ଆଜି ଦୀପାବଳି ଅବସରରେ ଦେଶକୁ ଆଶ୍ୱସନା ଦେଲେ ପ୍ରଧାନମନ୍ତ୍ରୀ ମୋଦୀ। ପ୍ରତିଥର ଭଳି ଏଥର ମଧ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ସୈନିକମାନଙ୍କ ସହିତ ଦୀପାବଳି ପାଳନ କରିଛନ୍ତି । ଏଥର, ପ୍ରଧାନମନ୍ତ୍ରୀ ମୋଦି ଗୋଆ ଏବଂ କରୱାର ଉପକୂଳରେ ଅବସ୍ଥିତ INS ବିକ୍ରାନ୍ତକୁ ଦୀପାବଳି ପାଳନ କରିବା ପାଇଁବାଛିଥିଲେ। ସେଠାରେ ସୈନିକମାନଙ୍କୁ ସମ୍ବୋଧିତ କରି ମୋଦି କହିଛନ୍ତି ଯେ, ଭାରତୀୟ ସ୍ଥଳସେନା, ବାୟୁସେନା ଏବଂ ଭାରତୀୟ ନୌସେନା ମଧ୍ୟରେ ସମନ୍ବୟ ପାକିସ୍ତାନକୁ ଅପରେଶନ ସିନ୍ଦୂରରେ ଆତ୍ମସମର୍ପଣ କରିବାକୁ ବାଧ୍ୟ କରିଥିଲା। ଯେଉଁମାନଙ୍କ ପାଖରେ ନିଜ ଦମରେ ଲଢ଼ିବାର ସାହସ ଅଛି ସେମାନେ ସର୍ବଦା ଶ୍ରେଷ୍ଠ। ଅପରେଶନ ସିନ୍ଦୂରରେ ତିନୋଟି ବାହିନୀର ଅଂଶଗ୍ରହଣ ପ୍ରମାଣିତ କଲା ଯେ ଆମର ସେନା ସବୁଠାରୁ ଶକ୍ତିଶାଳୀ, ଏବଂ ଆମର ସାହସୀ। ଯେତେବେଳେ ଶତ୍ରୁ ଉପସ୍ଥିତ ଥାଏ ଏବଂ ଯୁଦ୍ଧର ବିପଦ ଥାଏ, ଯେଉଁମାନେ ନିଜ ଦମରେ ଲଢ଼ିବାର ସାହସ ଥାଆନ୍ତି ସେମାନେ ସର୍ବଦା ଶ୍ରେଷ୍ଠ।

ଏଥିସହ ନୌସେନାକୁ ପ୍ରଶଂସା କରି ମୋଦି କହିଛନ୍ତି, ଆଇଏନଏସ ବିକ୍ରାନ୍ତର ପରାକ୍ରମରେ ଶତ୍ରୁ ଛାନିଆ ହୋଇଛି। ଆଇଏନଏସ ବିକ୍ରାନ୍ତକୁ ଅସୀମ ଶକ୍ତିର ପ୍ରତୀକ ଭାବରେ ବର୍ଣ୍ଣନା କରି କହିଛନ୍ତି, ସମୁଦ୍ରରେ ସୂର୍ଯ୍ୟଙ୍କ କିରଣ ଏବଂ ସୈନିକମାନଙ୍କ ଦ୍ୱାରା ପ୍ରଜ୍ଜ୍ୱଳିତ ଦୀପ ଦୀପାବଳିର ଏକ ବିଶେଷ ଚମକ ସୃଷ୍ଟି କରୁଛି।  ଏଥିସହ ମୋଦି ଆହୁରି ମଧ୍ୟ କହିଛନ୍ତି, ଗତ ୧୧ ବର୍ଷରେ ପ୍ରତିରକ୍ଷା ବିଭାଗର ଉତ୍ପାଦନ ୩ ଗୁଣ ବଢିଛି। ପ୍ରତି ୪୦ ଦିନରେ ଗୋଟିଏ ଯୁଦ୍ଧାସ୍ତ୍ର ନୌସେନାରେ ସାମିଲ ହେଉଛି। ନୌସେନା ପାଇଁ ଆଜି ଭାରତର ସବୁ ଦ୍ୱୀପରେ ତ୍ରିରଙ୍ଗା ଉଡୁଛି। ଏବେ ଭାରତର ସାମରିକ ସାମଗ୍ରୀ କିଣିବା ପାଇଁ ସାରା ବିଶ୍ୱ ଚାହୁଁଛି। ମାଳଦ୍ୱୀପ ହେଉକି ଶ୍ରୀଲଙ୍କା ସହାୟତା ଯୋଗାଇବାରେ ଭାରତର ସ୍ଥାନ ୧ ନମ୍ବର ରହିଛି। ଏଥିସହ ନକ୍ସଲ ମୁକ୍ତ ଭାରତ କଥା କହି ପ୍ରଧାନମନ୍ତ୍ରୀ କହିଛନ୍ତି, ଦେଶ ଏବେ ମାଓବାଦୀଙ୍କ ଆତଙ୍କୀରୁ ମୁକ୍ତି ପାଇଛି। ଦେଶର ଶହେରୁ ଅଧିକ ଜିଲ୍ଲା ମାଓବାଦୀଙ୍କ କବଳରେ ରହିଥିଲା, ହେଲେ ମାଓବାଦୀ ଏବେ ଅସ୍ତ୍ର ଛାଡ଼ି ସମାଜର ମୁଖ୍ୟସ୍ରୋତରେ ସାମିଲ ହେଉଛନ୍ତି। ମାଟିରୁ ମହାକାଶ ପର୍ଯ୍ୟନ୍ତ ବିକାଶରେ ସେନାର ବଡ଼ ଭାଗିଦାରୀ ରହିଛି। ଏବେ ଜଳରୁ ଜମି ପର୍ଯ୍ୟନ୍ତ ସବୁଠି ଗୋଟିଏ ନାରା ଶୁଭୁଛି, ତାହା ହେଉଛି 'ଭାରତ ମାତା କି ଜୟ'। 

ଅଧିକ ପଢନ୍ତୁ: ଭାରତ ବିକଶିତ କରୁଛି ଛୋଟ ପରମାଣୁ ରିଆକ୍ଟର, ଯେକୌଣସି ସ୍ଥାନରେ କରାଯାଇପାରିବ ସ୍ଥାପନ