ୟେମେନରେ ଇରାନ୍ ସମର୍ଥିତ ହୁତି ଲଢ଼ୁଆଙ୍କ ଉପରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ବ୍ୟବହାର କରି ଜଣେ ୟେମେନୀ ସୈନ୍ୟ କମାଣ୍ଡରଙ୍କ ସ୍ୱର ନକଲ କରିଥିବା ଅଭିଯୋଗ ଆସିଛି। ରିପୋର୍ଟ ଅନୁଯାୟୀ, ହୁତିମାନେ ଲେଫ୍ଟନାଣ୍ଟ ଜେନେରାଲ୍ ତାରିକ୍ ସାଲେହଙ୍କ ସ୍ୱର ଭଳି ଏକ ଅଡିଓ ପ୍ରସ୍ତୁତ କରିଥିଲେ। ଏଥିରେ ସୈନିକମାନଙ୍କୁ ରଣନୈତିକ ସହର 'ମୋଚା'ରୁ ପଛକୁ ହଟିଯିବାକୁ କୁହାଯାଇଥିଲା। ଏହି ଅଡିଓ ସେତେବେଳେ ପ୍ରସାରିତ କରାଯାଇଥିଲା, ଯେତେବେଳେ ହୁତି ଲଢ଼ୁଆମାନେ ମୋଚା ଉପରେ କବଜା କରିବା ପାଇଁ ଆକ୍ରମଣ କରୁଥିଲେ। ସାଲେହଙ୍କ ନ୍ୟାସନାଲ୍ ରେଜିଷ୍ଟାନ୍ସ ଫୋର୍ସ ଅଭିଯୋଗ କରିଛି ଯେ AI ମାଧ୍ୟମରେ କମାଣ୍ଡରଙ୍କ ସ୍ୱର ନକଲ କରି ଏହି ମିଥ୍ୟା ସନ୍ଦେଶ ବ୍ୟାପକ କରାଯାଇଥିଲା, ଯେପରି ସୈନିକମାନଙ୍କ ମଧ୍ୟରେ ଭ୍ରମ ସୃଷ୍ଟି ହୋଇପାରିବ ଏବଂ ସେମାନଙ୍କ ମନୋବଳ ଭାଙ୍ଗିଯିବ।

ସାମ୍ନାକୁ ଆସିଥିବା ଅଡିଓରେ ସାଲେହଙ୍କ ସ୍ୱରରେ ସୈନିକମାନଙ୍କୁ ପଛକୁ ହଟିବା କଥା କୁହାଯାଇଥିଲା। ସନ୍ଦେଶରେ କୁହାଯାଇଥିଲା ଯେ ଯୁଦ୍ଧରେ କେତେବେଳେ ଆଗକୁ ବଢ଼ିବାକୁ ପଡ଼ିଥାଏ ତ କେତେବେଳେ ପଛକୁ ହଟିବାକୁ ପଡ଼ିଥାଏ। ଏଥିସହ ସୈନିକମାନଙ୍କୁ ଏହା ମଧ୍ୟ କୁହାଯାଇଥିଲା ଯେ ସେମାନଙ୍କ ପାଖରେ ରିଜର୍ଭ ସୈନିକ ଏବଂ ଆଗକୁ ଲଢ଼େଇ ଜାରି ରଖିବା ପାଇଁ ଅତିରିକ୍ତ ଶକ୍ତି ମହଜୁଦ ଅଛି। ରିସ୍କ ଆଡଭାଇଜରିଂ କମ୍ପାନୀ 'ବାଶା ରିପୋର୍ଟ' ଏହି ଅଡିଓ ବିଷୟରେ ଉଲ୍ଲେଖ କରିଥିଲା। ମୋଚାର ସାଟେଲାଇଟ୍ ଟିଭି ଚ୍ୟାନେଲ୍ 'ଅଲ୍ଜୁମ୍ହୁରିୟା ଟିଭି' ମଧ୍ୟ ଏହାକୁ AI ଦ୍ୱାରା ତିଆରି କରାଯାଇଥିବା ଏକ ମିଛ ଅଡିଓ ବୋଲି କହିଥିଲା।

ସୈନିକମାନଙ୍କୁ ଆତ୍ମସମର୍ପଣ କରିବାକୁ ମଧ୍ୟ ଦିଆଯାଇଥିଲା ସନ୍ଦେଶ

ସାଲେହଙ୍କ ମିଡିଆ ଟିମ୍ ପରେ ସ୍ପଷ୍ଟ କରିଥିଲା ଯେ ସେମାନଙ୍କର ଆଧିକାରିକ ବୟାନ କେବଳ ଅନୁମୋଦିତ ନ୍ୟାସନାଲ୍ ରେଜିଷ୍ଟାନ୍ସ ମିଲିଟାରୀ ଚ୍ୟାନେଲ୍ ଜରିଆରେ ହିଁ ଜାରି କରାଯିବ। ଲୋକମାନଙ୍କୁ କୌଣସି ଅପ୍ରମାଣିତ ଅଡିଓ କିମ୍ବା ସନ୍ଦେଶ ଉପରେ ବିଶ୍ୱାସ ନକରିବାକୁ କୁହାଯାଇଛି। ରିପୋର୍ଟ ଅନୁଯାୟୀ, ହୁତିମାନେ ସୈନିକମାନଙ୍କୁ ଏପରି ସନ୍ଦେଶ ମଧ୍ୟ ପଠାଇଥିଲେ, ଯେଉଁଥିରେ ଅସ୍ତ୍ରଶସ୍ତ୍ର ଛାଡ଼ି ଘରକୁ ଫେରିଗଲେ କ୍ଷମା ଦିଆଯିବ ବୋଲି କୁହାଯାଇଥିଲା। ସୂଚନା ମିଳିଛି ଯେ ଏହି ସନ୍ଦେଶଗୁଡ଼ିକର ମୁଖ୍ୟ ଉଦ୍ଦେଶ୍ୟ ଥିଲା ସୈନିକମାନଙ୍କୁ ଏହା ବିଶ୍ୱାସ କରାଇବା ଯେ ପଛକୁ ହଟିବା କିମ୍ବା ଆତ୍ମସମର୍ପଣ କରିବା ହିଁ ସେମାନଙ୍କ ପାଇଁ ସୁରକ୍ଷିତ ବିକଳ୍ପ। ହୁତିମାନେ ରଣନୈତିକ ଲୋହିତ ସାଗର ସହର ମୋଚା ଏବଂ ସମୁଦ୍ର ମଝିରେ ଥିବା 'ପେରିମ୍' ଦ୍ୱୀପକୁ ନିଜ କବଜାକୁ ନେଇଛନ୍ତି, ଯାହାଫଳରେ ବାବ୍-ଅଲ୍-ମନ୍ଦେବ୍ ପ୍ରଣାଳୀ ଉପରେ ସେମାନଙ୍କ ପକଡ଼ ଆହୁରି ମଜବୁତ୍ ହୋଇଛି।

ୟେମେନରେ AIର ସାମରିକ ବ୍ୟବହାର ନେଇ ଦ୍ୱିତୀୟ ରିପୋର୍ଟ

AI ବ୍ୟବହାରର ଏହି ଅଭିଯୋଗ ଏପରି ସମୟରେ ଆସିଛି, ଯେତେବେଳେ 'ଆନ୍ଥ୍ରୋପିକ୍' (Anthropic)ର ଅନ୍ୟ ଏକ ରିପୋର୍ଟରେ ୟେମେନରେ AIର ସାମରିକ ବ୍ୟବହାର ସମ୍ଭାବନା ବିଷୟରେ ଉଲ୍ଲେଖ କରାଯାଇଥିଲା। ରିପୋର୍ଟ ଅନୁଯାୟୀ, ଉତ୍ତର ୟେମେନରେ ଅସ୍ତ୍ରଶସ୍ତ୍ର ପ୍ରସ୍ତୁତ କରୁଥିବା ଏକ ଗୋଷ୍ଠୀ 'କ୍ଲୋଡ୍ କୋଡ୍' (Claude Code)ର ବ୍ୟବହାର ମିସାଇଲ୍ ଏବଂ ରକେଟ୍ କାର୍ଯ୍ୟକ୍ରମ ସହ ଜଡ଼ିତ ଗାଇଡାନ୍ସ, ନାଭିଗେସନ୍ ଏବଂ କଣ୍ଟ୍ରୋଲ୍ ସଫ୍ଟୱେର୍ ଉପରେ କାମ କରିବା ପାଇଁ ଚେଷ୍ଟା କରିଥିଲେ। ଆନ୍ଥ୍ରୋପିକ୍ ଏହି ଆକାଉଣ୍ଟଗୁଡ଼ିକୁ ବ୍ୟାନ୍ କରିଦେଇଛି ଏବଂ ବିପଦ ସମ୍ବନ୍ଧୀୟ ସୂଚନା ସରକାରୀ ଓ ବେସରକାରୀ ସହଯୋଗୀମାନଙ୍କ ସହ ସେୟାର୍ କରିଛି।