ବହୁପ୍ରତୀକ୍ଷିତ ସିନେମା ‘ରାମୟଣ’ର ରିଲିଜକୁ ନେଇ ଫ୍ୟାନ୍ସଙ୍କ ମଧ୍ୟରେ ଦୀର୍ଘ ଦିନ ହେଲା ଉତ୍କଣ୍ଠା ଲାଗିରହିଛି । ସିନେମାରେ ରାମ ଭୂମିକାରେ ରଣବୀର କପୁର ରହିଥିବା ବେଳେ ରାବଣ ଭୂମିକାରେ ନଜର ଆସିବେ କେଜିଏଫ ଷ୍ଟାର ୟଶ । ଏବେ ସନ୍ନିଦେଓଲ ରାମାୟଣ ଫିଲ୍ମରେ ନଜର ଆସିବା ପ୍ରସଙ୍ଗ ଫ୍ୟାନ୍ସଙ୍କ ପାଇଁ ଖୁସିଖବର ପାଲଟିଛି । ପୂର୍ବରୁ ସେ ଏହି ଫିଲ୍ମରେ ରହିବା ନେଇ କେବଳ ଚର୍ଚ୍ଚା ହେଉଥିଲା, ଏବେ ନିଜେ ସନ୍ନି ଏନେଇ ସ୍ପଷ୍ଟ କରିବା ପରେ ଫ୍ୟାନ୍ସଙ୍କ ଖୁସି କହିଲେ ନସରେ । ତେବେ ସିନେମାରେ ସନ୍ନି କେଉଁ ଭୂମିକାରେ ନଜର ଆସିବେ ତାହା ଏବେ ଯାଏଁ ସ୍ପଷ୍ଟ ହୋଇପାରିନାହିଁ । ହେଲେ ସେ ହନୁମାନ ଭୂମିକାରେ ନଜର ଆସିପାରନ୍ତି ବୋଲି ଅନୁମାନ କରୁଛନ୍ତି ଫ୍ୟାନ୍ସ ।  

ସିନେମାକୁ ନେଇ ସନ୍ନି କହିଛନ୍ତି, ଏହା ‘ଅବତାର’ ସିନେମା ଭଳି ଏକ ଲମ୍ବା ପ୍ରୋଜେକ୍ଟ । ଫିଲ୍ମଟି ‘ଅବତାର’ ଭଳି ନିର୍ମାଣ ହେବାକୁ ଯାଉଛି । ‘ଅବତାର’ରେ କାମ କରୁଥିବା ସମସ୍ତ ଟେକ୍ନିସିଆନ୍ ଏହି ସିନେମାରେ ରହିଛନ୍ତି । ତେଣୁ ଏହି ସିନେମାରେ ସ୍ପେଶାଲ ଇଫେକ୍ଟ ସହ ଥ୍ରୀଡି ଦେଖିବାକୁ ପାଇବେ ଦର୍ଶକ । ସନ୍ନିଙ୍କ ପୂର୍ବରୁ ରଣବୀର କପୁର ମଧ୍ୟ ଫିଲ୍ମକୁ ନେଇ ନିଜ ମତ ରଖିଥିଲେ । ସିନେମା ‘ରାମୟଣ’ ଦୁଇଟି ଭାଗରେ ନିର୍ମାଣ ହେବାକୁ ଯାଉଛି । ସିନେମାର ପ୍ରଥମ ଭାଗର ସୁଟିଂ ଶେଷ ହୋଇଥିବା ବେଳେ ଦ୍ୱିତୀୟ ଭାଗର ସୁଟିଂ ଖୁବଶୀଘ୍ର ଆରମ୍ଭ ହେବ । ଫିଲ୍ମର ମୁଖ୍ୟଭୂୁମିକା ଅର୍ଥାତ ରାମ ଭୂମିକାରେ ନଜର ଆସିଥିବାରୁ ସେ ବେଶ୍ ଖୁସି ଅଛନ୍ତି । ତେବେ ଏହି ସିନେମାଟି ଭାରତୀୟ ସଂସ୍କୃତିକୁ ଦେଖାଉଛି । ଏଥିରେ କାମ କରିବା ନିଜର ସ୍ୱପ୍ନ ଥିବା କହିଛନ୍ତି ରଣବୀର । 

ଏବେ ସୁଦ୍ଧା ନିର୍ମାତା ରାମୟଣର ରିଲିଜ ଡେଟ ଘୋଷଣା କରିନାହାନ୍ତି । କେବଳ ଫିଲ୍ମର ପ୍ରଥମ ଭାଗ ୨୦୨୬ରେ ଆସିବାକୁ ଥିବାବେଳେ ଏହାର ଦ୍ୱିତୀୟ ଭାଗ ୨୦୨୭ ଦିପାବଳୀ ଅବସରରେ ରିଲିଜ କରାଯିବା ନେଇ କହିଛନ୍ତି ।