ନୂଆଦିଲ୍ଲୀ: ବାଣିଜ୍ୟ ମନ୍ତ୍ରଣାଳୟ ଆମେରିକା ଦ୍ୱାରା ଭାରତ ଉପରେ ଲଗାଇଥିବା ୨୬ ପ୍ରତିଶତ ଶୁଳ୍କର ବିଶ୍ଳେଷଣ କରୁଛନ୍ତି । ଜଣେ ବରିଷ୍ଠ ଅଧିକାରୀ ଗୁରୁବାର ଏ ବିଷୟରେ ସୂଚନା ଦେଇଛନ୍ତି । ସେ କହିଛନ୍ତି ନିୟମ ଏହା ରହିଛି ଯେ, ଯଦି କୌଣସି ଦେଶ ଆମେରିକାର ସମସ୍ୟାକୁ ସମାଧାନ କରିବ ତେବେ ଡୋନାଲ୍ଡ ଟ୍ରମ୍ପଙ୍କ ପ୍ରଶାସନ ସେହି ଦେଶ ବିରୋଧରେ ଶୁଳ୍କ କମ କରିବା ଉପରେ ବିଚାର କରିବେ ।

ଅଧିକାରୀ ଏହା ମଧ୍ୟ କହିଛନ୍ତି, ଆମେରିକାରେ ସମସ୍ତ ଆମଦାନୀ ଉପରେ ଏକ ସମାନ ୧୦ ପ୍ରତିଶତ ଶୁଳ୍କ ଏପ୍ରିଲ ୫ରୁ ଆରମ୍ଭ  ହେବ । ଅବଶିଷ୍ଟ ୧୬ ଶୁଳ୍କ ଏପ୍ରିଲ ୧୦ରୁ ଲାଗୁ ହେବ । ଭାରତୀୟ ବାଣିଜ୍ୟ ମନ୍ତ୍ରଣାଳୟ ଏହି ଆମଦାନୀ ଶୁଳ୍କର ପ୍ରଭାବର ବିଶ୍ଳେଷଣ କରୁଛି ।

ଭାରତ ପ୍ରଥମରୁ ହିଁ ଆମେରିକା ସହିତ ଦ୍ୱିପାକ୍ଷିକ ବାଣିଜ୍ୟ ରାଜିନାମା ଉପରେ ଆଲୋଚନା କରୁଛି । ଦୁଇ ଦେଶ ଚଳିତ ବର୍ଷ ସେପ୍ଟେମ୍ବର-ଅକ୍ଟୋବର ମାସ ସୁଦ୍ଧା ରାଜିନାମାର ପ୍ରଥମ ପର୍ଯ୍ୟାୟକୁ ଅନ୍ତିମ ରୂପ ଦେବା ଲକ୍ଷ୍ୟ ନେଇ ଆଗକୁ ବଢୁଛନ୍ତି । ଅଧିକାରୀ କହିଛନ୍ତି, ଆମେରିକା ଲଗାଇଥିବା ଆମଦାନୀ ଶୁଳ୍କ ଏହା ଭାରତ ପାଇଁ ଝଟକା ନୁହେଁ ବରଂ ମିଶ୍ରିତ ପରିଣାମ । 

ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଭିନ୍ନ ଦେଶ ଉପରେ ଆମଦାନୀ ଶୁଳ୍କ ବଢାଇବା ଘୋଷଣା କରି ଭାରତ ଦ୍ୱାରା ଆମେରିକା ଉପରେ ଲଗାଯାଉଥିବା ଉଚ୍ଚ ଶୁଳ୍କର ମଧ୍ୟ ଉଲ୍ଲେଖ କରିଛନ୍ତି । ଭାରତ ଉପରେ ୨୬ ପ୍ରତିଶତ ଆମଦାନୀ ଶୁଳ୍କ ଲଗାଇବାର ଘୋଷଣା କରି ଟ୍ରମ୍ପ କହିଛନ୍ତି ଯେ, ଏହା ଆମ ପାଇଁ ମୁକ୍ତି ଦିସବ । ଏହି କ୍ଷଣକୁ ଦୀର୍ଘ ସମୟରୁ ପ୍ରତୀକ୍ଷା କରିଥିଲୁ । ୨୦୨୫ ଏପ୍ରିଲ ୨ ତାରିଖକୁ ସର୍ବଦା ସେହି ଦିନ ଭାବେ ମନେ ରଖାଯିବ ଯେଉଁ ଦିନ ଆମେରିକା ଉଦ୍ୟୋଗର ପୁର୍ନଜନ୍ମ ଘଟିଛି । ଏପ୍ରିଲ ୨ ତାରିଖ ଆମେରିକା ଭାଗ୍ୟର ପୁନଃ ଉଦୟ ହୋଇଛି ।