏହି କାର୍ଯ୍ୟାନୁଷ୍ଠାନ ଏଭଳି ଏକ ସମୟରେ ହୋଇଛି, ଯେତେବେଳେ କିଛି ଦିନ ପୂର୍ବରୁ ପଞ୍ଜାବର ମନ୍ତ୍ରୀ ସଞ୍ଜୀବ ଆରୋଡାଙ୍କୁ ମଧ୍ୟ ମନି ଲଣ୍ଡରିଂ ଏବଂ କଥିତ ନକଲି GST କାରବାର ମାମଲାରେ ED ଗିରଫ କରିଥିଲା। ଏଜେନ୍ସିର ଦାବି ଥିଲା ଯେ ୧୦୦ କୋଟିରୁ ଅଧିକ ଟଙ୍କାର ସନ୍ଦିଗ୍ଧ କାରବାରର ଯାଞ୍ଚ କରାଯାଉଛି।

ଡିଏମକେ ବିଧାୟକଙ୍କ ଦାବି: ବିଜୟଙ୍କ ସରକାର ଛଅ ମାସ ମଧ୍ୟ ଚାଲିପାରିବ ନାହିଁ

'ବାବାଜୀ ଫାଇନାନ୍ସ ଗ୍ରୁପ୍'ର ରାମ ସିଂଙ୍କ ଠିକଣାରେ ଚଢ଼ାଉ

ବ୍ୟାଙ୍କ ପ୍ରତାରଣାର ଏକ ମାମଲାରେ ତଦନ୍ତକାରୀ ସଂସ୍ଥା ଦିଲ୍ଲୀ ଏବଂ ଗୋଆରେ ଆପ୍ ନେତାଙ୍କ ଠିକଣାରେ ଚଢ଼ାଉ କରିଛି। ଅନ୍ୟପକ୍ଷରେ, ଦ୍ୱିତୀୟ କାର୍ଯ୍ୟାନୁଷ୍ଠାନ ଦିଲ୍ଲୀର ସୁଭାଷ ନଗରସ୍ଥିତ 'ବାବାଜୀ ଫାଇନାନ୍ସ ଗ୍ରୁପ୍'ର ରାମ ସିଂଙ୍କ ଠିକଣାରେ କରାଯାଇଛି। ବାବାଜୀ ଫାଇନାନ୍ସ ଗ୍ରୁପ୍ ବିରୁଦ୍ଧରେ ସାଧାରଣ ଜନତାଙ୍କ ସହ ପ୍ରତାରଣା କରିବା ଏବଂ ପ୍ରାୟ ୧୮୦ କୋଟି ଟଙ୍କାର ହେରଫେର (ମନି ଲଣ୍ଡରିଂ) କରିବା ଅଭିଯୋଗରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।