ରାତିରେ ପ୍ରଚାର ଆଉ ସକାଳେ ଚାଲିଲା ବୁଲଡୋଜର | ରାଜଧାନୀ ଭୁବନେଶ୍ୱରରେ ଏବେ ଉଠା ଦୋକାନୀଙ୍କ ପାଇଁ କାଳ ହୋଇଛି ହକି ବିଶ୍ୱକପ୍‌। ଉଠା ଦୋକାନୀଙ୍କ ପେଟ ପାଟଣାକୁ ଲାତ ମାରିଛି ବିଏମ୍‌ସି | ମେୟରଙ୍କ ବଦଳି ଦାବିରେ ଉଠା ଦୋକାନୀମାନେ ବିଶାଳ ରାଲି କରୁଛନ୍ତି |

ତେବେ ସୂଚନା ଯୋଗ୍ୟ ଯେ ହକି ବିଶ୍ୱକପ୍ ପାଇଁ ଭୁବନେଶ୍ୱରର ସୌନ୍ଦର୍ଯ୍ୟ ବୃଦ୍ଧି ଲାଗି ରାସ୍ତାକଡ଼ରୁ ଉଠା ଦୋକାନୀ ମାନଙ୍କୁ ଉଚ୍ଛେଦ କରାଯାଇଛି । ବିନା ଥଇଥାନ ଓ କ୍ଷତିପୂରଣରେ ବିଏମସି ଉଚ୍ଛେଦ କରୁଥିବାରୁ ଉଠା ଦୋକାନୀମାନେ ଏହାକୁ ବିରୋଧ କରୁଛନ୍ତି । ଡମଣା ଛକଠାରୁ ଉଠା ଦୋକାନୀମାନେ ରାଲି କରି ପ୍ରତିବାଦ କରିବା ସହ ଉତ୍ତର ବିଏମସି କାର୍ଯ୍ୟାଳୟ ଘେରାଉ କରିଛନ୍ତି । ଡମଣା ଓ ପଟିଆ ଅଞ୍ଚଳରେ ଏବେ ବିଏମସିର ଉଚ୍ଛେଦ ବିରୋଧରେ ଶହ ଶହ ଉଠା ଦୋକାନୀ ରାସ୍ତାକୁ ଓହ୍ଲାଇ ଆସିଛନ୍ତି ।

ସେପଟେ ବିଏମସିର ଉଚ୍ଛେଦ ବେଳେ ଲକ୍ଷ ଲକ୍ଷ ଟଙ୍କାର ସମ୍ପତ୍ତି ନଷ୍ଟ ହୋଇଯାଇଥିବା ଅଭିଯୋଗ ହୋଇଛି । ବିନା ନୋଟିସରେ ବିଏମସି ଉଚ୍ଛେଦ କରୁଥିବା କଥା କିଛି ଉଠା ଦୋକାନୀ କହିଛନ୍ତି । ତେବେ ପ୍ରତିବାଦ ବେଳେ ପୋଲିସ ଓ ଉଠା ଦୋକାନୀ ମଧ୍ୟରେ ଠେଲାପେଲା ମଧ୍ୟ ହୋଇଛି । ନାଲକୋ ଛକ ବିଏମସି ନର୍ଥ ଜୋନ୍ ଅଫିସ ସାମ୍ନାରେ ଧସ୍ତାଧସ୍ତି ଦୃଶ୍ୟ ମଧ୍ୟ ଦେଖିବାକୁ ମିଳିଥିଲା | 

ଏପଟେ ଏତେ ମାତ୍ରାରେ ସମ୍ପତ୍ତି ନଷ୍ଟ ହେବା ପରେ ଓ ଆନ୍ଦୋଳନ ଜୋର୍ ଧରିବା ପରେ ନରମ ପଡିଛି ବିଏମସି | କାଲିଠାରୁ ବନ୍ଦ ରହିବ ଉଛେଦ କାମ | ତେବେ କିଛି ଦିନ ପର୍ଯ୍ୟନ୍ତ ଉଛେଦ କାର୍ଯ୍ୟ ବନ୍ଦ ରହିବ ଏବଂ ପରେ ଯେବେବି ଉଛେଦ କାର୍ଯ୍ୟ କରାଯିବ ତା ପୂର୍ବରୁ ସଂଘ ସହ ଆଲୋଚନା କରାଯିବ ବୋଲି କହିଛନ୍ତି ଆସିଷ୍ଟାଣ୍ଡ କମିଶନର ସୁରେଶ ଲେଙ୍କା | ପରବର୍ତ୍ତୀ ପର୍ଯ୍ୟାୟରେ କିପରି ଉଠା ଦୋକାନୀ ମାନଙ୍କୁ ଥଇଥାନ କରାଯିବ, ସେନେଇ ନିଷ୍ପତ୍ତି ନିଆଯିବ । ତେବେ ସୁରେଶ ଲେଙ୍କାଙ୍କ ପ୍ରତିଶୃତି ପରେ ଏବେ ଆନ୍ଦୋଳନ ବନ୍ଦ କରିଛନ୍ତି ଉଠା ଦୋକାନୀ ବ୍ୟବସାୟୀ ସଂଘ | ଅନ୍ୟପଟେ ବିଏମସି କମିଶନର ବିଜୟ ଅମୃତା କୁଲାଙ୍ଗେ କହିଛନ୍ତି, ଯେଉଁଠି ଟ୍ରାଫିକ୍ ଅସୁବିଧା ଅଛି, ସେଠାରୁ ଅନୁମତିରେ ଉଚ୍ଛେଦ ହୋଇଛି । ତେବେ ବିନା କାରଣରେ କୌଣସି ଉଠାଦୋକାନୀଙ୍କୁ ବିଏମସି ଉଛେଦ କରିନାହିଁ ବୋଲି କହିଛନ୍ତି ବିଏମସି କମିଶନର|