ବଲିଉଡ୍ ର ଖିଲାଡୀ ଅକ୍ଷୟ କୁମାର, ସୁନୀଲ ସେଟ୍ଟୀ ଏବଂ ଶିଳ୍ପା ସେଟ୍ଟୀଙ୍କ ଅଭିନୀତ ଫିଲ୍ମ ‘ଧଡକନ୍‌’ ୨୦୦୦ରେ ରିଲିଜ ହୋଇଥିଲା । ଏହି ଫିଲ୍ମଟିରେ ସମସ୍ତ କଳାକାରମାନେ ଚମତ୍କାର ଅଭିନୟ କରି ଦର୍ଶକଙ୍କର ମନ ଜିତିଥିଲେ । କାହାଣୀଠାରୁ ଆରମ୍ଭ କରି ଏହାର ଗୀତଗୁଡ଼ିକ ବେଶ ମନଛୁଆଁ ହୋଇଥିଲା। ଆଜି ମଧ୍ୟ ଲୋକେ ଏହି ଫିଲ୍ମକୁ ଦେଖିବାକୁ ପସନ୍ଦ କରନ୍ତି। ତେବେ ଏହି ଫିଲ୍ମର ଲୋକପ୍ରିୟତାକୁ ନେଇ ଖୁବ୍‌ଶୀଘ୍ର ନିର୍ମାଣ ହେବାକୁ ଯାଉଛି 'ଧଡକନ୍‌'ର ସିକ୍ୱେଲ । ‘ଗଦର ୨’ ଏବଂ 'ଓଏମଜି ୨' ର ସଫଳତାକୁ ଦେଖି ନିର୍ମାତା ‘ଧଡକନ୍‌ ୨’ ଆଣିବାକୁ ଯୋଜନା କରୁଛନ୍ତି।

ସୂଚନା ଅନୁଯାୟୀ, ଏକ ସାକ୍ଷାତକାରରେ ଫିଲ୍ମ ‘ଧଡକନ୍‌’ ର ନିର୍ଦ୍ଦେଶକ ଧର୍ମେଶ ଦର୍ଶନ କହିଛନ୍ତି ଯେ,  ଅନେକ ଲୋକ ମୋତେ ପ୍ରଶ୍ନ କରିଥିଲେ ଯେ କେବେ ଏହି ଫିଲ୍ମର ସିକ୍ୱେଲ କରିବେ ? ଯେତେବେଳେ କେହି ମୋର ଅତୀତରେ କରିଥିବା କାମକୁ ପସନ୍ଦ କରନ୍ତି ଖୁସି ଲାଗେ।  ଆଜି ବି ଲୋକେ ‘ଧଡକନ୍‌’କୁ ମନେ ପକାନ୍ତି। ଏହାସହ ରାଜା ହିନ୍ଦୁସ୍ତାନୀ ଫିଲ୍ମର ସିକୁଏଲ କରିବାକୁ ପଚାରନ୍ତି। ଏଥିପାଇଁ ସେ ଫିଲ୍ମର ସିକୁଏଲ୍‌ କରିବେ ବୋଲି ସୂଚନା ଦେଇଛନ୍ତି । ଫିଲ୍ମର ନିର୍ମାତା ରତନ ଜୈନ ତାଙ୍କୁ ଏହି ଅଫର ଦେଇଛନ୍ତି। ଏନେଇ ସେମାନେ କଥା ହୋଇଛନ୍ତି । ତେବେ ଏହା ଧଡକନ୍‌ ଫିଲ୍ମ ଭଳି ହିଟ୍‌ ହେବ କି ନାହିଁ ତାହା ଜଣାନାହିଁ ବୋଲି ସେ କହିଛନ୍ତି। ଏହାଛଡ଼ା ସେ ପୁରୁଣା କଳାକାର ଏଥିରେ କାମ କରିବେ କି ନାହିଁ ସେ ନେଇ କିଛି ସୂଚନା ଦେଇନାହାନ୍ତି ।