ନୂଆଦିଲ୍ଲୀ: ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଇସ୍ରାଏଲ ଇରାନର ସମସ୍ତ ପରମାଣୁ କାର୍ଯ୍ୟକ୍ରମ ଧ୍ୱଂସ କରିବାକୁ ପ୍ରତିଜ୍ଞା କରିଛି। ପ୍ରଥମେ ଇସ୍ରାଏଲୀ ପ୍ରଧାନମନ୍ତ୍ରୀ ବେଞ୍ଜାମିନ ନେତନ୍ୟାହୁଙ୍କ ପରେ  ବର୍ତ୍ତମାନ ପ୍ରତିରକ୍ଷା ମନ୍ତ୍ରୀ ଇସ୍ରାଏଲ କାଟଜ ଇରାନର ସର୍ବୋଚ୍ଚ ନେତା ଆୟତୁଲ୍ଲା ଅଲି ଖାମେନେଇଙ୍କୁ ଧମକ ଦେଇଛନ୍ତି। ସେ ଚେତାବନୀ ଦେଇଛନ୍ତି, ଇରାନର ସର୍ବୋଚ୍ଚ ନେତା ଖାମେନେଇ ଇରାକର ପୂର୍ବତନ ଏକଛତ୍ରବାଦୀ ସଦ୍ଦାମ ହୁସେନଙ୍କ ପରି ସମାନ ଦଶା ଭୋଗିପାରନ୍ତି।

ରଏଟର୍ସର ଏକ ରିପୋର୍ଟ ଅନୁଯାୟୀ, ଇସ୍ରାଏଲୀ ପ୍ରତିରକ୍ଷା ମନ୍ତ୍ରୀ କହିଛନ୍ତି, ସମୟ ଆସିବ ଖାମେନେଇଙ୍କୁ ଇରାନର ଲୋକମାନେ ଫାଶି ଦେବେ। ଇରାନରେ ତାଙ୍କୁ ଲଟକାଇ ଦିଆଯିବ। ଇରାନର ପଡ଼ୋଶୀ ଦେଶ ଇରାକର ଏକଛତ୍ରବାଦୀ ଶାସକଙ୍କ ସହ କ'ଣ ଘଟିଥିଲା ତାହା ସମସ୍ତେ ଜାଣିଛନ୍ତି। ସଦ୍ଦାମ ହୁସେନ ମଧ୍ୟ ଇସ୍ରାଏଲ ବିରୁଦ୍ଧରେ ଥିଲା। 

ଇରାକର ଏକଛତ୍ରବାଦୀ ସଦ୍ଦାମ ହୁସେନଙ୍କ ବିରୁଦ୍ଧରେ ବିଭିନ୍ନ ମାମଲାରେ ହଜାର ହଜାର ଲୋକଙ୍କୁ ହତ୍ୟା କରିବାର ଅଭିଯୋଗ ଥିଲା। ୧୯୮୨ ଡୁଜାଇଲ୍ ହତ୍ୟାକାଣ୍ଡରେ ୧୪୮ ଜଣ ସିଆ ମୁସଲମାନଙ୍କୁ ହତ୍ୟା କରିବା ଅଭିଯୋଗରେ ତାଙ୍କୁ ଫାଶି ଦିଆଯାଇଥିଲା। ୨୦୦୩ ମସିହାରେ ଆମେରିକା ନେତୃତ୍ୱାଧୀନ ମେଣ୍ଟ ଦ୍ୱାରା କ୍ଷମତାରୁ ହଟାଇବା ପରେ ତାଙ୍କୁ ଗିରଫ କରାଯାଇଥିଲା। 

ଇସ୍ରାଏଲ ପ୍ରତିରକ୍ଷା ମନ୍ତ୍ରୀଙ୍କ ଏହି ବୟାନ ଏପରି ସମୟରେ ଆସିଛି ଯେତେବେଳେ ଏକ ରିପୋର୍ଟରେ ପ୍ରକାଶ ପାଇଥିଲା ଯେ, ଇସ୍ରାଏଲ ଖାମେନିଙ୍କୁ ହତ୍ୟା କରିବାକୁ ଯୋଜନା କରିଥିଲା। କିନ୍ତୁ ଆମେରିକାର ବାରଣ କାରଣରୁ ଇସ୍ରାଏଲ ଏଥିରୁ ପଛଘୁଞ୍ଚା ଦେଇଥିଲା। ଟ୍ରମ୍ପ ପ୍ରଶାସନ ମତରେ ଯୁଦ୍ଧରେ ବଡ଼ ରାଜନୈତିକ ପ୍ରଭାବ ଥିବା ବ୍ୟକ୍ତିଙ୍କ ହତ୍ୟା ପରିସ୍ଥିତିକୁ ଆହୁରି ଜଟିଳ କରିପାରେ।

ଜି-୭ର ସଦସ୍ୟ ଦେଶ ଇସ୍ରାଏଲକୁ ସମର୍ଥନ କରିଥିଲେ ଏବଂ କହିଥିଲେ ଯେ ଇସ୍ରାଏଲ ନିଜକୁ ସୁରକ୍ଷା ଦେବାର ସମ୍ପୂର୍ଣ୍ଣ ଅଧିକାର ଅଛି। ଟ୍ରମ୍ପ ଜି-୭ ଶିଖର ସମ୍ମିଳନୀ ମଝିରେ ଛାଡି ଆମେରିକାରେ ପହଞ୍ଚି ଇରାନର ରାଜଧାନୀ ତେହେରାନକୁ ଖାଲି କରିବାକୁ ଚେତାବନୀ ଦେଇଥିଲେ। ସେ ଦାବି କରିଥିଲେ ଯେ ଇରାନ ପରମାଣୁ ଅସ୍ତ୍ର ତିଆରି କରିବାକୁ ନିକଟତର। ଟ୍ରମ୍ପ ସ୍ପଷ୍ଟ ଭାବରେ କହିଛନ୍ତି ଯେ ଇରାନକୁ ପରମାଣୁ ଅସ୍ତ୍ର ତିଆରି କରିବା ପାଇଁ ନିଜର ଜିଦିରୁ ଓହରିବାକୁ ପଡିବ।