ନୂଆଦିଲ୍ଲୀ: ଜୁନ ୧୨ ତାରିଖରେ ଅହମ୍ମଦାବାଦରେ ଏୟାର ଇଣ୍ଡିଆ ବିମାନ ଦୁର୍ଘଟଣାର ତଦନ୍ତ ରିପୋର୍ଟ ପରେ, ଏବେ ସିଭିଲ ଏଭିଏସନ୍ ମହାନିର୍ଦ୍ଦେଶାଳୟ (DGCA) ଖୁବ୍ ଶୀଘ୍ର ଏକ ନିର୍ଦ୍ଦେଶନାମା ଜାରି କରିବାକୁ ଯାଉଛି। ଭାରତର ସମସ୍ତ ଏୟାରଲାଇନ୍ସକୁ  ଏବେ ସେମାନଙ୍କର ବୋଇଂ ୭୮୭ ବିମାନର ଇନ୍ଧନ ସ୍ୱିଚ୍ ଯାଞ୍ଚ କରିବାକୁ ପଡିବ। ଏୟାରକ୍ରାଫ୍ଟ ଦୁର୍ଘଟଣା ତଦନ୍ତ ବ୍ୟୁରୋ (AAIB) ର ପ୍ରାଥମିକ ତଦନ୍ତ ରିପୋର୍ଟ ପରେ ସରକାର କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ପ୍ରସ୍ତୁତି କରୁଛନ୍ତି। 

AAIB ର ପ୍ରାଥମିକ ତଦନ୍ତ ରିପୋର୍ଟରୁ ପ୍ରକାଶ ଯେ AI-୧୭୧ ର ଉଭୟ ଇଞ୍ଜିନର ଇନ୍ଧନ ସ୍ୱିଚ୍ ରନରୁ କଟଅଫ୍ ମୋଡକୁ ଆସିଥିଲା, ଯାହା ଯୋଗୁଁ ଏହି ବିମାନ ଦୁର୍ଘଟଣା ଘଟିଥିଲା। ଏହି ମାମଲାର ଏବେ ବି ତଦନ୍ତ ଚାଲିଛି। DGCA ସମସ୍ତ ଏୟାରଲାଇନ୍ସ ଅପରେଟରମାନଙ୍କୁ ୨୦୨୫ ଜୁଲାଇ ୨୧ ସୁଦ୍ଧା ତଦନ୍ତ ସାରି  ନିୟାମକ କାର୍ଯ୍ୟାଳୟ ଏବଂ ସମ୍ପୃକ୍ତ ଆଞ୍ଚଳିକ କାର୍ଯ୍ୟାଳୟକୁ  ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛି। DGCA ସ୍ପଷ୍ଟ କରିଛି ଯେ ସମୟସୀମା କଠୋର ଭାବରେ ପାଳନ କରିବା ବାଧ୍ୟତାମୂଳକ।

ଏହି ନିର୍ଦ୍ଦେଶନାମା ୨୦୧୮ ଡିସେମ୍ବର ୧୭ ଫେଡେରାଲ୍ ଏଭିଏସନ୍ ଆଡମିନିଷ୍ଟ୍ରେସନ୍ (FAA) ଦ୍ୱାରା ଜାରି କରାଯାଇଥିବା ଏକ ବୁଲେଟିନ୍ ଆଧାରରେ ଜାରି କରାଯାଇଛି। ଏଥିରେ ବୋଇଂ ଏବଂ ମ୍ୟାକଡୋନେଲ୍ ଡଗଲାସ୍‌ର ବିଭିନ୍ନ ମଡେଲରେ ଇନ୍ଧନ ନିୟନ୍ତ୍ରଣ ସ୍ୱିଚ୍ ଲକିଂ ସିଷ୍ଟମରେ ସମ୍ଭାବ୍ୟ ସମସ୍ୟା ବିଷୟରେ ସତର୍କ କରାଯାଇଥିଲା।

ଅହମ୍ମଦାବାଦ ବିମାନ ଦୁର୍ଘଟଣା ମାମଲାରେ ଜୁଲାଇ ୧୨ରେ ପ୍ରକାଶିତ ପ୍ରାଥମିକ ରିପୋର୍ଟରେ କୁହାଯାଇଛି ଯେ ଦୁର୍ଘଟଣାଗ୍ରସ୍ତ ବିମାନର ରକ୍ଷଣାବେକ୍ଷଣ ରେକର୍ଡ ସମ୍ପୂର୍ଣ୍ଣ ଠିକ୍ ଥିଲା। ଏହାର ସମସ୍ତ ଆବଶ୍ୟକୀୟ ଯାଞ୍ଚ ସମୟସୀମା ମଧ୍ୟରେ ସମାପ୍ତ ହୋଇଥିଲା। ବିମାନଟିର ଏକ ବୈଧ ବିମାନଯାପନ ପ୍ରମାଣପତ୍ର ଥିବା ମଧ୍ୟ କୁହାଯାଇଛି।