ନୂଆଦିଲ୍ଲୀ: ଗତ ଏକ ଦଶନ୍ଧି ମଧ୍ୟରେ ଭାରତର ଅର୍ଥନୈତିକ ଏବଂ ସାମାଜିକ ସ୍ଥିତିରେ ଏକ ବଡ଼ ପରିବର୍ତ୍ତନ ଦେଖିବାକୁ ମିଳିଛି। ନୀତି ଆୟୋଗଙ୍କ ତଥ୍ୟ ଅନୁଯାୟୀ,  ୨୦୧୪ରୁ ୨୦୨୬ ମଧ୍ୟରେ ଦେଶର ପ୍ରାୟ ୨୫ କୋଟିରୁ ଅଧିକ ଲୋକ ଦାରିଦ୍ର‌୍ୟ ସୀମାରେଖାରୁ ବାହାରକୁ ଆସିବାରେ ସଫଳ ହେଲେଣି। ପ୍ୟାରିସ୍‌ରେ ପ୍ରବାସୀ ଭାରତୀୟ ସମୁଦାୟକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଭାରତର ଏହି ସଫଳତା ଉପରେ ଜୋର୍ ଦେଇଛନ୍ତି। ତେବେ ଏତେ ସଂଖ୍ୟକ ଲୋକ ଗରିବୀରୁ ମୁକ୍ତ ହେବା ପରେ, ବର୍ତ୍ତମାନ ଦେଶରେ କେତେ ଲୋକଙ୍କ ପାଖରେ ବିପିଏଲ୍ କାର୍ଡ ରହିଛି ଏବଂ କେତେ ଲୋକ ସରକାରଙ୍କ ଖାଦ୍ୟ ସୁରକ୍ଷା ଯୋଜନାର ଲାଭ ଉଠାଉଛନ୍ତି, ଆସନ୍ତୁ ଜାଣିବା।

ବହୁମୁଖୀ ଗରିବୀକୁ କେବଳ ପରିବାରର ରୋଜଗାର କିମ୍ବା ଆୟ ଆଧାରରେ ମପାଯାଏ ନାହିଁ। ଏଥିପାଇଁ ଶିକ୍ଷା, ସ୍ୱାସ୍ଥ୍ୟ ସେବା, ବାସଗୃହ, ପରିମଳ, ବିଦ୍ୟୁତ, ପୁଷ୍ଟିସାଧନ ଏବଂ ଅନ୍ୟାନ୍ୟ ମୌଳିକ ଆବଶ୍ୟକତାକୁ ମଧ୍ୟ ବିଚାରକୁ ନିଆଯାଏ। ଏହି ସବୁ କ୍ଷେତ୍ରରେ ସରକାରୀ ଯୋଜନାର ସଫଳ ରୂପାୟନ ଯୋଗୁଁ ଲକ୍ଷ ଲକ୍ଷ ପରିବାରର ଜୀବନଧାରଣ ମାନରେ ସୁଧାର ଆସିଛି।

ଏବେ କେତେ ଲୋକ ପାଉଛନ୍ତି ରାସନ ସାମଗ୍ରୀ ?

ଦେଶରେ ଗରିବୀ ହ୍ରାସ ପାଇଥିଲେ ମଧ୍ୟ ଜନସଂଖ୍ୟାର ଏକ ବଡ଼ ଭାଗ ଏବେ ବି ସରକାରୀ ରାସନ ଉପରେ ନିର୍ଭରଶୀଳ। କେନ୍ଦ୍ରୀୟ ଖାଦ୍ୟ ମନ୍ତ୍ରଣାଳୟର ସଦ୍ୟତମ ତଥ୍ୟ ଅନୁଯାୟୀ, ସାରା ଦେଶରେ ପ୍ରାୟ ୭୯ କୋଟି ଲୋକ ଜନସାଧାରଣ ବଣ୍ଟନ ପ୍ରଣାଳୀ (PDS) ବା ରାସନ କାର୍ଡ ମାଧ୍ୟମରେ ସରକାରଙ୍କ ବିଭିନ୍ନ କଲ୍ୟାଣକାରୀ ଯୋଜନାରେ ମାଗଣା କିମ୍ବା ସବ୍‌ସିଡିଯୁକ୍ତ ଖାଦ୍ୟଶସ୍ୟ ପାଉଛନ୍ତି।

ଅଯୋଗ୍ୟ ହିତାଧିକାରୀଙ୍କ କାର୍ଡ ବାତିଲ୍

ଖାଦ୍ୟ ସୁରକ୍ଷା ଯୋଜନାରେ ସ୍ୱଚ୍ଛତା ଆଣିବା ଏବଂ କେବଳ ପ୍ରକୃତ ଯୋଗ୍ୟ ପରିବାର ନିକଟରେ ସାହାଯ୍ୟ ପହଞ୍ଚାଇବା ପାଇଁ ସରକାର ଏକ ବଡ଼ ଧରଣର ଯାଞ୍ଚ ଏବଂ ଡିଜିଟାଲାଇଜେସନ୍ ଅଭିଯାନ ଆରମ୍ଭ କରିଥିଲେ। ଏହି ପ୍ରକ୍ରିୟା ମାଧ୍ୟମରେ ଦେଶରେ ପ୍ରାୟ ୨.୨୧ କୋଟି ଅଯୋଗ୍ୟ ରାସନ କାର୍ଡକୁ ରଦ୍ଦ କରାଯାଇଛି। ଏଥିମଧ୍ୟରେ ମୃତ ବ୍ୟକ୍ତି, ଆୟକରଦାତା, ନକଲି ହିତାଧିକାରୀ ଏବଂ ଅଧିକ ଆୟ କରୁଥିବା ପରିବାର ସାମିଲ ଥିଲେ।