ବେଙ୍ଗାଲୁରୁ: କର୍ଣ୍ଣାଟକ ରାଜନୀତିରୁ ଏକ ବଡ଼ ଖବର ସାମ୍ନାକୁ ଆସୁଛି। ମୁଖ୍ୟମନ୍ତ୍ରୀ ସିଦ୍ଧରମୈୟା ନିଜ ପଦବୀରୁ ଇସ୍ତଫା ଦେବା ସହ ହାଇକମାଣ୍ଡଙ୍କ ସାମ୍ନାରେ ଏକ ବଡ଼ ସର୍ତ୍ତ ରଖିଥିବା ଚର୍ଚ୍ଚା ହେଉଛି। ମିଳିଥିବା ସୂଚନା ଅନୁଯାୟୀ, ସିଦ୍ଧରମୈୟା କଂଗ୍ରେସର ଶୀର୍ଷ ନେତୃତ୍ୱଙ୍କୁ ସ୍ପଷ୍ଟ କରିଛନ୍ତି ଯେ, ସେ ମୁଖ୍ୟମନ୍ତ୍ରୀ ଗାଦି ଛାଡ଼ିବାକୁ ପ୍ରସ୍ତୁତ କିନ୍ତୁ ଏହା ବଦଳରେ ତାଙ୍କ ପୁଅ ଯତୀନ୍ଦ୍ର ସିଦ୍ଧରମୈୟାଙ୍କୁ ରାଜ୍ୟର ଉପମୁଖ୍ୟମନ୍ତ୍ରୀ ପଦ ମିଳୁ। କର୍ଣ୍ଣାଟକ କଂଗ୍ରେସ ଭିତରେ ଦୀର୍ଘ ଦିନ ହେବ ଚାଲିଥିବା ଆଭ୍ୟନ୍ତରୀଣ କନ୍ଦଳ ଏବଂ ନେତୃତ୍ୱ ପରିବର୍ତ୍ତନ ଚର୍ଚ୍ଚା ମଧ୍ୟରେ ସିଦ୍ଧରମୈୟାଙ୍କ ଏହି ଗୋଟି ଚାଳନା ଦଳୀୟ ରାଜନୀତିକୁ ସମ୍ପୂର୍ଣ୍ଣ ସରଗରମ କରିଦେଇଛି।

ପୁଅ ପାଇଁ ପାୱାର୍ ଗେମ୍‌

ରାଜନୈତିକ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ସିଦ୍ଧରମୈୟା ନିଜ ଇସ୍ତଫା ପତ୍ର ସହ ଦଳ ଆଗରେ ପୁଅଙ୍କ ଭବିଷ୍ୟତ ପାଇଁ ଦାବି ଉପସ୍ଥାପନ କରିଛନ୍ତି। ସେ ଚାହୁଁଛନ୍ତି ଯେ ଯଦି ତାଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଯାଉଛି, ତେବେ ତାଙ୍କ ଗୋଷ୍ଠୀର ସ୍ଥିତି ମଜବୁତ ରଖିବା ପାଇଁ ଯତୀନ୍ଦ୍ରଙ୍କୁ କ୍ୟାବିନେଟ୍‌ରେ ବଡ଼ ଦାୟିତ୍ୱ ମିଳୁ। ଯତୀନ୍ଦ୍ର ସିଦ୍ଧରମୈୟା ବର୍ତ୍ତମାନ କର୍ଣ୍ଣାଟକ ବିଧାନ ପରିଷଦ (MLC)ର ସଦସ୍ୟ ଅଛନ୍ତି ଏବଂ ପୂର୍ବରୁ ବିଧାୟକ ମଧ୍ୟ ରହିସାରିଛନ୍ତି।

ଡି.କେ. ଶିବକୁମାରଙ୍କ ପାଇଁ ବଢ଼ିବ କି ଅଡ଼ୁଆ?

କର୍ଣ୍ଣାଟକରେ କଂଗ୍ରେସ ସରକାର ଗଠନ ହେବା ଦିନଠାରୁ ହିଁ ସିଦ୍ଧରମୈୟା ଏବଂ ବର୍ତ୍ତମାନର ଉପମୁଖ୍ୟମନ୍ତ୍ରୀ ଡି.କେ. ଶିବକୁମାରଙ୍କ ମଧ୍ୟରେ କ୍ଷମତା ଯୁଦ୍ଧ ଚାଲିଆସୁଛି। ସିଦ୍ଧରମୈୟାଙ୍କ ଇସ୍ତଫା ପରେ ଡି.କେ. ଶିବକୁମାର ମୁଖ୍ୟମନ୍ତ୍ରୀ ହେବାର ସମ୍ଭାବନା ସବୁଠାରୁ ଅଧିକ ରହିଛି। କିନ୍ତୁ ଯଦି ସିଦ୍ଧରମୈୟାଙ୍କ ପୁଅଙ୍କୁ ଆଉ ଏକ ଉପମୁଖ୍ୟମନ୍ତ୍ରୀ ପଦ ମିଳେ, ତେବେ ସରକାର ଭିତରେ କ୍ଷମତାର ସନ୍ତୁଳନ ବିଗିଡ଼ିପାରେ, ଯାହା ଶିବକୁମାରଙ୍କ ଶିବିର ପାଇଁ ଚିନ୍ତାର ବିଷୟ ପାଲଟିଛି।

ହାଇକମାଣ୍ଡଙ୍କ କୋର୍ଟରେ ବଲ୍

ସିଦ୍ଧରମୈୟାଙ୍କ ଏହି ହଠାତ୍ ନିଷ୍ପତ୍ତି ପରେ ନୂଆଦିଲ୍ଲୀରେ କଂଗ୍ରେସ ହାଇକମାଣ୍ଡଙ୍କ ମଧ୍ୟରେ ଜରୁରୀକାଳୀନ ବୈଠକ ଆରମ୍ଭ ହୋଇଛି। କେନ୍ଦ୍ରୀୟ ନେତୃତ୍ୱ ଏହି ମାମଲାର ସମାଧାନ ଏମିତି ଏକ ଫର୍ମୁଲା ମାଧ୍ୟମରେ କରିବାକୁ ଚାହୁଁଛନ୍ତି, ଯେପରି ରାଜ୍ୟ ସରକାର ଉପରେ କୌଣସି ସଂକଟ ନଆସେ ଏବଂ ଦୁଇ ପ୍ରଭାବଶାଳୀ ଗୋଷ୍ଠୀଙ୍କୁ ସନ୍ତୁଷ୍ଟ କରାଯାଇପାରିବ।