ଢାକା: ଚୀନକୁ ଖୁସି କରିବାକୁ ଚେଷ୍ଟା କରୁଥିବା ବାଂଲାଦେଶ ପୁଣି ଥରେ ଭାରତ ବିଷୟରେ ଏକ ଅବାନ୍ତର ବୟାନ ଦେଇଛି । କିଛି ତଥ୍ୟ ପ୍ରମାଣ ନ ଥାଇ ବାଂଲାଦେଶର ଏକ ବୟାନକୁ ନେଇ ଚିନ୍ତା ବଢ଼ିଛି । ବହିଷ୍କୃତ ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନାଙ୍କ ଆୱାମୀ ଲିଗ୍ ଦଳର ଏକ ଲକ୍ଷରୁ ଅଧିକ ସଦସ୍ୟ ଭାରତ ପଳାୟନ କରିଛନ୍ତି । ଏଭଳି ଏକ ବିବାଦୀୟ ବୟାନ ଦେଇଛନ୍ତି ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ସୂଚନା ପରାମର୍ଶଦାତା ମହଫୁଜ ଆଲମ୍ । 

ବାଂଲାଦେଶୀ ନ୍ୟୁଜ୍ ପୋର୍ଟାଲ୍ bdnews24.com ଅନୁଯାୟୀ, ଆଲମ୍ ନିଜ ପରିବାର ବର୍ଗଙ୍କ ସହିତ ମଙ୍ଗଳବାର ଦିନ ଇଦ୍ ପାଳନ ଉତ୍ସବରେ ଯୋଗ ଦେଇଥିଲେ । ସେଠାରେ ଆଲମ୍ ଶେଖ୍ ହସିନାଙ୍କୁ ଖୁବ୍ ସମାଲୋଚନା କରିଥିଲେ । ଆଲମ୍ କହିଛନ୍ତି ଯେ ହସିନାଙ୍କ ପିତାମାତାଙ୍କ ହତ୍ୟାର ପ୍ରତିଶୋଧ ନେବା ପାଇଁ ସେ ଲୋକମାନଙ୍କୁ ବଳପୂର୍ବକ ନିଖୋଜ କରି ହତ୍ୟା କରିଥିଲେ । ଏହା ଅତ୍ୟନ୍ତ ଦୁର୍ଭାଗ୍ୟଜନକ ଯେ ଭାରତ ନିଜ ଦେଶରେ ଶେଖ୍ ହସିନା ଏବଂ ତାଙ୍କ ଆତଙ୍କବାଦୀ ଶକ୍ତିକୁ ଆଶ୍ରୟ ଦେବାକୁ ବାଛିଛି । ଏକ ଲକ୍ଷରୁ ଅଧିକ ଆୱାମୀ ଲିଗ୍ ସଦସ୍ୟ ଭାରତକୁ ପଳାଇ ଯାଇଛନ୍ତି ଏବଂ ଭାରତ ସେମାନଙ୍କୁ ସମସ୍ତଙ୍କୁ ଆଶ୍ରୟ ଦେଇଛି ବୋଲି କହିଛନ୍ତି ଆଲମ୍ । 

ମହଫୁଜ ଆଲାମ ହାସିନାଙ୍କ ବିରୋଧରେ ଗମ୍ଭୀର ଅଭିଯୋଗ ଆଣିଥିଲେ । ସେ କହିଛନ୍ତି, "୨୦୧୩ ଏବଂ ୨୦୧୪ ମସିହାରେ ଯେତେବେଳେ ବାଂଲାଦେଶର ନାଗରିକମାନେ ନିଜ ଭୋଟ ଦେବାରୁ ଅଧିକାର ପାଇଁ ଲଢ଼ୁଥିଲେ, ସେତେବେଳେ ଅଧିକାଂଶ ଲୋକଙ୍କୁ ବଳପୂର୍ବକ ଅପହରଣ କରାଯାଇଥିଲା । ସେମାନଙ୍କ ଏଭଳି କାର୍ଯ୍ୟ ପଛରେ ମୁଖ୍ୟ ଉଦ୍ଦେଶ୍ୟ ଥିଲା ଯେ ବାଂଲାଦେଶର ନିର୍ବାଚନ ବ୍ୟବସ୍ଥାକୁ ସମ୍ପୂର୍ଣ୍ଣ ନଷ୍ଟ କରିବା।"