ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଘନିଷ୍ଠ ସହଯୋଗୀ ତଥା ବିଶ୍ୱର ଏକ ନମ୍ବର ଧନୀ ବ୍ୟକ୍ତି ଏଲନ ମସ୍କ DOGEର ପ୍ରମୁଖ ପଦରୁ ଇସ୍ତଫା ଦେବେ । ଆମେରିକା ରା ଷ୍ଟ୍ରପତି ଡୋନାଲ୍ଡ ଟ୍ରମ୍ପ ନିଜ ମନ୍ତ୍ରିମଣ୍ଡଳର ସଦସ୍ୟ ଓ ଅନ୍ୟ ସହଯୋଗୀଙ୍କୁ ଏହି ବିଷୟରେ ଜଣାଇଛନ୍ତି । 

ପୋଲିଟିକୋର ରିପୋର୍ଟ ଅନୁଯାୟୀ, ରାଷ୍ଟ୍ରପତି ଟ୍ରମ୍ପ ମସ୍କଙ୍କ କାର୍ଯ୍ୟଶୈଳୀରେ ଖୁସି ଅଛନ୍ତି । ସେ ସରକାରୀ ଦକ୍ଷତା ବିକାଶ ବିଭାଗରେ ମସ୍କଙ୍କ କାମକୁ ବେଶ ପ୍ରଶଂସା କରିଛନ୍ତି । ମାତ୍ର ଦୁହେଁ ଏବେ ନିଷ୍ପତ୍ତି ନେଇଛନ୍ତି ଯେ, ମସ୍କ ଶୀଘ୍ର DOGEର ଦାୟିତ୍ୱ ଛାଡି ନିଜର କାରବାର ସମ୍ଭାଳିବେ । ତେବେ ମସ୍କ କେବେ ମନ୍ତ୍ରିମଣ୍ଡଳରୁ ଇସ୍ତଫା ଦେବେ ଏହି ବିଷୟରେ ସୂଚନା ଦିଆଯାଇ ନାହିଁ ।

ଟ୍ରମ୍ପ ଟେସଲା ଓ ସ୍ପେସଏକ୍ସର ସିଇଓଙ୍କୁ ଏକ ସ୍ୱତନ୍ତ୍ର ସରକାରୀ କର୍ମଚାରୀ ଭାବେ ସରକାରୀ ସ୍ତରରେ ଖର୍ଚ୍ଚକାଟ କରିବା, ବିଭିନ୍ନ ଆମେରିକୀୟ ଏଜେନ୍ସିକୁ ସମାପ୍ତ କରିବା ଆଦି ଦାୟିତ୍ୱ ଦେଇଥିଲେ । ରିପୋର୍ଟରେ କୁହାଯାଇଛି ଯେ, ହ୍ୱାଇଟ୍ ହାଉସ ପକ୍ଷରୁ କିମ୍ବା ମସ୍କଙ୍କ ପକ୍ଷରୁ ଏ ବିଷୟରେ କୌଣସି ପ୍ରତିକ୍ରିୟା ଦେଇ ନାହାନ୍ତି । 

ସୂଚନାଯୋଗ୍ୟ, ଟ୍ରମ୍ପ ପ୍ରଶାସନର  କିଛି ସଦସ୍ୟ ଓ ରାଷ୍ଟ୍ରପତିଙ୍କ ସହଯୋଗୀ ଏଲନ ମସ୍କଙ୍କ କାର୍ଯ୍ୟଶୈଳୀରେ ସନ୍ତୁଷ୍ଟ ନ ଥିଲେ । ସେମାନେ ମସ୍କଙ୍କୁ ଏକ ରାଜନୈତିକ ବୋଝ ବୋଲି ଭାବୁଥିଲେ । ମସ୍କ ମନ୍ତ୍ରିମଣ୍ଡଳ ଛାଡିବାର ଖବର ବୁଧବାର ଆମେରିକା ମିଡିଆରେ ପ୍ରସାରିତ ହୋଇଛି । ଏହା ବର୍ତ୍ତମାନ ଆମେରିକାରେ ଚର୍ଚ୍ଚାର ବିଷୟ ପାଲଟିଛି ।