ନୂଆଦିଲ୍ଲୀ: ଦେଶରେ ଖୁବ ଶୀଘ୍ର  ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ହୋଇପାରେ। ସୂତ୍ର ଅନୁଯାୟୀ ସରକାର ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି କରିପାରନ୍ତି। ଏ ପର୍ଯ୍ୟନ୍ତ ସରକାରୀ ସ୍ତରରେ କୌଣସି ଘୋଷଣା କରାଯାଇନାହିଁ । ମାତ୍ର ସରକାର ଦେଶବ୍ୟାପୀ ୧ ମେ, ୨୦୨୬ ରୁ ୧୯ କିଲୋଗ୍ରାମର ବାଣିଜ୍ୟିକ ଏଲପିଜି ସିଲିଣ୍ଡରର ମୂଲ୍ୟରେ ଯଥେଷ୍ଟ ବୃଦ୍ଧି କରିଛନ୍ତି, ଯାହା ଦିଲ୍ଲୀରେ ୯୯୩ ବୃଦ୍ଧି ପାଇ ୩,୦୭୧.୫୦ ଟଙ୍କାରେ ପହଞ୍ଚିଛି । ଏଲପିଜି ସିିଲିଣ୍ଡର ଦାମ ବଢିବା ପରେ ଏବେ ପେଟ୍ରୋଲ-ଡିଜେଲ୍ ଦର ବଢିବା ନେଇ ଆଶଙ୍କା ବଢି ଯାଇଛି । 

ସରକାରୀ ସୂତ୍ର ଅନୁଯାୟୀ, ଅଶୋଧିତ ତୈଳର ମୂଲ୍ୟ ବୃଦ୍ଧି ପାଇବା ସହିତ ତୈଳ କମ୍ପାନୀଗୁଡ଼ିକ ଯଥେଷ୍ଟ କ୍ଷତି ସହୁଛନ୍ତି। ଆମେରିକା-ଇରାନ ଯୁଦ୍ଧ ଯୋଗୁଁ, ପ୍ରତି ବ୍ୟାରେଲ ଅଶୋଧିତ ତୈଳର ମୂଲ୍ୟ ୧୧୦ ଡଲାରରୁ ଅଧିକ ହୋଇଛି। ତଥାପି ତୈଳ କମ୍ପାନୀଗୁଡ଼ିକ ଭାରତୀୟ ବଜାରର ଚାହିଦା ମେଣ୍ଟାଇବା ପାଇଁ ଅନ୍ତର୍ଜାତୀୟ ବଜାରରୁ ଅଧିକ ମହଙ୍ଗା ତେଲ କିଣିବାକୁ ବାଧ୍ୟ ହେଉଛନ୍ତି। ଏହା ବ୍ୟତୀତ, ଅନେକ ଦେଶରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ପାଇସାରିଛି। ଏହାକୁ ଦୃଷ୍ଟିରେ ରଖି ପେଟ୍ରୋଲ ଏବଂ ଡିଜେଲର ମୂଲ୍ୟ ଶୀଘ୍ର ବୃଦ୍ଧି ପାଇପାରେ। ତଥାପି, ମୂଲ୍ୟ ବୃଦ୍ଧିର ସଠିକ ପରିମାଣ ସ୍ପଷ୍ଟ ଜଣା ପଡିନି ।

ଅନ୍ୟପକ୍ଷରେ କେନ୍ଦ୍ର ପେଟ୍ରୋଲିୟମ୍ ମନ୍ତ୍ରୀ ହରଦୀପ ସିଂହ ପୁରୀ କହିଛନ୍ତି ଯେ ବିଶ୍ୱ ବଜାରରେ ଅଶୋଧିତ ତୈଳ ମୂଲ୍ୟରେ ବଡ଼ ଧରଣର ପରିବର୍ତ୍ତନ ସତ୍ତ୍ୱେ, ଭାରତରେ ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି ପାଇନାହିଁ। ଗତ ଚାରି ବର୍ଷ ହେବ ଦେଶରେ ତୈଳ ଦର ସ୍ଥିର ରହିଛି ଭାରତ ବୈଶ୍ୱିକ ଅସ୍ଥିରତାର ଆର୍ଥିକ ଆତଙ୍କକୁ ନୀତି ନିର୍ଦ୍ଦେଶ କରିବାକୁ ଦେଇନାହିଁ। ଦେଶର ରୋଷେଇ ଘରକୁ ଇନ୍ଧନ ଯୋଗାଣ ବାଧାପ୍ରାପ୍ତ ହୋଇନାହିଁ। ପେଟ୍ରୋଲ ଏବଂ ଡିଜେଲ ମୂଲ୍ୟ ବୃଦ୍ଧି ପାଇନାହିଁ। 

ତେବେ ସରକାର ତୈଳ ଦର ବୃଦ୍ଧି ପ୍ରଶ୍ନକୁ ମଧ୍ୟ ଏଡାଇ ପାରି ନାହାନ୍ତି । ଫଳରେ ଆଗାମୀ ଦିନରେ ଶୀଘ୍ର ପେଟ୍ରୋଲ-ଡିଜେଲ ବୃଦ୍ଧି ସମ୍ଭାବନାକୁ ଏଡାଇ ଦିଆଯାଇ ନ ପାରେ । ଏମିତି ହେଲେ ଦେଶର ମଧ୍ୟବିତ୍ତ ବର୍ଗଙ୍କ ପାଇଁ ଏହା ବିଡା ଉପରେ ନଳିତା ବିଡା ସଦୃଶ ହୋଇପାରେ । କାରଣ ପେଟ୍ରୋଲ-ଡିଜେଲ୍ ଦର ବଢିଲେ ଅନ୍ୟ ଅତ୍ୟାବଶ୍ୟକ ସାମଗ୍ରୀର ଦର ବଢିବା ନିଶ୍ଚିତ । କାରଣ ପେଟ୍ରୋଲ-ଡିଜେଲ ବୃଦ୍ଧିର ପ୍ରଭାବ ସିଧାସଳଖ ପରିବହନ ଉପରେ ପଡିଥାଏ । ତେଣୁ ପରିବହନ ହେଉଥିବା ନିତ୍ୟବ ବ୍ୟବହାର୍ଯ୍ୟ ସାମଗ୍ରୀର ଦାମ ବଢିବା ନିଶ୍ଚିତ ରୂପେ ଲୋକଙ୍କୁ ବେଶ ବାଧିପାରେ ।