ରୁଷ୍ ରାଜଧାନୀ ମସ୍କୋସ୍ଥିତ ପ୍ରସିଦ୍ଧ କ୍ରୋକସ୍ ସିଟି ହଲ୍ରେ ବଡ଼ ଧରଣର ଆତଙ୍କବାଦୀ ଆକ୍ରମଣ ହୋଇଛି। ଅତର୍କିତ ଭାବେ ହୋଇଥିବା ଗୁଳିବର୍ଷା ଓ ବୋମାମାଡ଼ରେ ୬୦ ଜଣ ସାଧାରଣ ଜନତାଙ୍କ ପ୍ରାଣହାନୀ ସମେତ ଶତାଧିକ ଆହତ ହୋଇଥିବା ସୂଚନା ମିଳିଛି। ଏହି ଗୁଳିକାଣ୍ଡ ଆତଙ୍କବାଦୀ ସଂଗଠନ ISIS ଦ୍ୱାରା ହୋଇଥିବା ସ୍ୱୀକାର କରିଛି। ୪ରୁ ୫ ଜଣ ଆତଙ୍କବାଦୀଙ୍କ ଦ୍ୱାରା ଏପରି ହୋଇଥିବା ସୂଚନା ମିଳିଛି।।
ଶୁକ୍ରବାର ଅପରାହ୍ଣରେ ଋଷର ପ୍ରମୁଖ ରକ୍ ବ୍ୟାଣ୍ଡ ପିକନିକ୍ ପକ୍ଷରୁ କାର୍ଯ୍ୟକ୍ରମ ଚାଲିଥିବା ବେଳେ ୬ ହଜାରରୁ ଅଧିକ ଦର୍ଶକ ଉପସ୍ଥିତ ଥିଲେ। ଏହି ସମୟରେ ୪ ଜଣ ଆତଙ୍କବାଦୀ ସେନା ପୋଷାକରେ ସେଠାରେ ପହଞ୍ଚି ଲୋକଙ୍କ ଉପରକୁ ମେସିନ ଗନ ଦ୍ୱାରା ଆଖିବୁଜା ଗୁଳିମାଡ଼ କରିଥିଲେ। ଲୋକଙ୍କ ଉପରକୁ ଗ୍ରେନେଡ ଓ ବୋମା ଫିଙ୍ଗିଥିଲେ । ଏଥିସହ କୋଠାରେ ନିଆଁ ଲାଗିଯାଇଥିଲା । ନିଆଁ ଲାଗିଯିବାରୁ କ୍ରୋକସ ସିଟି ହଲ ଛାତ ଭୁଶୁଡ଼ିପଡ଼ିଥିଲା। ଉକ୍ତ ସିଟି ହଲ ନିକଟରେ ଏକ ସପିଂମଲ୍ ରହିଥିବାରୁ ଏବଂ ସଂଧ୍ୟା ସମୟ ହୋଇଥିବାରୁ ସେହି ସ୍ଥାନରେ ଲୋକଙ୍କ ଭିଡ଼ ଅଧିକ ରହିଥିଲା। ତେବେ ସ୍ଥାନୀୟ ନ୍ୟୁଜ୍ ଚ୍ୟାନେଲ୍ରେ ପ୍ରକାଶିତ ଖବର ଅନୁସାରେ ଗୁଳିମାଡ଼ରେ ୬୦ଜଣଙ୍କ ମୃତ୍ୟୁ ଘଟିଥିବା ବେଳେ ପ୍ରାୟ ୧୪୫ ଜଣ ଆହତ ହୋଇଛନ୍ତି। ଅନେକ ଆହତଙ୍କ ଅବସ୍ଥା ସଙ୍କାଟାପନ୍ନ ଥିବାରୁ ମୃତ୍ୟୁସଂଖ୍ୟା ବଢ଼ିବା ଆଶଙ୍କା ରହିଛି। ଗୁଳିକାଣ୍ଡ ପରେ ବିସ୍ଫୋରଣ ଯୋଗୁଁ ସ୍ଥିତି ଜଟିଳ ହୋଇଥିବାରୁ ଉଦ୍ଧାର କାର୍ଯ୍ୟ ମଧ୍ୟ ବିଳମ୍ବିତ ହେଉଛି। ତେବେ ଉଦ୍ଧାର କାର୍ଯ୍ୟ ପାଇଁ ୫୦ଟି ଆମ୍ବୁଲାନ୍ସକୁ ଘଟଣାସ୍ଥଳରେ ନିୟୋଜିତ କରାଯାଇଛି। ସମଗ୍ର ଅଞ୍ଚଳକୁ ରୁଷର ଦଙ୍ଗାନିରୋଧୀ ପୁଲିସ କର୍ଡନ କରି ରଖିଛନ୍ତି।
ତେବେ ଏହି ଘଟଣା ପାଇଁ ଇରାକ ଓ ସିରିଆରେ ଆଧିପତ୍ୟ ବିସ୍ତାର କରିଥିବା ଆତଙ୍କବାଦୀ ସଂଗଠନ ISIS ଏହି ଆକ୍ରମଣ ପାଇଁ ନିଜକୁ ଦାୟୀ କରିଛି। ପୂର୍ବରୁ ମଧ୍ୟ ଜାନୁଆରୀରେ ଇରାନରେ ଆତଙ୍କବାଦୀ ଆକ୍ରମଣ ହୋଇଥିଲା ଏହି ଘଟଣାର ପ୍ରତିକ୍ରିୟାରେ ଆମେରିକୀୟ ଅଧିକାରୀ କହିଛନ୍ତି ଯେ, ଆତଙ୍କବାଦୀ ଆକ୍ରମଣ ନେଇ ଗୁଇନ୍ଦା ରିପୋର୍ଟ ପୂର୍ବରୁ ରୁଷିଆକୁ ଦିଆଯାଇଥିଲା। ଏ ସଂପର୍କିତ ରିପୋର୍ଟ ନ୍ୟୁୟର୍କ ଟାଇମସରେ ପ୍ରକାଶ ପାଇଛି।
ଅଧିକ ପଢନ୍ତୁ: ରାଜ୍ୟରେ ପୁଣି ବର୍ଷା