ଗାଜିଆବାଦ: ଲୋନି ସଦର ଥାନା ଅଞ୍ଚଳର କାଞ୍ଚନ ପାର୍କ କଲୋନିର ଏକ ତିନି ମହଲା କୋଠାରେ ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡରେ ତୃତୀୟ ମହଲାର ଜଣେ ମହିଳା ଓ ୩ ଜଣ ଶିଶୁଙ୍କ ମୃତ୍ୟୁ ଘଟିଛି। ଘଟଣାସ୍ଥଳରେ ପହଞ୍ଚିଥିବା ଅଗ୍ନିଶମ ବାହିନୀ କାନ୍ଥ ଭାଙ୍ଗି ଗୁରୁତର ଆହତ ମହିଳା ଓ ୩ ଜଣ ଶିଶୁଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିବା ବେଳେ ସେଠାରେ ଡାକ୍ତର ଚାରିଜଣଙ୍କୁ ମୃତ ଘୋଷଣା କରିଥିଲେ। ସର୍ଟସର୍କିଟ ଯୋଗୁଁ ଅଗ୍ନିକାଣ୍ଡ ଘଟିଥିବା ସନ୍ଦେହ କରାଯାଉଛି। ଏବେ ନିଆଁକୁ ସମ୍ପୂର୍ଣ୍ଣ ଆୟତ୍ତ କରାଯାଇଛି। 

ତିନି ମହଲା କୋଠାରେ ନିଆଁ ବ୍ୟାପିଯାଇଥିଲା। ରବିବାର ସକାଳ ପ୍ରାୟ ସାତଟା ବେଳେ କଞ୍ଚନ ପାର୍କ ଛକ ସ୍ଥିତ ଆବାସିକ ଅଞ୍ଚଳରେ ଥିବା ଏକ ତିନି ମହଲା କୋଠାରେ ନିଆଁ ଲାଗିଥିବା ନେଇ ଲୋନି ପୁଲିସକୁ ଖବର ମିଳିଥିଲା। ସଙ୍ଗେ ସଙ୍ଗେ ଲୋନି ପୁଲିସ ଓ ଲୋନି ଅଗ୍ନିଶମ କେନ୍ଦ୍ରର ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚିଥିଲେ। ଅଗ୍ନିଶମ କର୍ମଚାରୀମାନେ ଦେଖିଲେ ଯେ ନିଆଁ ତିନି ମହଲା କୋଠାରେ ବ୍ୟାପି ଯାଇଛି। ଏହାପରେ ସେମାନେ ତୁରନ୍ତ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ।

ଘଟଣାସ୍ଥଳରେ ମୁଖ୍ୟ ଅଗ୍ନିଶମ ଅଧିକାରୀ ମଧ୍ୟ ପହଞ୍ଚିଥିଲେ। ପ୍ରାୟ ୫୦୦ ମିଟର ହୋସ୍ ପାଇପ୍ ବିଛାଇ ନିଆଁ ଲିଭାଇବା କାର୍ଯ୍ୟ ଆରମ୍ଭ ହୋଇଥିଲା। ନିକଟସ୍ଥ ଘରୁ ତିନି ମହଲା କୋଠାର ଛାତ ନିକଟରେ ପହଞ୍ଚି କାନ୍ଥ ଭାଙ୍ଗି ଦିଆଯାଇଥିଲା। ଶାହା ନୱାଜଙ୍କ ପତ୍ନୀ ଗୁଲବାହାର ନାମକ ଜଣେ ମହିଳା ଓ ପ୍ରାୟ ୯ ବର୍ଷର ସନ୍ତାନ ଜାନ, ପ୍ରାୟ ୬ ବର୍ଷର ଶାନ୍ ଏବଂ ପ୍ରାୟ ୯ ବର୍ଷର ଶମଶାଦଙ୍କ ପୁଅ ଜିଶାନ୍‌ଙ୍କ ମୃତ୍ୟୁ ଘଟିଛି। 

ମୁଖ୍ୟ ଅଗ୍ନିଶମ ଅଧିକାରୀ ରାହୁଲ ପାଲ କହିଛନ୍ତି ଯେ ଘରେ ଅଗ୍ନିକାଣ୍ଡ ସମୟରେ ପ୍ରବେଶ ପଥ ନଥିଲା। ନିଆଁ ଲିଭାଇବା ପାଇଁ ବହୁ ପରିଶ୍ରମ କରିବାକୁ ପଡ଼ିଥିଲା। ସେମାନେ ପଡ଼ୋଶୀ ଘରୁ ତୃତୀୟ ମହଲାରେ ପହଞ୍ଚିଥିଲେ। ଘର ଭିତରେ ଫସି ରହିଥିବା ଲୋକଙ୍କୁ କାନ୍ଥ ଭାଙ୍ଗି ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ଅଗ୍ନିକାଣ୍ଡର କାରଣ ସର୍ଟସର୍କିଟ ବୋଲି ପ୍ରାଥମିକ ତଦନ୍ତରୁ ଜଣାପଡ଼ିଛି।