ପ୍ରତିବାଦରୁ ଓହରିଲେ ରାଜ୍ୟସଭାରୁ ନିଲମ୍ବିତ ହୋଇଥିବା ୮ଜଣ ସାଂସଦ
Khabar Odisha:8-MPs-suspended-from-Rajya-Sabha-have-ended-their-protests-in-Parliament
ନୂଆଦିଲ୍ଲୀ, ସେପ୍ଟେମ୍ବର ୨୨ (ଖବର ଓଡ଼ିଶା):

ରାଜ୍ୟସଭାରୁ ନିଲମ୍ବିତ ହୋଇଥିବା ୮ଜଣ ଯାକ ସାଂସଦ ସଂସଦ ପରିସରରେ ଚଳାଇଥିବା ପ୍ରତିବାଦ ଶେଷ କରିଛନ୍ତି। କଂଗ୍ରେସ, ସିପିଆଇଏମ୍‍, ଟିଏମସି ଓ ଆମ୍‍ ଆଦ୍‍ମୀ ପାର୍ଟିର ନିଲମ୍ବିତ ସାଂସଦମାନେ ଗତକାଲିଠାରୁ ଧାରଣାରେ ବସିଥିଲେ। ସେମାନେ ରାଜ୍ୟସଭାରେ ହଟ୍ଟଗୋଳ କରିଥିବାରୁ ସେମାନଙ୍କୁ ସମଗ୍ର ବର୍ଷାକାଳୀନ ଅଧିବେଶନ ପାଇଁ ସଭାରୁ ନିଲମ୍ବନ କରାଯାଇଥିଲା।

ଆଜି ସକାଳେ ରାଜ୍ୟସଭାର କାର୍ଯ୍ୟଧାରା ଆରମ୍ଭ ହେବା ସମୟରେ ବିରୋଧୀଦଳ ନେତା ଗୁଲାମ ନବୀ ଆଜାଦ ସେମାନଙ୍କର ନିଲମ୍ବନ ପ୍ରତ୍ୟାହାର ନ ହେବା ପର୍ଯ୍ୟନ୍ତ ସେମାନେ ରାଜ୍ୟସଭା କାର୍ଯ୍ୟଧାରାକୁ ବର୍ଜନ କରିବେ ବୋଲି ଘୋଷଣା କରିଥିଲେ। ପରେ କଂଗ୍ରେସ, ବାମପନ୍ଥୀ ଦଳ, ଟିଏମସି, ଡିଏମକେ, ଏସପି, ଆରଜେଡି, ଆମ୍‍ ଆଦ୍‍ମୀ ପାର୍ଟି ଓ ଅନ୍ୟ ଦଳଗୁଡ଼ିକର ସଦସ୍ୟମାନେ କିଛି ସମୟ ପାଇଁ ସଂସଦ ପରିସରସ୍ଥିତ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ସମ୍ମୁଖରେ ସେମାନଙ୍କ ସହ ବିକ୍ଷୋଭ ପ୍ରଦର୍ଶନରେ ସାମିଲ ହୋଇଥିଲେ।

ପୂର୍ବରୁ ଉପାଧ୍ୟକ୍ଷ ହରିବଂଶ ବିକ୍ଷୋଭ ପ୍ରଦର୍ଶନକାରୀ ସାଂସଦମାନଙ୍କୁ ଭେଟି ସେମାନଙ୍କୁ ଚା' ଅର୍ପଣ କରିଥିଲେ। ଗତକାଲି ସେହି ୮ଜଣ ସାଂସଦଙ୍କୁ ରାଜ୍ୟସଭାରୁ ନିଲମ୍ବନ କରାଯାଇଥିଲା। ସେହି ସାଂସଦମାନଙ୍କ ଭିତରେ କଂଗ୍ରେସର ରାଜୀବ ସତାବ, ରିପୁର୍ନ ବୋରା ଓ ନିଜର ହୁସେନ, ଟିଏମ୍‍ସିର ଡେରେକ୍‍ ଓ'ବ୍ରିଏନ୍‍, ସିପିଆଇଏମ୍‍ର କେ.କେ. ରାଗେଶ ଓ ଏଲାମରମ କରିମ୍‍ ଏବଂ ଆମ୍‍ ଆଦ୍‍ମୀ ପାର୍ଟିର ସଞ୍ଜୟ ସିଂ ଅଛନ୍ତି। 

  • Tags:

Subscribe

National International State Sports Entertainment