'ଅପରେସନ୍ ଗ୍ଲୋବାଲ୍ ହଣ୍ଟ୍' ମାଧ୍ୟମରେ ଭାରତୀୟ ଏଜେନ୍ସିଗୁଡ଼ିକ ବିଦେଶରେ ଲୁଚି ରହିଥିବା ପଳାତକ ମାଫିଆ, ଡ୍ରଗ୍ସ ଚୋରା ଚାଲାଣକାରୀ ଏବଂ ଗ୍ୟାଙ୍ଗଷ୍ଟରମାନଙ୍କୁ ଧରିବା ପାଇଁ ଏକ ଆନ୍ତର୍ଜାତୀୟ ଅଭିଯାନ ଚଳାଉଛନ୍ତି। NCB, CBI, ED ଏବଂ NIA ଏହି ମିଶନରେ ଇଣ୍ଟରପୋଲ୍ ସହିତ ମିଶି କାର୍ଯ୍ୟ କରୁଛନ୍ତି। ଏହାର ମୁଖ୍ୟ ଲକ୍ଷ୍ୟ ହେଉଛି ଆନ୍ତର୍ଜାତୀୟ ଡ୍ରଗ୍ସ ସିଣ୍ଡିକେଟ୍, ସାଇବର ଏବଂ ଆର୍ଥିକ ଅପରାଧୀଙ୍କୁ ଭାରତ ଫେରାଇ ଆଣିବା।

ଭାରତରେ ଅପରାଧ କରି ବିଦେଶକୁ ଖସି ଯାଇଥିବା ପ୍ରାୟ ୧୦୦ ଜଣ ପଳାତକ ଅପରାଧୀଙ୍କୁ ଏହି ଅପରେସନ୍ ମାଧ୍ୟମରେ ଟାର୍ଗେଟ୍ କରାଯାଇଛି। ସୂତ୍ର ଅନୁଯାୟୀ, ଅପରାଧୀଙ୍କ ଠିକଣା ଖୋଜିବା ପାଇଁ ଇଣ୍ଟରପୋଲ୍ ଜରିଆରେ ‘ସିଲଭର ନୋଟିସ୍’ (Silver Notice) ବ୍ୟବହାର କରାଯାଉଛି। ଭାରତୀୟ ଏଜେନ୍ସିଗୁଡ଼ିକ ଏବେ କେବଳ ପ୍ରତ୍ୟର୍ପଣ ପ୍ରକ୍ରିୟା ଉପରେ ନିର୍ଭର ନକରି, ବିଶେଷ ବିମାନ ଯୋଗେ ଅଭିଯୁକ୍ତଙ୍କୁ ସିଧାସଳଖ ଭାରତ ଆଣିବାକୁ ପ୍ରସ୍ତୁତି ଚଳାଇଛନ୍ତି।

ଡ୍ରଗ୍ସ, ସାଇବର ଏବଂ ଆର୍ଥିକ ଅପରାଧୀଙ୍କ ଉପରେ ଫୋକସ୍:

ଏହି ଅଭିଯାନର ମୁଖ୍ୟ ନିଶାନା ହେଉଛନ୍ତି ସେହି ଅପରାଧୀ, ଯେଉଁମାନେ ବିଦେଶରେ ବସି ଭାରତରେ ଡ୍ରଗ୍ସ ସପ୍ଲାଏ ଏବଂ ସଂଗଠିତ ଅପରାଧ ଚଳାଉଛନ୍ତି। ନିକଟରେ ଦାଉଦ୍ ଇବ୍ରାହିମର ନିକଟତର ସଲିମ୍ ଡୋଲାକୁ ତୁର୍କୀର ଇସ୍ତାନବୁଲରୁ ଡିପୋର୍ଟ କରାଯାଇ ଭାରତ ଅଣାଯାଇଛି।

ଏଜେନ୍ସିଗୁଡ଼ିକର ରାଡାର୍‌ରେ ଥିବା କିଛି ବଡ଼ ନାମ:

• ଆସିଫ୍ ଇକବାଲ୍ ମେମନ୍

• ହାଜରା ଇକବାଲ୍ ମେମନ୍

• ଜୁନୈଦ୍ ଇକବାଲ୍ ମେମନ୍

• ହରମିତ ସିଂହ ଓ ପ୍ରଦୀପ ସିଂହ

• ପରମଜିତ ଢାଲିୱାଲ୍

• ସନି ଗୋସଲଭିସ୍

• ଜସବିନ୍ଦର ସିଂହ (ଜୈଜ୍)

• ଟିସନ ବିଷ୍ଣୋଇ

• ହାଜୀ ସଲିମ୍ (ଡ୍ରଗ୍ ମାଫିଆ)

• ସନ୍ଦୀପ ଧୁନିଆ

ଆଣ୍ଟି-ନାର୍କୋଟିକ୍ସ ଅଭିଯାନର ପରିସଂଖ୍ୟାନ:

ସରକାରୀ ତଥ୍ୟ ଅନୁଯାୟୀ, ୨୦୨୫ ମସିହାରେ ପ୍ରାୟ ୧.୩୩ ଲକ୍ଷ କିଲୋଗ୍ରାମ ଡ୍ରଗ୍ସ ଜବତ କରାଯାଇଛି, ଯାହାର ମୂଲ୍ୟ ପ୍ରାୟ ୨୦୦୦ କୋଟି ଟଙ୍କା। ଏଥିସହ ୭୭ ହଜାର କିଲୋଗ୍ରାମ ଡ୍ରଗ୍ସ ନଷ୍ଟ କରାଯାଇଛି। ଏପର୍ଯ୍ୟନ୍ତ ୫ ଜଣ ପଳାତକଙ୍କୁ ଭାରତ ଫେରାଇ ଆଣିବାରେ ସଫଳତା ମିଳିଛି। ଆଗାମୀ ଦିନରେ ‘ଅପରେସନ୍ ଗ୍ଲୋବାଲ୍ ହଣ୍ଟ୍’ ଅଧୀନରେ ଆହୁରି ଅନେକ ଗିରଫଦାରୀ ହେବାର ସମ୍ଭାବନା ରହିଛି।