ନୂଆଦିଲ୍ଲୀ, ମାର୍ଚ୍ଚ ୮(ଖବର ଓଡ଼ିଶା): ଆଜି ୧୩ରେ ପହଞ୍ଚିଛି ଋଷ – ୟୁକ୍ରେନ୍ ଯୁଦ୍ଧ । ଏହାର ସିଧାସଳଖ ପ୍ରଭାବ ଏବେ ବିଶ୍ୱ ବଜାର ଉପରେ ପଡିବା ଆରମ୍ଭ ହୋଇଛି । ପ୍ରଥମେ ଅଶୋଧିକ ତୈଳ ଦର ବଢିବା ପରେ ଲୋକଙ୍କ ମନରେ ତୈଳ ଦର ବୃଦ୍ଧିକୁ ପଶିଛି ଛନକା । ଯାହାର ପ୍ରଭାବ ଏବେ ସାଧାରଣ ବଜାରରେ ଦେଖିବାକୁ ମିଳୁଛି ।

ତେଲ ଦର ବଢିବା ଭୟରେ ଏବେ ବଜାରରୁ ଖାଇବା ତେଲ ବୋହି ନେଉଛନ୍ତି ଲୋକ । ଯାହା ଫଳରେ ଦୋକାନ ବଜାର ତଥା ବଡ଼ ବଡ଼ ଗ୍ରୋସରୀ ମଲରେ ଏବେ ତେଲର ଅଭାବ ଦେଖାଦେଲାଣି ।

ଏଭଳି ସ୍ଥିତି ଆଉ ମାତ୍ର କିଛି ଦିନ ଲାଗି ରହିଲେ ଖୁବ୍ ଶୀଘ୍ର ଖାଇବା ତେଲ ସଙ୍କଟ ଦେଖାଦେଇପାରେ ବୋଲି ଅନୁମାନ କରାଯାଉଛି ।

ଗତ ଫେବୃଆରୀ ୨୪ ତାରିଖରୁ ୟୁକ୍ରେନ୍ ଓ ଋଷ ମଧ୍ୟରେ ଯୁଦ୍ଧ ଜାରି ରହିଛି । ଏହାର ପ୍ରଭାବରେ ଏବେ କେବଳ ଖାଇବା ତେଲ ନୁହେଁ ପେଟ୍ରୋଲ ଡିଜେଲର ଦର ମଧ୍ୟୂ ବୃଦ୍ଧି ଘଟିବାକୁ ଯାଉଛି ।

ଏହାପରେ ସୁନା ଦର ମଧ୍ୟ ବୃଦ୍ଧି ପାଇବାର ସମ୍ଭାବନା ରହିଛି ଯାହାକୁ ନେଇ ଏବେ ସାଧାରଣ ପରିବାର ଭାଳେଣି ପଡିଛି ।