ଲଦାଖ: ପୂର୍ବ ଲଦାଖର ମଧୁ-ନ୍ୟୁମାରେ ଅବସ୍ଥିତ ଭାରତର ସର୍ବୋଚ୍ଚ ଏୟାରଫିଲ୍ଡ ପ୍ରାୟ ପ୍ରସ୍ତୁତ ହୋଇସାରିଛି ଏବଂ ଖୁବ୍ ଶୀଘ୍ର ଏଠାରୁ ବିମାନଉଡ଼ାଣ ଓ ଅବତରଣ ମଧ୍ୟ ଆରମ୍ଭ ହେବ। ଏହି ଏୟାରଫିଲ୍ଡ ନିର୍ମାଣ ହେଲେ ଭାରତର ଜାତୀୟ ନିରାପତ୍ତା ଏବଂ ଚୀନ୍ ସହ ପ୍ରକୃତ ନିୟନ୍ତ୍ରଣ ରେଖାରେ ଯୋଗାଯୋଗ ଯଥେଷ୍ଟ ସୁଦୃଢ଼ ହେବ। 

ଚୀନ୍ ସହ ପ୍ରକୃତ ନିୟନ୍ତ୍ରଣ ରେଖା (ଏଲ୍ଏସି) ନିକଟରେ ପ୍ରାୟ ୧୩,୭୦୦ ଫୁଟ ଉଚ୍ଚତାରେ ନ୍ୟୁମା ଆଡଭାନ୍ସଡ୍ ଲ୍ୟାଣ୍ଡିଂ ଗ୍ରାଉଣ୍ଡ (ଏଏଲ୍ଜି) ଅବସ୍ଥିତ। ଏହି ଏୟାରଫିଲ୍ଡ ସାହାଯ୍ୟରେ ଭାରତ ଆବଶ୍ୟକ ପଡ଼ିଲେ ଖୁବ୍ କମ୍ ସମୟ ମଧ୍ୟରେ ଏଲଏସିରେ ନିଜର ପ୍ରତିରକ୍ଷା ବାହିନୀ କୁ ଏକାଠି କରିବାରେ ସକ୍ଷମ ହେବ। ନ୍ୟୁମା ଏଏଲଜି ଏହି ଅଞ୍ଚଳରେ ଭାରତର ରଣନୈତିକ କ୍ଷମତାକୁ ସୁଦୃଢ଼ କରିବ।   

ନ୍ୟୁମା ଏୟାରଫିଲ୍ଡରେ ନବନିର୍ମିତ ୩ କିଲୋମିଟର ରନୱେ ରହିଛି, ଯାହା ଜରୁରୀକାଳୀନ ଅପରେସନ ପାଇଁ ଡିଜାଇନ୍ କରାଯାଇଛି। ୨୦୨୧ରେ ପ୍ରାୟ ୨୧୪ କୋଟି ଟଙ୍କାର ବଜେଟ୍ ଆବଣ୍ଟନ ସହ ଏହି ପ୍ରକଳ୍ପକୁ ସବୁଜ ସଙ୍କେତ ଦିଆଯାଇଥିଲା। ଏହି ଏୟାରଷ୍ଟ୍ରିପର ଉଚ୍ଚତା ଏବଂ ଏଲଏସିର ନିକଟତରତା ଏହାକୁ ରଣନୈତିକ ଦୃଷ୍ଟିକୋଣରୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ କରିଥାଏ। ଏହି ସହାୟତାରେ ଭାରତ ଏବେ ପୂର୍ବ ଅପେକ୍ଷା ଉତ୍ତର ସୀମାରେ ଦ୍ରୁତ ଗତିରେ ସମ୍ବଳ ମୁତୟନ କରିବାରେ ସକ୍ଷମ ହେବ।   

ଏଲଏସିର ଅତି ନିକଟରେ ଥିବାରୁ ଜରୁରୀକାଳୀନ ପରିସ୍ଥିତିରେ ନ୍ୟୁମା ଏୟାରଫିଲ୍ଡ ଭାରତ ପାଇଁ ବହୁତ ଲାଭଦାୟକ ସାବ୍ୟସ୍ତ ହେବ। ଏହି ଏୟାରଫିଲ୍ଡ ଭାରତୀୟ ବାୟୁସେନାକୁ ଦୁର୍ଗମ, ପାହାଡ଼ିଆ ସୀମାନ୍ତ ଅଞ୍ଚଳକୁ ସିଧାସଳଖ ପ୍ରବେଶ କରାଇଛି ଯାହା ସଡ଼କ ପଥରେ ପହଞ୍ଚିବା ପ୍ରାୟତଃ ଚ୍ୟାଲେଞ୍ଜିଂ ହୋଇଥାଏ। 

ଭାରତ ସରକାର ଏହାର ସୀମା ଭିତ୍ତିଭୂମିକୁ ସୁଦୃଢ଼ କରିବା ଉପରେ ବହୁତ ଧ୍ୟାନ ଦେଉଛନ୍ତି ଏବଂ ନ୍ୟୁମା ଏୟାରଫିଲ୍ଡ ଏହାର ଏକ ଜୀବନ୍ତ ଉଦାହରଣ। ୪ ବର୍ଷ ତଳେ ଏଲ୍ଏସିରେ ଚୀନ୍ ସହ ବିବାଦ ଆରମ୍ଭ ହେବା ପରଠାରୁ ଭାରତ ଲଦାଖ ଏବଂ ପଡ଼ୋଶୀ ଅଞ୍ଚଳରେ ନିଜର ଭିତ୍ତିଭୂମି ପ୍ରକଳ୍ପଗୁଡ଼ିକୁ ଅଭୂତପୂର୍ବ ଗତିରେ ଆଗେଇ ନେଇଛି।  

ନବନିର୍ମିତ ରାସ୍ତା, ସୁଡ଼ଙ୍ଗ ଓ ପୋଲ ସହିତ ନ୍ୟୁମା ଏଏଲଜି ଏହି ଭିତ୍ତିଭୂମି ନେଟୱାର୍କର ଏକ ଗୁରୁତ୍ୱପୂର୍ଣ୍ଣ ଅଂଶ। ସୀମାବର୍ତ୍ତୀ ଅଞ୍ଚଳରେ ଉନ୍ନତ ଭିତ୍ତିଭୂମି ରହିବା ଦ୍ୱାରା ପ୍ରତିକୂଳ ପରିସ୍ଥିତିରେ ଭାରତର ପ୍ରତିକ୍ରିୟା କ୍ଷମତା ବୃଦ୍ଧି ପାଇବ ଏବଂ ସେନାକୁ ଲଜିଷ୍ଟିକ୍ ଇତ୍ୟାଦି ପହଞ୍ଚାଇବା ସହଜ ହେବ। 

ଭାରତ ଓ ଚୀନ୍ ଦୁଇଟି ବିବାଦୀୟ ଅଞ୍ଚଳ ଡେମଚୋକ୍ ଏବଂ ଡେପସାଙ୍ଗରେ ସେନା ପ୍ରତ୍ୟାହାର ଚୁକ୍ତି ସ୍ୱାକ୍ଷର କରିବା ପରେ ଏହି ଆକାଶମାର୍ଗ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି। ଏହି ଦୁଇ ଅଞ୍ଚଳରୁ ସେନା ପ୍ରତ୍ୟାହାର ପରେ ୨୦୨୦ ଏପ୍ରିଲ ପୂର୍ବରୁ ଭାରତ ଓ ଚୀନର ସୈନିକମାନେ ପୁଣି ଥରେ ସ୍ଥିତିରେ ରହି ପାଟ୍ରୋଲିଂ କରିପାରିବେ। ନ୍ୟୁମା ଏୟାରଫିଲ୍ଡ ଡେମ୍ଚୋକ୍ ଏବଂ ଡେପସାଙ୍ଗର ଅତି ନିକଟରେ ଅବସ୍ଥିତ ।