ନୂଆଦିଲ୍ଲୀ: ରିଲିଜ୍ ହେବା ପରଠୁ ବକ୍ସ ଅଫିସରେ ଥମିବାର ନାଁ ନେଉନି ସାଉଥ ସୁପରଷ୍ଟାର ଅଭିନେତା ଅଲ୍ଲୁ ଅର୍ଜୁନଙ୍କ ଫିଲ୍ମ ‘ପୁଷ୍ପା-୨ ଦ ରୁଲ୍’ର ସୁନାମୀ । ରୋଜଗାର ମାମଲାରେ ଫିଲ୍ମ ଦିନକୁ ଦିନ ରେକର୍ଡ କରି ଚାଲିଛି । ଏହି କ୍ରମରେ ଫିଲ୍ମର ଓ୍ଵାର୍ଲ୍ଡଓ୍ଵାଇଡ୍ କଲେକ୍ସନ ପାଖାପାଖି ହଜାରେ କୋଟି ପହଞ୍ଚିଲାଣି। ଖୁବ୍ ଅଳ୍ପ ଦିନରେ ବକ୍ସ ଅଫିସ କଲେକ୍ସନ ଏମିତି ରହିବାରେ ଏହା ପ୍ରଥମ ଫିଲ୍ମ। ରିପୋର୍ଟ ଅନୁଯାୟୀ, ଭାରତୀୟ ବକ୍ସ ଅଫିସ୍ରେ ପୁଷ୍ପା-୨ ଏ ପର୍ୟ୍ୟ ନ୍ତ ୬୪୫ କୋଟି ୯୫ ଲକ୍ଷ ଟଙ୍କା ଆୟ କରି ସାରିଲାଣି। ଦେଶରେ ତେଲୁଗୁ ଓ ହିନ୍ଦୀ ଭର୍ସନରେ ଫିଲ୍ମ ରାଜ୍ କରି ଚାଲିଛି ।
ଫିଲ୍ମର ପ୍ରଥମ ଭାଗ ବ୍ଲକବଷ୍ଟର ରହିଥିବା ବେଳେ ଦ୍ଵିତୀୟ ଭାଗକୁ ଦର୍ଶକ ଦୀର୍ଘ ସମୟ ଧରି ଅପେକ୍ଷା କରି ରହିଥିଲେ। ରିଲିଜର ପ୍ରଥମ ଦିନ ଡିସେମ୍ବର ୫ ତାରିଖରେ ୨୯୪ କୋଟି ଟଙ୍କା ଆୟ କରି ପ୍ରଥମ ଦିନ ବକ୍ସ କଲେକ୍ସନରେ ସବୁ ରେକର୍ଡ ଭାଙ୍ଗିଥିଲା ପୁଷ୍ପା ୨। ଆଉ ତା ପରଠୁ ଫିଲ୍ମ ନାଁରେ ଗୋଟିଏ ପରେ ଗୋଟିଏ ରେକର୍ଡ ଯୋଡି ହୋଇ ଚାଲିଛି। ସୋମବାର ଟେଷ୍ଟରେ ଫିଲ୍ମ କେବଳ ପାସ୍ କରି ନ ଥିଲା ବରଂ ୬୪ କୋଟି ଟଙ୍କାର ଦମଦାର କାରବାର କରିଥିଲା । ମଙ୍ଗଳବାର ଖବର ଲେଖା ଯିବା ସୁଦ୍ଧା ପୁଷ୍ପା ୨ ଭାରତୀୟ ବକ୍ସ ଅଫିସ୍ରେ ୫୨ କୋଟି ୨୦ ଲକ୍ଷ ଟଙ୍କା ଆୟ କରି ସାରିଛି।
ମାତ୍ର ପାଞ୍ଚ ଦିନରେ ଫିଲ୍ମ ୯୦୦ କୋଟିର ବ୍ୟବସାୟ କରି ସାରିଲାଣି। ଷଷ୍ଠ ଦିନ ଅର୍ଥାତ ମଙ୍ଗଳବାରର ଆୟକୁ ମିଶାଇଲେ ଏହା ୯୫୦ କୋଟି ଟଙ୍କା ଛୁଇଁଛି। ତେବେ ଫିଲ୍ମର ବକ୍ସ ଅଫିସ କଲେକ୍ସନର ପ୍ରକୃତ ତଥ୍ୟ ବୁଧବାର ଜାରି କରାଯିବ। ମାତ୍ର ସାକନିଲ୍କର ରିପୋର୍ଟ ମୁତାବକ ଫିଲ୍ମ ରିଲିଜର ସାତ ନମ୍ବର ଦିନ ସୁଦ୍ଧା ୧୦୦୦ କୋଟି କ୍ଲବରେ ସାମିଲ ହୋଇଯିବ ଅଲ୍ଲୁ ଅର୍ଜୁନଙ୍କ ଏହି ଫିଲ୍ମ।
ଆଇଏମଡିବିର ରିପୋର୍ଟ ମୁତାବକ ଏ ପର୍ଯ୍ୟନ୍ତ ୧୦୦୦ କୋଟି କ୍ଲବରେ ସାମିଲ ହୋଇଥିବା ଫିଲ୍ମ ହେଉଛି ଦଙ୍ଗଲ, ବାହୁବଳୀ ୨, ଆରଆରଆର ଓ କେଜିଏଫ। ଏହି ସବୁ ଫିଲ୍ମ ଭାରତ ସହିତ ବିଦେଶରେ ଧମାଲ ମଚାଇଥିଲେ । ଆଉ ଆଗାମୀ ଦିନରେ ପୁଷ୍ପା ୨ ଏହି ସବୁ ଫିଲ୍ମର ମୋଟ୍ ଆୟର ରେକର୍ଡ କାଟି ଦେବ ।