ରୁରୁକୀ: ମୁଜାଫ୍ଫରନଗର ପରେ ଏବେ ଉତ୍ତରାଖଣ୍ଡର ରୁରୁକୀରେ କାଉଁଡିଆମାନେ ଉପଦ୍ରବ ସୃଷ୍ଟି କରିଛନ୍ତି। ଏଠାରେ ବୋଲବମ୍ ଭକ୍ତମାନେ ଏକ ଇ-ରିକ୍ସାକୁ ପିଟିପିଟି ଭାଙ୍ଗିଦେଇଛନ୍ତି। ଆଖି ଆଗରେ ପୁଲିସ ଉପସ୍ଥିତ ଥିଲେ ମଧ୍ୟ ଉପଦ୍ରବକାରୀ ଶିବଭକ୍ତଙ୍କୁ ନିୟନ୍ତ୍ରଣ କରିପାରି ନଥିବା ଅଭିଯୋଗ ହୋଇଛି। ଆକ୍ରମଣର ଶିକାର ହୋଇଥିବା ଇ-ରିକ୍ସା ଚାଳକଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି।
ରିପୋର୍ଟ ଅନୁସାରେ ଏହି ଘଟଣା ମଗଲୌର ଅଞ୍ଚଳର ଲିବରହେଡି ନହରପଟରୀରେ ଘଟିଛି। ରିକ୍ସା ଚାଳକଙ୍କ ଉପରେ ଅଭିଯୋଗ ଥିଲା ଯେ, ଜଣେ କାଉଁଡିଆଙ୍କୁ ଧକ୍କା ଦେଇଥିଲେ। ଏହି କାରଣରୁ କାଉଁଡିଆ ଜଣକ ଇ-ରିକ୍ସା ଚାଳକଙ୍କୁ ମାଡ଼ ମାରିଥିଲେ। ଏହା ପରେ ସେ ଉତ୍ତେଜିତ ହୋଇ ଇ-ରିକ୍ସାକୁ ଭଙ୍ଗାରୁଜା କରିଥିଲେ। ଏହି ସମୟରେ ଅନ୍ୟ କାଉଁଡିଆମାନେ ବୋଲ ବମ୍, ଭୋଲେ ବାବା କି ଜୟ ଶ୍ଲୋଗାନ ଦେଉଥିଲେ। ଫଳରେ ଅନ୍ୟ ବୋଲବମ ଭକ୍ତମାନେ ମଧ୍ୟ ଭିଡ଼ ଲଗାଇଥିଲେ।
ସୂଚନାଯୋଗ୍ୟ, ଗତ ସୋମବାର ଦିନ ମୁଜାଫ୍ଫରନଗରରେ କାଉଁଡ଼ିଆ ଯାତ୍ରାକୁ ନେଇ ପୁଲିସ ସାମ୍ନାରେ କାଉଁଡିଆମାନେ ଉପଦ୍ରବ ସୃଷ୍ଟି କରିଥିଲେ। ଏକ କାରକୁ ଭାଙ୍ଗି ଦେଇଥିଲେ। ଆଖି ଆଗରେ ସବୁ ଘଟୁଥିଲେ ମଧ୍ୟ ପୁଲିସ ଉପଦ୍ରବକାରୀମାନଙ୍କୁ ନିୟନ୍ତ୍ରଣ କରିପାରି ନଥିଲା। କାଉଁଡିଆମାନଙ୍କ ତାଣ୍ଡବକୁ ପ୍ରତକ୍ଷ୍ୟଦର୍ଶୀ ମଧ୍ୟ ଅଟକାଇପାରି ନଥିଲେ। ଛପ୍ପର ଥାନା ଅଧୀନ ୫୮ ନମ୍ବର ଜାତୀୟ ରାଜପଥରେ କାଉଁଡିଆମାନେ ଏହି ଅପ୍ରୀତିକର ଘଟଣା କରିଥିଲେ। କେବଳ ଏତିକି ନୁହେଁ କାର ଡ୍ରାଇଭର ଜୀବନ ବଞ୍ଚାଇବା ପାଇଁ ଏକ ଢାବାରେ ପଶିଯାଇଥିବା ବେଳେ ତାଙ୍କୁ କାଉଁଡିଆମାନେ ଟାଣିଆଣି ମାଡ଼ ମାରିଥିଲେ।