ନୂଆଦିଲ୍ଲୀ: ଅଲ୍ଲୁ ଅର୍ଜୁନ ଓ ରଶ୍ମିକା ମନ୍ଦାନାଙ୍କ ଫିଲ୍ମ ‘ପୁଷ୍ପା ୨’ ଭାରତୀୟ ବକ୍ସ ଅଫିସରେ ଧମାଲ କରିଛି । ଫିଲ୍ମ ପ୍ରଥମ ଦିନର କଲେକ୍ସନରେ କେଜିଏଫ ୨ ଓ ବାହୁବଳୀ ୨ ପରି ବ୍ଲକବଷ୍ଟର ଫିଲ୍ମକୁ ପଛରେ ପକାଇ ଦେଇଛି । କେବଳ ଏତିକି ନୁହେଁ ଏକ ନୂଆ ରେକର୍ଡ ନିଜ ନାଁରେ କରିଛି ପୁଷ୍ପା ୨ । ଫିଲ୍ମକୁ ନେଇ ନାହିଁ ନ ଥିବା ଉତ୍ସାହ ଦେଖିବାକୁ ମିଳିଛି ।

ସାକନିଲର ରିପୋର୍ଟ ଅନୁଯାୟୀ, ପ୍ରଥମ ଦିନରେ ରାମ ଚରଣ ଓ ଜୁନିୟର ଏନଟିଆରଙ୍କ ଫିଲ୍ମ ଆରଆରଆର ଭାରତୀୟ ବକ୍ସ ଅଫିସରେ ୧୩୩ କୋଟି ଟଙ୍କା, ପ୍ରଭାସଙ୍କ ବାହୁବଳୀ ୨ ଫିଲ୍ମ ୧୨୧ କୋଟି ଓ ୟଶଙ୍କ କେଜିଏଫ ୨ ଫିଲ୍ମ ୧୧୬ କୋଟି ଟଙ୍କାର ବକ୍ସଅଫିସ କଲେକ୍ସନ କରିଥିଲେ । କିନ୍ତୁ ଅଲ୍ଲୁ ଅର୍ଜୁନଙ୍କ ପୁଷ୍ପା ୨ ଗୁରୁବାର ରାତି ୧୦ଟା ସୁଦ୍ଧା କେବଳ ଭାରତୀୟ ବକ୍ସ ଅଫିସରେ ୧୬୩ କୋଟି ଟଙ୍କାର କାରବାର କରି ସାରିଛି । ଆଉ ଏହି ଫିଲ୍ମ ଆରଆରଆର, ବାହୁବଳୀ ୨ ଓ କେଜିଏଫ ୨କୁ ବହୁ ପଛରେ ପକାଇ ଦେଇଛି ।

ଫିଲ୍ମ ତେଲୁଗୁ ଭର୍ସନରେ ୮୫ କୋଟି ଟଙ୍କା, ହିନ୍ଦୀ ଭର୍ସନରେ ୬୫ କୋଟି, ତାମିଲ ଭର୍ସନରେ ୭ କୋଟି, କନ୍ନଡ ଭର୍ସନରେ ୧ କୋଟି ଓ ମାଲାୟଲମ ଭର୍ସନରେ ୫ କୋଟି ଟଙ୍କାର କାରବାର କରିଛି । ଏହିପରି ପୁଷ୍ପା ୨ ଗୁରୁବାର ପ୍ରଥମ ଦିନରେ ତେଲୁଗୁ ଓ ହିନ୍ଦୀ ଉଭୟ ଭାଷାରେ ୫୦ କୋଟିରୁ ଅଧିକ କାରବାର କରିଛି । ଭାରତୀୟ ଫିଲ୍ମ ଇତିହାସରେ ଏହା ପ୍ରଥମ ଥର ଘଟିଛି, ଯେଉଁଠି ଫିଲ୍ମ ଗୋଟିଏ ଦିନରେ ଦୁଇ ଭିନ୍ନ ଭିନ୍ନ ଭାଷାରେ ୫୦-୫୦ କୋଟି ଟଙ୍କାରୁ ଅଧିକ ବ୍ୟବସାୟ କରିଛି ।