ମେହସାଣା: କାମ କରୁ ଥିବାବେଳେ ନିର୍ମାଣଧିନ ପାଚେରି ଭୁଶୁଡ଼ି ୭ ଜଣଙ୍କର ମୃତ୍ୟୁ ହୋଇଛି । ଘଟଣାଟି ଘଟିଛି ଗୁଜୁରାଟ ମେହସାଣା ଜିଲ୍ଲାରେ । ଆହୁରି କିଛି ଶ୍ରମିକ ଫସି ରହିଥିବା ସନ୍ଦେହ କରାଯାଉଥିବାବେଳେ ସେମାନଙ୍କୁ ଉଦ୍ଧାର କରିବାକୁ ଉଦ୍ୟମ ଜାରି ରହିଛି । 

ମେହସାଣା ଜିଲ୍ଲା ମୁଖ୍ୟାଳୟଠାରୁ ପ୍ରାୟ ୩୭ କିଲୋମିଟର ଦୂରରେ ଥିବା କାଡି ସହର ନିକଟରେ ଏକ କାରଖାନାରେ ନିର୍ମାଣ କାର‌୍ୟ୍ୟ ଚାଲିଥିଲା । କାରଖାନା ଅଣ୍ଡରଗ୍ରାଉଣ୍ଡ ଟ୍ୟାଙ୍କ ବସାଇବା ପାଇଁ ଶ୍ରମିକମାନେ ଗାତ ଖୋଳୁଥିଲେ । ଏହି ସମୟରେ ଏକ ପାଚେରୀ ହଠାତ ଭୁଶୁଡ଼ି ପଡ଼ିଥିଲା । ଫଳରେ ସେଠାରେ କାମ କରୁଥିବା କିଛି ଶ୍ରମିକ ଫସି ଯାଇଥିଲା । ଖବର ପାଇ ଉଦ୍ଧାରକାରୀ ଟିମ୍ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ । ଖବର ଲେଖା ହେବା ବେଳକୁ ଘଟଣା ସ୍ଥଳରୁ ୭ ଜଣଙ୍କର ମୃତ ଦେହ ଉଦ୍ଧାର କରାଯାଇଛି । ଆହୁରି କିଛି ଶ୍ରମିକ ଫସି ରହିଥିବା ସନ୍ଦେହ କରାଯାଉଥିବାବେଳେ ସେମାନଙ୍କୁ ଉଦ୍ଧାର କରିବାକୁ ଉଦ୍ୟମ ଜାରି ରହିଛି । ମାତ୍ର କେତେ ଜଣ ଶ୍ରମିକ କାମରେ ନିୟୋଜିତ ଥିଲେ ଜଣା ପଡ଼ି ନ ଥିବାବେଳେ ପୁଲିସ ତଦନ୍ତ କରୁଥିବା ମେହସାଣା ଏସପି କହିଛନ୍ତି ।