ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ ବିଜେପି ପ୍ରଥମ ପ୍ରାର୍ଥୀ ତାଲିକା ଜାରି କରିଛି । ଏଥିରେ ୨୯ ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯାଇଛି । ବିଜେପି ଆମ୍ ଆଦମୀ ପାର୍ଟିର ସଂଯୋଜକ ଅରବିନ୍ଦ କେଜ୍ରିୱାଲଙ୍କୁ ଘେରିବା ପାଇଁ ପୂର୍ବତନ ସାଂସଦ ପ୍ରବେଶ ବର୍ମାଙ୍କୁ ନୂଆଦିଲ୍ଲୀ ବିଧାନସଭା ସିଟରେ ପ୍ରାର୍ଥୀ କରାଯାଇଛି । କାଲକାଜି ସିଟରେ ଆତିଶିଙ୍କୁ ଟକ୍କର ଦେବା ପାଇଁ ରମେଶ ବିଘୁଡିଙ୍କୁ ଟିକେଟ୍ ଦିଆଯାଇଛି । 

ଏହା ବ୍ୟତୀତ କଂଗ୍ରେସରୁ ଆସିଥିବା ଅରବିନ୍ଦର ସିଂ ଲଭଲିଙ୍କୁ ଗାନ୍ଧିନଗରରୁ ଟିକେଟ୍ ମିଳିଛି । ମଙ୍ଗୋଲ ପୁରୀରୁ ରାଜକୁମାର ଚୌହ୍ୱାନଙ୍କୁ ପ୍ରାର୍ଥୀ କରାଯାଇଛି । ଜଙ୍ଗପୁରା ଆସନରେ ପୂର୍ବତନ ଉପମୁଖ୍ୟମନ୍ତ୍ରୀ ମନୀଷ ସିସୋଦିଆଙ୍କ ବିରୋଧରେ ବିଜେପି ସର୍ଦ୍ଦାର ତରବିନ୍ଦର ସିଂ ମାରୱାହଙ୍କୁ ପ୍ରାର୍ଥୀ କରାଯାଇଛି । ବିଶେଷ କରି ଅନ୍ୟ ଦଳରେ ବିଦ୍ରୋହ କରି ବିଜେପିରେ ସାମିଲ ନେତାଙ୍କୁ ମଧ୍ୟ ପାର୍ଟି ହାଇକମାଣ୍ଡ ନିରାଶ କରି ନାହାନ୍ତି । ଉକ୍ତ ଆଶାୟୀ ପ୍ରାର୍ଥୀଙ୍କୁ ମଧ୍ୟ ଟିକେଟ୍ ମିଳିଛି । ଏଥିରେ କରତାର ସିଂ ତନୱର, ରାଜକୁମାର ଚୌହ୍ୱାନ, କୈଳାଶ ଗେହଲଟ ଓ ଅରବିନ୍ଦର ସିଂ ଲଭଲି ସାମିଲ ।

ବିଜେପି ପ୍ରଥମ ତାଲିକାରେ ଘୋଷଣା କରିଥିବା ୨୯ ଜଣଙ୍କ ପ୍ରାର୍ଥୀଙ୍କ ମଧ୍ୟରେ ଦୁଇ ଜଣ ମହିଳା ପ୍ରାର୍ଥୀ ଅଛନ୍ତି । ଶାଳିନଗର ବାଗରୁ ରେଖା ଗୁପ୍ତା ଏବଂ ସୀମାପୁରୀ ଏସସି ସିଟରୁ କୁମାରୀ ରିଙ୍କୁ ପ୍ରାର୍ଥୀ କରାଯାଇଛି ।