ୱାଶିଂଟନ୍‌: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶନିବାର କହିଛନ୍ତି, ଥାଇଲ୍ୟାଣ୍ଡ ଏବଂ କମ୍ବୋଡିଆର ନେତାମାନେ ଖୁବ୍ ଶୀଘ୍ର ଏକ ପାରସ୍ପରିକ ଯୁଦ୍ଧବିରତି ପାଇଁ ସାକ୍ଷାତ କରିବେ। ଗତ ତିନି ଦିନ ଧରି ସୀମାରେ ଦୁଇ ଦେଶ ମଧ୍ୟରେ ହିଂସାତ୍ମକ ସଂଘର୍ଷ ଚାଲିଛି, ଯେଉଁଥିରେ ଏପର୍ଯ୍ୟନ୍ତ ୩୦ରୁ ଅଧିକ ଲୋକଙ୍କ ମୃତ୍ୟୁ ହୋଇଛି ଏବଂ ପ୍ରାୟ ୧.୩ ଲକ୍ଷ ଲୋକ ବାସହୀନ ହୋଇଛନ୍ତି।

ରାଷ୍ଟ୍ରପତି ଟ୍ରମ୍ପ ବର୍ତ୍ତମାନ ସ୍କଟଲ୍ୟାଣ୍ଡ ଗସ୍ତରେ ଅଛନ୍ତି। ଟ୍ରମ୍ପ ଟ୍ରୁଥ୍ ସୋସିଆଲରେ ସୂଚନା ଦେଇଛନ୍ତି ଯେ ସେ ଥାଇଲ୍ୟାଣ୍ଡର କାର୍ଯ୍ୟକାରୀ ପ୍ରଧାନମନ୍ତ୍ରୀ ଫୁମଥାମ୍ ଭେଚାୟାଚାଇ ଏବଂ କାମ୍ବୋଡିଆର ପ୍ରଧାନମନ୍ତ୍ରୀ ହୁନ୍ ମାନେଟ୍ ସହିତ ପୃଥକ ଭାବରେ ଆଲୋଚନା କରିଛନ୍ତି। ଟ୍ରମ୍ପ ଉଭୟଙ୍କୁ ଚେତାବନୀ ଦେଇଛନ୍ତି ଯେ ଯଦି ଯୁଦ୍ଧ ଜାରି ରହେ, ତେବେ ଆମେରିକା ସେମାନଙ୍କ ସହିତ ବାଣିଜ୍ୟ ଚୁକ୍ତି କରିବ ନାହିଁ।

ଟ୍ରମ୍ପ ଲେଖିଛନ୍ତି, ଉଭୟ ଦେଶ ତୁରନ୍ତ ଶାନ୍ତି ଚାହାଁନ୍ତି ଏବଂ ସମାଧାନ ପାଇଁ ପ୍ରସ୍ତୁତ। ଉଭୟ ନେତା ଖୁବ୍ ଶୀଘ୍ର ଏକ ଯୁଦ୍ଧବିରତି ପାଇଁ ଏକାଠି କାମ କରିବେ। ହ୍ୱାଇଟ୍ ହାଉସ୍ କିମ୍ବା ଉଭୟ ଦେଶର ଦୂତାବାସ ଏପର୍ଯ୍ୟନ୍ତ ଏହି ଆଲୋଚନାକୁ ନିଶ୍ଚିତ କରିନାହାଁନ୍ତି।

ଆସିଆନ୍ ଅଧ୍ୟକ୍ଷ ଏବଂ ମାଲେସିଆର ପ୍ରଧାନମନ୍ତ୍ରୀ ଅନୱର ଇବ୍ରାହିମ୍ ମଧ୍ୟ ସଂଘର୍ଷ ବନ୍ଦ କରିବା ପାଇଁ ଯୁଦ୍ଧବିରତି ପ୍ରସ୍ତାବ ଦେଇଛନ୍ତି। କାମ୍ବୋଡିଆ ଖୋଲାଖୋଲି ଭାବରେ ଏହି ପ୍ରସ୍ତାବକୁ ସମର୍ଥନ କରିଛି, ଯେତେବେଳେ ଥାଇଲ୍ୟାଣ୍ଡ କହିଛି ଯେ ସେ ଏହାକୁ 'ନୀତିଗତ ଭାବରେ' ଗ୍ରହଣ କରିଛି।

ସୂଚନାଯୋଗ୍ୟ, ୮୧୭ କିଲୋମିଟର ଲମ୍ବା ଥାଇଲ୍ୟାଣ୍ଡ-କମ୍ବୋଡିଆ ସୀମାର ଅନେକ ଅଂଶକୁ ନେଇ ଏକ ଦୀର୍ଘକାଳୀନ ବିବାଦ ରହିଛି। ବିଶେଷକରି ପ୍ରେହ ବିହାର ଏବଂ ଟା ମୋନ୍ ଥମ୍ ଭଳି ୧୧ ଶତାବ୍ଦୀର ପ୍ରାଚୀନ ହିନ୍ଦୁ ମନ୍ଦିର ନେଇ ଉଭୟ ଦେଶ ଦାବି କରନ୍ତି ଯେ ଏଗୁଡ଼ିକ ସେମାନଙ୍କ ଅଞ୍ଚଳରେ ଅଛି। ୧୯୬୨ ମସିହାରେ ଅନ୍ତର୍ଜାତୀୟ ନ୍ୟାୟାଳୟ ପ୍ରେହ ବିହାର ମନ୍ଦିରକୁ କମ୍ବୋଡିଆର ଏକ ଅଂଶ ବୋଲି ବିବେଚନା କରିଥିଲା। କିନ୍ତୁ ଥାଇଲ୍ୟାଣ୍ଡ ଏହି ନିଷ୍ପତ୍ତିକୁ ସମ୍ପୂର୍ଣ୍ଣ ଗ୍ରହଣ କରିନଥିଲା। ୨୦୦୮ ମସିହାରେ ଯେତେବେଳେ କମ୍ବୋଡିଆ ଏହି ମନ୍ଦିରକୁ ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳରେ ଅନ୍ତର୍ଭୁକ୍ତ କରିବାକୁ ଚେଷ୍ଟା କରିଥିଲା, ବିବାଦ ଆହୁରି ଗଭୀର ହୋଇଗଲା।

ଅଧିକ ପଢ଼ନ୍ତୁ: ଯୁଦ୍ଧ ବନ୍ଦ ନ କଲେ କାରବାର ନାହିଁ