ୱାଶିଂଟନ: ଡୋନାଲ୍ଡ ଟ୍ରମ୍ପ ଆମେରିକାରେ ଶପଥ ଗ୍ରହଣ କରିବା ପରେ ତାଙ୍କ ପ୍ରଶାସନ ଇମିଗ୍ରେସନ ବିରୋଧରେ କାର୍ଯ୍ୟାନୁଷ୍ଠାନକୁ ତୀବ୍ର କରିବାକୁ ଯୋଜନା କରିଥିଲା। ଯୋଜନା ସମ୍ପର୍କରେ ଅବଗତ ଥିବା ଜଣେ ଅଧିକାରୀ କହିଛନ୍ତି, ଆମେ ସାରା ଦେଶରେ ଏକ ଅଭିଯାନ ଚଳାଇବାକୁ ଯାଉଛୁ। ନ୍ୟୁୟର୍କରେ ଗିରଫଦାରୀ ଦେଖିବାକୁ ମିଳିପାରେ। ମିଆମିରେ ମଧ୍ୟ ଗିରଫଦାରୀ ଦେଖିବାକୁ ମିଳିବ। ଇମିଗ୍ରେସନ୍ ବିରୋଧରେ ବଡ଼ଧରଣର ଅଭିଯାନ ଆରମ୍ଭ ହେବ। ମଙ୍ଗଳବାର ଶିକାଗୋରେ ଇମିଗ୍ରେସନ ବିରୋଧରେ ପ୍ରଶାସନ ଏକ ବଡ଼ଧରଣର ଅଭିଯାନ ଚଳାଇବାକୁ ଯୋଜନା କରୁଛି ବୋଲି ୱାଲ୍ ଷ୍ଟ୍ରିଟ୍ ଜର୍ଣ୍ଣାଲରେ ପ୍ରକାଶିତ ରିପୋର୍ଟଉପରେ ପ୍ରତିକ୍ରିୟା ରଖି ଅଧିକାରୀ ଜଣକ ଏହା କହିଛନ୍ତି। 

ଏହି ଯୋଜନା ସମ୍ପର୍କରେ ଅବଗତ ଥିବା ୪ ଜଣ ଅଧିକାରୀଙ୍କ ବୟାନ ଦେଇ ଖବରକାଗଜ କହିଛି ଯେ ଚିକାଗୋରେ ଏହି ଅପରେସନ୍ ପୂରା ଏକ ସପ୍ତାହ ପର୍ଯ୍ୟନ୍ତ ଚାଲିବ। ଏହି ଅପରେସନ ପାଇଁ ଆମେରିକାର ଇମିଗ୍ରେସନ ଆଣ୍ଡ କଷ୍ଟମ ଏନଫୋର୍ସମେଣ୍ଟ ୧୦୦ରୁ ୨୦୦ ଅଫିସରଙ୍କୁ ନିୟୋଜିତ କରିବ। ନିର୍ବାଚନ ପ୍ରଚାର ସମୟରେ ଟ୍ରମ୍ପ ଇମିଗ୍ରେସନ ପ୍ରସଙ୍ଗକୁ ଗୁରୁତ୍ୱର ସହ ଉଠାଇଥିଲେ।

ଜାନୁଆରୀ ୨୦୨୪ରେ ଟ୍ରମ୍ପ କହିଥିଲେ ଯେ ମୋର ଶପଥ ଗ୍ରହଣର ମୁହୂର୍ତ୍ତ ମଧ୍ୟରେ ଆମେ ଆମେରିକୀୟ ଇତିହାସରେ ସର୍ବବୃହତ ଘରୋଇ ପ୍ରତ୍ୟର୍ପଣ ଅଭିଯାନ ଆରମ୍ଭ କରିବୁ। ସେପଟେ ଟ୍ରମ୍ପ ପ୍ରଶାସନରେ ସୀମା ଜାର ତିଆରି କରୁଥିବା ଟମ୍ ହୋମାନ ଶନିବାର କହିଛନ୍ତି ଯେ ଆମେରିକାରେ ବେଆଇନ ଭାବେ ରହୁଥିବା ପ୍ରବାସୀଙ୍କୁ ଅଟକ ରଖିବା ପାଇଁ ଅଭିଯାନ ଆସନ୍ତା ସପ୍ତାହରେ ଆରମ୍ଭ ହେବ। ଏଥିରେ ଅନେକ ସହର ସାମିଲ ହେବେ ବୋଲି ସେ ସଙ୍କେତ ଦେଇଛନ୍ତି।