ଢାକା: ବାଂଲାଦେଶରେ ଦୁର୍ଗାପୂଜା ସମୟରେ ଏକ ପୂଜା ମଣ୍ଡପ ଉପରେ ଆକ୍ରମଣ ପରେ ଏବେ ମୂର୍ତ୍ତି ବିସର୍ଜନ ଶୋଭାଯାତ୍ରାକୁ ଟାର୍ଗେଟ କରାଯାଇଛି। ଦୁର୍ଗାପୂଜା ସରିବା ପରେ ପୁରୁଣା ଢାକାରେ ମୂର୍ତ୍ତି ବିସର୍ଜନ କରିବାକୁ ଯାଉଥିବା ଲୋକଙ୍କ ଉପରକୁ ଇଟା ଓ ପଥର ମାଡ଼ ହେବାରୁ ୩ ଜଣ ଆହତ ହୋଇଛନ୍ତି। ଏହି ସମୟରେ ପୁଲିସ ସହ ଧସ୍ତାଧସ୍ତି ମଧ୍ୟ ହୋଇଥିଲା। ରବିବାର ରାତିରେ ଏହି ଘଟଣା ଘଟିଛି।

ଡେଲି ଷ୍ଟାର ଖବରକାଗଜ ସୋମବାର ଜଣେ ପ୍ରତ୍ୟକ୍ଷଦର୍ଶୀଙ୍କ ବୟାନ ଦେଇ ରିପୋର୍ଟ କରିଛି ଯେ ବୁରିଗଙ୍ଗା ନଦୀରେ ମୂର୍ତ୍ତି ବିସର୍ଜନ ପାଇଁ ଯାଉଥିବା ଲୋକଙ୍କ ଉପରକୁ ଦୁର୍ବୃତ୍ତମାନେ ପୁରୁଣା ଢାକାର ପଟୁଆଟୁଲି ଅଞ୍ଚଳର ନୂର ସୁପର ମାର୍କେଟଛାତରୁ ଇଟା ଫିଙ୍ଗିଥିଲେ। ଏଥିରେ ଜଣେ ପୁଲିସ ଅଧିକାରୀଙ୍କ ସମେତ ୩ ଜଣ ଆହତ ହୋଇଛନ୍ତି। ଏହି ଘଟଣା ପରେ ଉତ୍ତ୍ୟକ୍ତ ଲୋକମାନେ ନୂର ବଜାରଭିତରକୁ ପ୍ରବେଶ କରିବାକୁ ଚେଷ୍ଟା କରିଥିଲେ ମଧ୍ୟ ପୁଲିସ ସେମାନଙ୍କୁ ଅଟକାଇଥିଲା।

ସଦର ଥାନା ଅଧିକାରୀ ମହମ୍ମଦ ଏନାମୁଲ୍ ହାସନ କହିଛନ୍ତି, ସ୍ଥାନୀୟ ଲୋକେ ବଜାର ଭିତରକୁ ପଶିବାକୁ ଚେଷ୍ଟା କରିଥିଲେ। ବଜାରର ସୁରକ୍ଷାକୁ ଦୃଷ୍ଟିରେ ରଖି ଆମେ ସେମାନଙ୍କୁ ସେଠାକୁ ପ୍ରବେଶ କରିବାକୁ ବାରଣ କରିଥିଲୁ, ଯାହାଫଳରେ ସଂଘର୍ଷ ହୋଇଥିଲା। ପରିସ୍ଥିତିକୁ ନିୟନ୍ତ୍ରଣ କରିବାର କୌଣସି ଉପାୟ ନାହିଁ ବୋଲି ସେ କହିଛନ୍ତି।

ଏହା ପୂର୍ବରୁ ଶୁକ୍ରବାର ରାତିରେ ପୁରୁଣା ଢାକାର ତନ୍ତୀ ବଜାର ଅଞ୍ଚଳରେ ଥିବା ଏକ ଦୁର୍ଗାପୂଜା ମଣ୍ଡପ ଉପରକୁ ବୋମାମାଡ଼ ହୋଇଥିଲା। ତେବେ ବୋମାରେ ନିଆଁ ଲାଗିଯିବାରୁ କେହି ଆହତ ହୋଇନଥିଲେ। ବାଂଲାଦେଶରେ ଶୁକ୍ରବାର ସୁଦ୍ଧା ଦୁର୍ଗାପୂଜା ପାଳନ ସମ୍ବନ୍ଧୀୟ ୩୫ଟି ଅପ୍ରୀତିକର ଘଟଣା ସାମ୍ନାକୁ ଆସିଥିଲା, ଯେଉଁଥିରେ ୧୭ ଜଣଙ୍କୁ ଗିରଫ କରାଯାଇଛି ଏବଂ ଏକ ଡଜନରୁ ଅଧିକ ମାମଲା ରୁଜୁ ହୋଇଛି। 

ସୂଚନାଯୋଗ୍ୟ ଗତ ଅଗଷ୍ଟ ୫ ତାରିଖରେ ବାଂଲାଦେଶରେ ହିଂସାତ୍ମକ ଛାତ୍ର ଆନ୍ଦୋଳନ ପରେ ପ୍ରଧାନମନ୍ତ୍ରୀ ଶେଖ ହସିନାଙ୍କ ନେତୃତ୍ବାଧୀନ ଆୱାମୀ ଲିଗ୍ ସରକାର ଭୁଶୁଡ଼ି ପଡ଼ିଥିଲା। ଏହି ସମୟରେ ସଂଖ୍ୟାଲଘୁ ହିନ୍ଦୁମାନେ ହିଂସାକାଣ୍ଡରେ ନିର୍ଯାତନାର ସମ୍ମୁଖୀନ ହୋଇଥିଲେ। ସେମାନଙ୍କ ବ୍ୟବସାୟପ୍ରତିଷ୍ଠାନ ଓ ସମ୍ପତ୍ତି ଭଙ୍ଗାରୁଜା କରାଯିବା ସହ ମନ୍ଦିର କ୍ଷତିଗ୍ରସ୍ତ ହୋଇଛି।

ଅଧିକ ପଢ଼ନ୍ତୁ: ବାଂଲାଦେଶରେ ହିନ୍ଦୁ କେତେ ସୁରକ୍ଷିତ?