କୋଲକାତା: ପଶ୍ଚିମବଙ୍ଗରେ ତୃଣମୂଳ କଂଗ୍ରେସ (TMC) ସରକାର ଗଲା ପରେ ଏବେ ଦଳୀୟ ନେତାଙ୍କ ଅଡ଼ୁଆ ବଢ଼ିବାରେ ଲାଗିଛି। ଟିଏମସିର ବଡ଼ ବଡ଼ ଚେହେରାଙ୍କୁ ଏବେ ଜନ ଆକ୍ରୋଶର ସାମ୍ନା କରିବାକୁ ପଡ଼ୁଥିବା ଦେଖିବାକୁ ମିଳୁଛି। ପ୍ରଥମେ ଦକ୍ଷିଣ ୨୪ ପ୍ରଗଣାର ସୋନାରପୁରଠାରେ ଟିଏମସି ସାଧାରଣ ସମ୍ପାଦକ ଅଭିଷେକ ବାନାର୍ଜୀଙ୍କୁ ବିରୋଧ କରାଯାଇଥିବା ବେଳେ, ଏବେ ହୁଗୁଳିରେ ମମତା ବାନାର୍ଜୀଙ୍କ ଅତି ବିଶ୍ୱସ୍ତ ତଥା ସାଂସଦ କଲ୍ୟାଣ ବାନାର୍ଜୀଙ୍କ ଉପରେ ଆକ୍ରମଣ ହୋଇଥିବା ଖବର ସାମ୍ନାକୁ ଆସିଛି। ଏହି ସଂଘାତିକ ଆକ୍ରମଣର ଏକ ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।

କଲ୍ୟାଣ ବାନାର୍ଜୀଙ୍କୁ ଘେରିଲେ ଉତ୍ତ୍ୟକ୍ତ ଲୋକେ

ହୁଗୁଳିରେ ଏକ କାର୍ଯ୍ୟକ୍ରମ ସମୟରେ ସାଂସଦ କଲ୍ୟାଣ ବାନାର୍ଜୀଙ୍କୁ ସ୍ଥାନୀୟ ଲୋକଙ୍କ ତୀବ୍ର ବିରୋଧର ସାମ୍ନା କରିବାକୁ ପଡ଼ିଥିଲା। ସେଠାରେ ଉପସ୍ଥିତ ଉତ୍ତ୍ୟକ୍ତ ଭିଡ଼ ତାଙ୍କ ଉପରକୁ ଆକ୍ରମଣ କରିବା ସହ ଧକ୍କାମୁକ୍କା କରିଥିବା ଅଭିଯୋଗ ହୋଇଛି। ଏହି ଘଟଣାକୁ ନେଇ ସ୍ଥାନୀୟ ପୋଲିସ ପକ୍ଷରୁ କୌଣସି ଆନୁଷ୍ଠାନିକ ସ୍ପଷ୍ଟୀକରଣ ମିଳିନଥିଲେ ସୁଦ୍ଧା, ଭାଇରାଲ ଭିଡିଓ ଆଧାରରେ ତଦନ୍ତ ଚାଲିଥିବା ଜଣାପଡ଼ିଛି।

ପୂର୍ବରୁ ଅଭିଷେକ ବାନାର୍ଜୀଙ୍କୁ ହୋଇଥିଲା ଟାର୍ଗେଟ

ଉଲ୍ଲେଖଯୋଗ୍ୟ, ଏହା ପୂର୍ବରୁ ଦକ୍ଷିଣ ୨୪ ପ୍ରଗଣାର ସୋନାରପୁର ଗସ୍ତ ସମୟରେ ସାଂସଦ ଅଭିଷେକ ବାନାର୍ଜୀଙ୍କୁ ମଧ୍ୟ କଡ଼ା ବିରୋଧର ସାମ୍ନା କରିବାକୁ ପଡ଼ିଥିଲା। ସେହି ସମୟରେ ତାଙ୍କ ଉପରକୁ ଅଣ୍ଡାମାଡ଼ କରାଯିବା ସହ ବ୍ୟାପକ ଧକ୍କାମୁକ୍କା ହୋଇଥିବା ନେଇ ଅଭିଯୋଗ ଆସିଥିଲା। ପଶ୍ଚିମବଙ୍ଗରେ କ୍ଷମତା ବଦଳିବା ପରେ ଟିଏମସି ନେତାଙ୍କ ବିରୋଧରେ ଏଭଳି ପ୍ରଦର୍ଶନ ଏବେ ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି।

ଏହି ଘଟଣା ପରେ ବଙ୍ଗାଳ ରାଜନୀତିରେ ଆରୋପ-ପ୍ରତ୍ୟାରୋପର ପର୍ବ ଆରମ୍ଭ ହୋଇଯାଇଛି। ଟିଏମସିର ଅଭିଯୋଗ ଦଳୀୟ ନେତାଙ୍କୁ ସୁଚିନ୍ତିତ ଭାବେ ଟାର୍ଗେଟ କରାଯାଉଛି ଏବଂ ଏହା ପଛରେ ବିରୋଧୀଙ୍କ ହାତ ରହିଛି। କ୍ଷମତାରେ ଥିବା ବେଳେ ଜନତାଙ୍କ ସମସ୍ୟା ପ୍ରତି ଧ୍ୟାନ ଦିଆଯାଇନଥିବାରୁ ଏବେ ସାଧାରଣ ଲୋକ ନିଜର ଆକ୍ରୋଶ ପ୍ରକାଶ କରୁଛନ୍ତି।

ପଶ୍ଚିମବଙ୍ଗର ଏଭଳି ସ୍ଥିତି ମଧ୍ୟରେ କିନ୍ତୁ ଜାତୀୟ ସ୍ତରର ବିରୋଧୀ ଦଳଗୁଡ଼ିକ ଟିଏମସି ସପକ୍ଷରେ ବାହାରିଛନ୍ତି। କଂଗ୍ରେସ ନେତା ରାହୁଲ ଗାନ୍ଧୀ ଏବଂ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ଭଳି ବଡ଼ ନେତାମାନେ ମମତା ବାନାର୍ଜୀଙ୍କ ସହ ଫୋନ ଯୋଗେ କଥା ହୋଇଛନ୍ତି। ଏହି ସଙ୍କଟ ସମୟରେ ସେମାନେ ମମତାଙ୍କୁ ସମ୍ପୂର୍ଣ୍ଣ ସହଯୋଗ କରିବାର ପ୍ରତିଶ୍ରୁତି ଦେଇଛନ୍ତି।