ନ୍ୟାସନାଲ କ୍ରାଇମ ରେକର୍ଡସ୍ ବ୍ୟୁରୋ (NCRB) ର ସଦ୍ୟତମ ତଥ୍ୟ ଅନୁଯାୟୀ, ସାରା ଦେଶରେ ମୋଟ ଅପରାଧ ମାମଲାରେ ୬% ହ୍ରାସ ରେକର୍ଡ କରାଯାଇଛି। କିନ୍ତୁ ରାଜଧାନୀ ଦିଲ୍ଲୀରେ ନାବାଳକଙ୍କ ଦ୍ୱାରା ସଂଘଟିତ ଅପରାଧ ସଂଖ୍ୟା ଏବେ ବି ଶୀର୍ଷରେ ରହିଛି। ୨୦୨୪ ମସିହାରେ ଦିଲ୍ଲୀରେ ନାବାଳକଙ୍କ ଦ୍ୱାରା ୨,୩୦୬ଟି ଅପରାଧିକ ମାମଲା ପଞ୍ଜିକୃତ ହୋଇଛି, ଯାହା ୨୦୨୩ର ୨,୨୭୮ ମାମଲା ତୁଳନାରେ ସାମାନ୍ୟ ଅଧିକ।

NCRB ପକ୍ଷରୁ ଜାରି କରାଯାଇଥିବା ସଦ୍ୟତମ ତଥ୍ୟ ଅନୁଯାୟୀ, ଭାରତରେ ୨୦୨୪ ମସିହାରେ ୫୮.୮୫ ଲକ୍ଷ ଅପରାଧିକ ମାମଲା ପଞ୍ଜିକୃତ ହୋଇଛି। ଏହି ତଥ୍ୟକୁ ଅନୁଧ୍ୟାନ କଲେ ଜଣାପଡ଼େ ଯେ, ୨୦୨୩ ତୁଳନାରେ ଏଥିରେ ୬ ପ୍ରତିଶତ ହ୍ରାସ ଘଟିଛି। ୨୦୨୩ରେ ୬୨.୪୧ ଲକ୍ଷ ମାମଲା ସାମ୍ନାକୁ ଆସିଥିଲା। ଅନ୍ୟପଟେ ଦେଶର ସମସ୍ତ ମହାନଗର ମଧ୍ୟରେ ଦିଲ୍ଲୀରେ ନାବାଳକଙ୍କ ଦ୍ୱାରା କରାଯାଇଥିବା ଅପରାଧ ସଂଖ୍ୟା ସବୁଠାରୁ ଅଧିକ ରହିଛି। ରିପୋର୍ଟ ଅନୁଯାୟୀ, ଜାତୀୟ ରାଜଧାନୀ ସମେତ ଅନ୍ୟ ୧୮ଟି ମହାନଗରରେ ମଧ୍ୟ ୨୦୨୩ ତୁଳନାରେ ୨୦୨୪ରେ ନାବାଳକ ଅପରାଧ ସଂଖ୍ୟାରେ ସାମାନ୍ୟ ବୃଦ୍ଧି ପରିଲକ୍ଷିତ ହୋଇଛି।

NCRB ତଥ୍ୟ ମୁତାବକ, ଦିଲ୍ଲୀରେ ୨୦୨୪ରେ ନାବାଳକଙ୍କ ଦ୍ୱାରା ୨,୩୦୬ଟି ଅପରାଧିକ ମାମଲା ସାମ୍ନାକୁ ଆସିଛି। ଏହା ୨୦୨୩ରେ ପଞ୍ଜିକୃତ ହୋଇଥିବା ୨,୨୭୮ଟି ମାମଲାଠାରୁ ସାମାନ୍ୟ ଅଧିକ, କିନ୍ତୁ ୨୦୨୨ର ୨,୩୩୬ଟି ମାମଲା ତୁଳନାରେ କମ୍। ଦିଲ୍ଲୀରେ ଏହି ସଂଖ୍ୟା ଚେନ୍ନାଇ (୪୬୬), ବେଙ୍ଗାଲୁରୁ (୩୮୬), ହାଇଦ୍ରାବାଦ (୩୧୬) ଏବଂ ଅହମ୍ମଦାବାଦ (୨୯୫) ଭଳି ଅନ୍ୟ ମହାନଗର ଅପେକ୍ଷା ଯଥେଷ୍ଟ ଅଧିକ।

ବରିଷ୍ଠ ନାଗରିକଙ୍କ ବିରୋଧରେ ଅପରାଧ

ରାଜଧାନୀରେ ୨୦୨୨ ରୁ ୨୦୨୪ ମଧ୍ୟରେ ବରିଷ୍ଠ ନାଗରିକଙ୍କ ବିରୋଧରେ ହେଉଥିବା ଅପରାଧିକ ମାମଲାରେ ହ୍ରାସ ଘଟିଛି, ଯଦିଓ ସମସ୍ତ ମହାନଗର ତୁଳନାରେ ଦିଲ୍ଲୀରେ ଏହି ସଂଖ୍ୟା ସର୍ବାଧିକ ରହିଛି। ୨୦୨୪ରେ ଦିଲ୍ଲୀରେ ଏଭଳି ୧,୨୬୭ଟି ମାମଲା ସାମ୍ନାକୁ ଆସିଥିଲା, ଯାହା ୨୦୨୩ର ୧,୩୬୧ ଏବଂ ୨୦୨୨ର ୧,୩୧୩ ମାମଲା ତୁଳନାରେ କମ୍। ୨୦୨୪ରେ ପ୍ରତି ଏକ ଲକ୍ଷ ଜନସଂଖ୍ୟାରେ ଅପରାଧ ହାର ୪୧୯ ରହିଛି, ଯାହା ୨୦୨୩ର ୪୪୮ ତୁଳନାରେ କମ୍ ଏବଂ ୨୦୧୯ ପରଠାରୁ ସବୁଠାରୁ କମ୍। ୨୦୧୯ରେ ଏହି ସଂଖ୍ୟା ୩୮୫ ଥିଲା।

ଭାରତୀୟ ଦଣ୍ଡ ସଂହିତା (IPC) ଏବଂ ଭାରତୀୟ ନ୍ୟାୟ ସଂହିତା (BNS), ଯାହାକି IPC ର ନୂତନ ରୂପ ଏବଂ ୨୦୨୪ ମଧ୍ୟଭାଗରେ ଲାଗୁ କରାଯାଇଥିଲା। ଏହା ଅଧୀନରେ ପଞ୍ଜିକୃତ ଅପରାଧ ଯୋଗୁଁ ହିଁ ମୋଟ ଅପରାଧ ସଂଖ୍ୟାରେ ସବୁଠାରୁ ଅଧିକ ହ୍ରାସ ଆସିଛି। ଗତ ବର୍ଷ ତୁଳନାରେ ୨୦୨୪ରେ IPC/BNS ଅଧୀନରେ ଅପରାଧ ୦.୨୨ ମିଲିୟନ କମି ୩.୫୪ ମିଲିୟନ ହୋଇଛି। ସେହିପରି ବିଶେଷ ଏବଂ ସ୍ଥାନୀୟ ଆଇନ (SLL) ଅଧୀନରେ ଅପରାଧ ୦.୧୪ ମିଲିୟନ କମି ୨.୩୪ ମିଲିୟନରେ ପହଞ୍ଚିଛି।

କେଦାରନାଥ ଧାମରେ ସନ୍ଦିଗ୍ଧ ଯୁବକଙ୍କଠାରୁ ଧାରୁଆ ଅସ୍ତ୍ର ଜବତ, ପୋଲିସ ଚିନ୍ତିତ

୨୦୨୩ରେ କ’ଣ ଥିଲା ପରିସଂଖ୍ୟାନ?

ଏହା ମଧ୍ୟ ଧ୍ୟାନ ଦେବା ଯୋଗ୍ୟ ଯେ, ଚାର୍ଜସିଟ୍ ଦାଖଲ ହାର, ପୋଲିସ ନିକଟରେ ବିଚାରାଧୀନ ମାମଲା ଏବଂ ଅଦାଲତରେ ଦୋଷୀ ସାବ୍ୟସ୍ତ ହେବା ହାର ୨୦୨୩ ସ୍ତର ସହିତ ପ୍ରାୟ ସମାନ ରହିଛି। IPC/BNS ଅପରାଧରେ ଚାର୍ଜସିଟ୍ ଦାଖଲ ହାରରେ ସାମାନ୍ୟ ହ୍ରାସ ଘଟିଛି। ୨୦୨୩ରେ ଏହା ୭୨.୭% ଥିବା ବେଳେ ୨୦୨୪ରେ ୭୨.୧% କୁ ଖସିଛି। ବିଚାରାଧୀନ ମାମଲା ହାର ୨୯.୨% ରୁ ବୃଦ୍ଧି ପାଇ ୩୧.୨% ହୋଇଛି। SLL ଅପରାଧରେ ଚାର୍ଜସିଟ୍ ଦାଖଲ ହାର ସାମାନ୍ୟ ବୃଦ୍ଧି ପାଇ ୯୧.୯% ରୁ ୯୨.୭% ହୋଇଛି, କିନ୍ତୁ ବିଚାରାଧୀନ ମାମଲା ହାର ମଧ୍ୟ ୨୭.୯% ରୁ ବୃଦ୍ଧି ପାଇ ୨୮.୪% ହୋଇଛି। IPC ଏବଂ SLL ଅପରାଧରେ ଅଦାଲତଙ୍କ ଦ୍ୱାରା ଦୋଷୀ ସାବ୍ୟସ୍ତ ହାର ଯଥାକ୍ରମେ ୫୩.୩% ଏବଂ ୭୯.୩% ରହିଛି, ଯାହା ୨୦୨୩ରେ ଯଥାକ୍ରମେ ୫୪% ଏବଂ ୭୮% ଥିଲା।