ଢାକା: ବାଂଲାଦେଶର ପ୍ରତିଷ୍ଠାତା ଶେଖ ମୁଜିବୁର ରହମାନଙ୍କ ବାସଭବନକୁ ପ୍ରଦର୍ଶନକାରୀଙ୍କ ଦ୍ୱାରା ଭାଙ୍ଗି ଦିଆଯିବା ଘଟଣାରେ ଭାରତ ଯେଉଁ ଦୁଃଖ ପ୍ରକାଶ କରିଛି, ସେଥିରେ ବାଂଲାଦେଶ କ୍ରୋଧିତ ଦେଖାଯାଇଛି। ମଧ୍ୟବର୍ତ୍ତୀକାଳୀନ ସରକାର ରବିବାର ଦିନ ଏହାକୁ ଦେଶର ଆଭ୍ୟନ୍ତରୀଣ ମାମଲା ବୋଲି କହିଛନ୍ତି ଏବଂ ଏହି ଘଟଣା ଉପରେ ଭାରତର ମନ୍ତବ୍ୟ ଅପ୍ରତ୍ୟାଶିତ ଏବଂ ଅନୁପଯୁକ୍ତ ବୋଲି କହିଛନ୍ତି।

ଗତ ବୁଧବାର, ହଜାର ହଜାର ପ୍ରଦର୍ଶନକାରୀ ଢାକାସ୍ଥିତ ଶେଖ୍‌ ମୁଜିବୁରଙ୍କ ବାସଭବନରେ ନିଆଁ ଲଗାଇ ଦେଇଥିଲେ। ସେ ଏହି ବାସଭବନରୁ ଦେଶର ସ୍ୱାଧୀନତା ସଂଗ୍ରାମର ନେତୃତ୍ୱ ନେଇଥିଲେ। ଏହି ଘରକୁ ପରେ ଏକ ସ୍ମାରକୀରେ ପରିଣତ କରାଯାଇଥିଲା।

ବାଂଲାଦେଶର ପ୍ରତିଷ୍ଠାତା ମୁଜିବୁର ରହମାନଙ୍କ ବାସଭବନ ଉପରେ ଅଗ୍ନିକାଣ୍ଡ ନେଇ ଗୁରୁବାର ଦୁଃଖ ପ୍ରକାଶ କରିଛି ଏବଂ କହିଛି ଯେ ଏହି ବର୍ବର କାର୍ଯ୍ୟକୁ ଦୃଢ଼ ନିନ୍ଦା କରାଯିବା ଉଚିତ। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ କହିଥିଲେ ଯେ ଶେଖ ମୁଜିବୁରଙ୍କ ଐତିହାସିକ ବାସଭବନ ଧ୍ୱଂସ ହେବା ଦୁଃଖଦ। ଏହା ଆଧିପତ୍ୟ ଏବଂ ଅତ୍ୟାଚାରର ଶକ୍ତି ବିରୁଦ୍ଧରେ ବାଂଲାଦେଶର ଲୋକଙ୍କ ପ୍ରତିରୋଧର ପ୍ରତୀକ ଥିଲା।

ଭାରତର ମନ୍ତବ୍ୟ ଉପରେ ପ୍ରତିକ୍ରିୟା ଦେଇ ବାଂଲାଦେଶ ବୈଦେଶିକ ମନ୍ତ୍ରଣାଳୟର ମୁଖପାତ୍ର ମହମ୍ମଦ ରଫିକୁଲ ଆଲାମ କହିଛନ୍ତି ଯେ ୩୨ ଧାନମୋଣ୍ଡିରେ ଘଟିଥିବା ଘଟଣା ଦେଶର ଆଭ୍ୟନ୍ତରୀଣ ମାମଲା। ବାଂଲାଦେଶର ଆଭ୍ୟନ୍ତରୀଣ ବ୍ୟାପାର ଉପରେ ଭାରତୀୟ ବୈଦେଶିକ ମନ୍ତ୍ରଣାଳୟର ଏପରି ମନ୍ତବ୍ୟ ଅପ୍ରତ୍ୟାଶିତ ଏବଂ ଅନୁପଯୁକ୍ତ। ବାଂଲାଦେଶ କୌଣସି ଦେଶର ଆଭ୍ୟନ୍ତରୀଣ ବ୍ୟାପାର ଉପରେ ଆନୁଷ୍ଠାନିକ ଭାବରେ ମନ୍ତବ୍ୟ ଦିଏ ନାହିଁ ଏବଂ ଅନ୍ୟ ଦେଶଠାରୁ ସମାନ ଆଚରଣ ଆଶା କରେ।

ଅଧିକ ପଢ଼ନ୍ତୁ: ପାକିସ୍ତାନରେ ଆତଙ୍କବାଦୀଙ୍କ ଉପରେ ସୁରକ୍ଷା ବାହିନୀର କାର୍ଯ୍ୟାନୁଷ୍ଠାନ