ନୂଆଦିଲ୍ଲୀ: ପଂଜାବ, ହରିୟାଣା ଓ ଦିଲ୍ଲୀ ସମେତ ଉତ୍ତର ଭାରତରେ ପ୍ରବଳ ବର୍ଷା ତାଣ୍ଡବ ରଚିଛି। ଦିଲ୍ଲୀବାସୀଙ୍କୁ ବର୍ଷା ଡରାଉଛି। ରାଷ୍ଟ୍ରୀୟ ରାଜଧାନୀରେ ବନ୍ୟା ଆଶଙ୍କା ସୃଷ୍ଟି ହୋଇଛି। ହଥନି କୁଣ୍ଡ ବ୍ୟାରେଜରୁ ଛଡାଯାଇଥିବା ପାଣି ଯୋଗୁଁ, ଦିଲ୍ଲୀ ଏନସିଆରର ଅନେକ ଅଞ୍ଚଳରେ ବନ୍ୟା ସଙ୍କଟ ଆହୁରି ଘନିଷ୍ଠ ହୋଇଛି। ଯମୁନା ନଦୀରେ ଜଳସ୍ତର ବୃଦ୍ଧି ପାଇବା ଯୋଗୁଁ ଆଜି ସନ୍ଧ୍ୟାରେ ପୁରୁଣା ଲୋହା ପୁଲ ବନ୍ଦ ରହିବ। ପ୍ରଶାସନ ଲୋକମାନଙ୍କୁ ସତର୍କତାର ସହ ଘରୁ ବାହାରିବାକୁ ପରାମର୍ଶ ଦେଇଛି। 

ଅନ୍ୟପକ୍ଷରେ ସୋମବାର ବର୍ଷା ଯୋଗୁଁ ଦିଲ୍ଲୀ ସଂଲଗ୍ନ ଗୁରୁଗ୍ରାମର ରାସ୍ତାଗୁଡ଼ିକ ପୋଖରୀ ଭଳି ଭ୍ରମ ସୃଷ୍ଟି କରିଥିଲା। ଦିଲ୍ଲୀ-ଜୟପୁର ରାଜପଥରେ ୧୮ କିଲୋମିଟରରୁ ଅଧିକ ଜାମ୍ ହୋଇଥିଲା। ପ୍ରବଳ ବର୍ଷାକୁ ଦୃଷ୍ଟିରେ ରଖି ପ୍ରଶାସନ ଏକ ପରାମର୍ଶ ଜାରି କରିଛି।

ଜିଲ୍ଲା ବିପର୍ଯ୍ୟୟ ପରିଚାଳନା ପ୍ରାଧିକରଣର ଅଧ୍ୟକ୍ଷ ଅଜୟ କୁମାର ଗୁରୁଗ୍ରାମର ସମସ୍ତ କର୍ପୋରେଟ୍ ଏବଂ ଘରୋଇ କାର୍ଯ୍ୟାଳୟକୁ କର୍ମଚାରୀମାନଙ୍କୁ ଘରୁ କାମ ସୁବିଧା ଯୋଗାଇବାକୁ ଅନୁରୋଧ କରିଛନ୍ତି। ଏହା ସହିତ ସେପ୍ଟେମ୍ବର ୨ରେ ସମସ୍ତ ସ୍କୁଲକୁ ଅନଲାଇନ୍ କ୍ଲାସ ବ୍ୟବସ୍ଥା କରିବା ପାଇଁ ନିର୍ଦ୍ଦେଶ ଦିଆଯାଇଛି।

ଯେକୌଣସି ପରିସ୍ଥିତିର ମୁକାବିଲା ପାଇଁ ବ୍ୟାପକ ପ୍ରସ୍ତୁତି ପୂର୍ବରୁ କରାଯାଇଛି। ସରକାର ନାଗରିକମାନଙ୍କୁ ସୁରକ୍ଷା ଦେବାକୁ ପ୍ରସ୍ତୁତ। ପ୍ରତି ଘଣ୍ଟା ରିପୋର୍ଟ ଗ୍ରହଣ କରାଯାଉଛି ଏବଂ ପରିସ୍ଥିତି ବର୍ତ୍ତମାନ ନିୟନ୍ତ୍ରଣରେ ଅଛି। ବନ୍ୟାଜନିତ କୌଣସି ସମସ୍ୟା ଉପୁଜିଲେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। 

-ରେଖା ଗୁପ୍ତା, ମୁଖ୍ୟମନ୍ତ୍ରୀ

ଆଜି ଯମୁନା ନଦୀର ଜଳସ୍ତର ୨୦୬ ମିଟରରେ ପହଞ୍ଚିବାର ଆଶଙ୍କା ଦେଖାଯାଇଛି। ସକାଳ ସାତଟା ପର୍ଯ୍ୟନ୍ତ ଜଳସ୍ତର ୨୦୫.୭୫ ମିଟର। ଏହା ୨୦୬ରୁ ଅଧିକ ହେବା ମାତ୍ରେ, ପୁରୁଣା ଲୋହା ପୁଲ ଉପରେ ଯାନବାହାନ ଚଳାଚଳ ବନ୍ଦ କରାଯିବ। ଜିଲ୍ଲା ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ ଶାହଦରା ମଙ୍ଗଳବାର ସନ୍ଧ୍ୟା ୫ଟାରୁ ରେଳ ଲୋହା ପୁଲକୁ ବନ୍ଦ କରିବାକୁ ନିର୍ଦ୍ଦେଶ ଦେଇଛନ୍ତି।

ଅଧିକ ପଢ଼ନ୍ତୁ: ବର୍ଷା, ଭୂସ୍ଖଳନରେ ୨୦୦୦ ଲୋକଙ୍କର ମୃତ୍ୟୁ