ଇସଲାମାବାଦ: ଆମେରିକାର ଚାପ୍‌ଲୁସିରେ ବ୍ୟସ୍ତ ଥିବା ପାକିସ୍ତାନ ପ୍ରଧାନମନ୍ତ୍ରୀ ଶେହବାଜ ସରିଫ୍ ଏବଂ ସେନା ମୁଖ୍ୟ ଆସିମ ମୁନିରଙ୍କ ସାମ୍ନାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏଭଳି ଏକ ସର୍ତ୍ତ ରଖିଛନ୍ତି, ଯାହା ପାକିସ୍ତାନୀ ଶାସକଙ୍କ ନିଦ ହଜାଇ ଦେଇଛି। ବିଶ୍ୱର ୫ଟି ପ୍ରମୁଖ ମୁସଲିମ ଦେଶକୁ 'ଅବ୍ରାହମ ଚୁକ୍ତି' (Abraham Accords) ରେ ସାମିଲ ହେବା ପାଇଁ ଟ୍ରମ୍ପ ଦାବି କରିଛନ୍ତି, ଯେଉଁଥିରେ ପାକିସ୍ତାନର ନାମ ମଧ୍ୟ ରହିଛି। ଆମେରିକାର ଏହି ପ୍ରସ୍ତାବ ଉପରେ ପାକିସ୍ତାନର ରକ୍ଷାମନ୍ତ୍ରୀ ଖ୍ୱାଜା ଆସିଫ୍ ପ୍ରତିକ୍ରିୟାଶୀଳ ହୋଇ ସିଧାସଳଖ ଜବାବ ଦେଇଛନ୍ତି।

ରକ୍ଷାମନ୍ତ୍ରୀ ଖ୍ୱାଜା ଆସିଫ୍ ସ୍ପଷ୍ଟ କରିଛନ୍ତି ଯେ, ପାକିସ୍ତାନ ଏହି ଚୁକ୍ତିରେ ସାମିଲ ହୋଇ ଇସ୍ରାଏଲ ସହିତ ନିଜର ସମ୍ପର୍କ ସ୍ୱାଭାବିକ କରିବା ସପକ୍ଷରେ ଆଦୌ ନାହିଁ। ପ୍ରକୃତରେ, ଡୋନାଲ୍ଡ ଟ୍ରମ୍ପ କହିଥିଲେ ଯେ ଇରାନ ସହ ଆଲୋଚନାରେ ସାମିଲ ଥିବା ମୁସଲିମ ଦେଶଗୁଡ଼ିକ ଅବ୍ରାହମ ଚୁକ୍ତିରେ ସ୍ୱାକ୍ଷର କରିବା ଉଚିତ। ୟୁଏଇ (UAE) ଏବଂ ବହରିନ୍ ପୂର୍ବରୁ ଏହି ଚୁକ୍ତିର ସଦସ୍ୟ ଥିବାବେଳେ ଏବେ ସୌଦି ଆରବ, କତାର, ପାକିସ୍ତାନ, ତୁର୍କୀ, ମିଶର ଏବଂ ଜର୍ଦ୍ଦାନ ମଧ୍ୟ ଏଥିରେ ସାମିଲ ହେବେ ବୋଲି ଆମେରିକା ଆଶା ରଖିଛି। ସୂଚନାଯୋଗ୍ୟ ଯେ, ଏହି ଚୁକ୍ତି ଇସ୍ରାଏଲ ଏବଂ ଆରବ ଦେଶଗୁଡ଼ିକ ମଧ୍ୟରେ କୂଟନୈତିକ, ଅର୍ଥନୈତିକ ଏବଂ ସୁରକ୍ଷା ସମ୍ପର୍କ ସ୍ଥାପନ କରିବା ପାଇଁ ଉଦ୍ଦିଷ୍ଟ।

ଆମେରିକା ରାଷ୍ଟ୍ରପତିଙ୍କ କହିବା ଅନୁଯାୟୀ, ବର୍ତ୍ତମାନ ସୁଦ୍ଧା ଯେଉଁ ଦେଶଗୁଡ଼ିକ ଏହି ଚୁକ୍ତିରେ ସାମିଲ ହୋଇଛନ୍ତି ସେମାନେ ବେଶ୍ ଲାଭବାନ ହୋଇଛନ୍ତି ଏବଂ ଆଗାମୀ ଦିନରେ ଏହାର ସୁଫଳ ଆହୁରି ଅଧିକ ମିଳିବ। ତେବେ ପାକିସ୍ତାନର ନ୍ୟୁଜ୍ ଚ୍ୟାନେଲ୍ 'ସମା ଟିଭି'କୁ ଦେଇଥିବା ଏକ ସାକ୍ଷାତକାରରେ ରକ୍ଷାମନ୍ତ୍ରୀ କହିଛନ୍ତି ଯେ, ବ୍ୟକ୍ତିଗତ ଭାବେ ସେ ମନେକରନ୍ତି ନାହିଁ ଯେ ପାକିସ୍ତାନ ଏଭଳି କୌଣସି ଚୁକ୍ତିର ଅଂଶଦାର ହେବା ଉଚିତ, ଯାହା ଦେଶର ମୂଳ ଆଦର୍ଶ ଓ ଚିନ୍ତାଧାରାର ପରିପନ୍ଥୀ।

ଇସ୍ରାଏଲ ସହ ସମ୍ପର୍କକୁ ନେଇ ପାକିସ୍ତାନ ନିଜର ପୁରୁଣା ଆଭିମୁଖ୍ୟରେ କାଏମ ରହିଛି। ରକ୍ଷାମନ୍ତ୍ରୀ କହିଛନ୍ତି ଯେ, ୧୯୬୭ ମସିହା ପୂର୍ବର ସୀମା ଆଧାରରେ ପୂର୍ବ ଜେରୁଜେଲମକୁ ରାଜଧାନୀ କରି ଏକ ସ୍ୱାଧୀନ ପାଲେଷ୍ଟାଇନ ରାଷ୍ଟ୍ର ଗଠନ ନହେବା ପର୍ଯ୍ୟନ୍ତ ପାକିସ୍ତାନ କଦାପି ଇସ୍ରାଏଲକୁ ଏକ ସାର୍ବଭୌମ ଦେଶ ଭାବେ ମାନ୍ୟତା ଦେବ ନାହିଁ। ଏହି ପ୍ରସଙ୍ଗରେ ପାକିସ୍ତାନର ଆଭିମୁଖ୍ୟ ସମ୍ପୂର୍ଣ୍ଣ ସ୍ପଷ୍ଟ ଏବଂ ଆମେରିକାର ସର୍ତ୍ତ ସେମାନଙ୍କୁ ଆଦୌ ଗ୍ରହଣୀୟ ନୁହେଁ।