ତେଲଅଭିଭ୍: ଇସ୍ରାଏଲ୍ ଏବଂ ଇରାନ ମଧ୍ୟରେ ଚାଲିଥିବା ଭୟଙ୍କର ଯୁଦ୍ଧ ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି। ଇସ୍ରାଏଲର ପ୍ରତିରକ୍ଷା ମନ୍ତ୍ରୀ ଇସ୍ରାଏଲ୍ କାଟଜ୍ ମଙ୍ଗଳବାର ଦିନ ଦାବି କରିଛନ୍ତି ଯେ, ଇସ୍ରାଏଲ୍ ସେନା ଇରାନର ପ୍ରଭାବଶାଳୀ ନେତା ତଥା ସୁପ୍ରିମ ନ୍ୟାସନାଲ ସିକ୍ୟୁରିଟି କାଉନସିଲର ସଚିବ ଅଲି ଲାରିଜାନୀଙ୍କୁ ଏକ ଏୟାରଷ୍ଟ୍ରାଇକ୍ ମାଧ୍ୟମରେ ହତ୍ୟା କରିଛି।

ଇସ୍ରାଏଲ୍ ମୁତାବକ, ଗତ ୨୮ ଫେବୃଆରୀରେ ଇରାନର ସର୍ବୋଚ୍ଚ ନେତା ଆୟାତୋଲା ଅଲି ଖାମେନେଇଙ୍କ ମୃତ୍ୟୁ ପରେ ଏହା ଇରାନ  ଉପରେ ସବୁଠାରୁ ବଡ଼ ଓ ଘାତକ ପ୍ରହାର। ଏହି ଆକ୍ରମଣରେ ଇରାନର ଅର୍ଦ୍ଧସାମରିକ ବଳ 'ବାସିଜ୍'ର କମାଣ୍ଡର ଘୋଲାମରେଜା ସୋଲେମାନୀ ଏବଂ ତାଙ୍କର ଡେପୁଟି ମଧ୍ୟ ନିହତ ହୋଇଥିବା ଇସ୍ରାଏଲ୍ ସେନା ଦାବି କରିଛି।

ଲାରିଜାନୀଙ୍କ ଭୂମିକା କିଏ 

ଖାମେନେଇଙ୍କ ମୃତ୍ୟୁ ପରେ ଲାରିଜାନୀ ଇରାନର ଦୈନନ୍ଦିନ କାର୍ଯ୍ୟକଳାପ ଏବଂ ନୀତି ନିର୍ଦ୍ଧାରଣରେ ମୁଖ୍ୟ ଭୂମିକା ଗ୍ରହଣ କରୁଥିଲେ। ସେ ପୂର୍ବରୁ ଇରାନ ସଂସଦର ବାଚସ୍ପତି ଏବଂ ପରମାଣୁ କାର୍ଯ୍ୟକ୍ରମର ଜଣେ ପ୍ରମୁଖ ବୁଝାମଣାକାରୀ ଭାବେ ଜଣାଶୁଣା ଥିଲେ।

ଇସ୍ରାଏଲର ପ୍ରତିକ୍ରିୟା: 

ଇସ୍ରାଏଲର ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, "ଲାରିଜାନୀ ଏବଂ ବାସିଜ୍ କମାଣ୍ଡରଙ୍କୁ ନିପାତ କରାଯାଇଛି ଏବଂ ସେମାନେ ବାୟୁ ଆକ୍ରମଣରେ ନିହତ ହୋଇଥିବା ଅନ୍ୟ ନେତାଙ୍କ ସହ ସାମିଲ ହୋଇଛନ୍ତି।" ଇସ୍ରାଏଲ୍ ସେନା ମୁଖ୍ୟ ଲେଫ୍ଟନାଣ୍ଟ ଜେନେରାଲ୍ ଏୟାଲ୍ ଜାମିର ଏହି ଅପରେସନକୁ ଏକ ବଡ଼ ସଫଳତା ବୋଲି ବର୍ଣ୍ଣନା କରିଛନ୍ତି।

ଇରାନର ଦାବି

ଇରାନ ପକ୍ଷରୁ ଏହି ଖବରକୁ ନେଇ କୌଣସି ସ୍ପଷ୍ଟ ସୂଚନା ଦିଆଯାଇ ନାହିଁ। କେତେକ ରିପୋର୍ଟ ଅନୁଯାୟୀ, ଇରାନର ସରକାରୀ ଗଣମାଧ୍ୟମ ଲାରିଜାନୀଙ୍କ ଜୀବିତ ଥିବାର ପ୍ରମାଣ ଦେବାକୁ ଚେଷ୍ଟା କରିଥିଲେ ହେଁ, ଇସ୍ରାଏଲ୍ ଗୁଇନ୍ଦା ସଂସ୍ଥା ତାଙ୍କ ମୃତ୍ୟୁ ଉପରେ ଦୃଢ଼ ବିଶ୍ୱାସ ରଖିଛି। ଏହି ଘଟଣା ପରେ ପଶ୍ଚିମ ଏସିଆରେ ଉତ୍ତେଜନା ଚରମ ସୀମାରେ ପହଞ୍ଚିଛି ଏବଂ ଇରାନ ପକ୍ଷରୁ ବଡ଼ ପ୍ରତିଶୋଧର ଆଶଙ୍କା କରାଯାଉଛି।