ପୁରଣ ହେଲା ଦୀର୍ଘ ଦିନରେ ଦାବି । ସବୁଦିନ ପାଇଁ ବନ୍ଦ ହେଲା ବିଏମସିର ଦାରୁଠେଙ୍ଗ ଡମ୍ପିଂୟାର୍ଡ। ଭୁବନେଶ୍ୱରରୁ ଆଉ ସହର ବାହାରକୁ ଯିବନି ଅଳିଆ । ଏ ନେଇ ଦାରୁଠେଙ୍ଗ ସରପଞ୍ଚଙ୍କୁ ଚିଠି ଲେଖି ଅବଗତ କରାଇଛି ଭୁବନେଶ୍ବର ମହାନଗର ନିଗମ । 

ସୂଚନା ମୁତବାକ, ଏନେଇ ଗୃହ ନଗର ଉନ୍ନୟନ ମନ୍ତ୍ରୀ ଉଷା ଦେବୀଙ୍କ ଅଧ୍ୟକ୍ଷତାରେ ବିଏମସିର ଅଧିକାରୀଙ୍କୁ ନେଇ ଏକ ବୈଠକ ଗତ ବର୍ଷ ଅଗଷ୍ଟ ମାସରେ ହୋଇଥିଲା । କିପରି ଭୂଆଶୁଣି ଡମ୍ପିଂୟାର୍ଡରେ କମ୍ ଅଳିଆ ପକାଯିବ ସେନେଇ ବୈଠକରେ ନିଷ୍ପତ୍ତି ନିଆଯାଇଥିଲା । ଚଳିତ ମାସ ୩୦ ତାରିଖରୁ ଏହି ଡମ୍ପିଂୟାର୍ଡ ବନ୍ଦ କରିବାକୁ ନିଷ୍ପତ୍ତି ନିଆଯାଇଥିଲା । ହେଲେ ଏହାର ଦୁଇ ସପ୍ତାହ ପୂର୍ବରୁ ଏହି ଡମ୍ପିଂୟାର୍ଡକୁ ବନ୍ଦ କରାଯାଇଥିବା ନେଇ ବିଏମସି ପକ୍ଷରୁ ସୂଚନା ଦିଆଯାଇଛି । ଡମ୍ପିଂୟାର୍ଡ ବନ୍ଦ ନିଷ୍ପତ୍ତି ପରେ ଅଞ୍ଚଳବାସୀ ଖୁସି ବ୍ୟକ୍ତ କରିବା ସହ ବିଏମସିକୁ ଧନ୍ୟବାଦ ଜଣାଇଛନ୍ତି । ବିଏମସି ପକ୍ଷରୁ ଭୁବନେଶ୍ୱରରେ MCC ଓ MRF ପ୍ରତିଷ୍ଠା କରାଯାଇଥିବା ବେଳେ ଏଣିକି ସହରର ଅଳିଆ ସହର ଭିତରେ ପ୍ରକ୍ରିୟାକରଣ କରାଯିବ। ଏନେଇ ବିଏମସି କମିଶନର ବିଜୟ ଅମୃତା କୁଲାଙ୍ଗେ ସୂଚନା ଦେଇଛନ୍ତି । ତେବେ ସେଠାରେ ବିଏମସି ପକ୍ଷରୁ ଏକ ବାୟୋ ମାଇନିଂ ପ୍ରକଳ୍ପ ଆରମ୍ଭ କରିବ । ସେଠାରେ ଥିବା ଅଳିଆକୁ ବାୟୋ ମାଇନିଂ ଜରିଆରେ ପୁଣି ଥରେ ପୂର୍ବବସ୍ଥାକୁ ଫେରାଇ ଆଣିବାକୁ ବିଏମସି ଯୋଜନା କରିଛି । ଏଥିପାଇଁ ସ୍ୱତନ୍ତ୍ର ମେସିନ୍ ସେଠାରେ ଲଗାଯିବ । ଦାରୁଠେଙ୍ଗବାସୀ ଏଥିରେ ସହଯୋଗ କରିବାକୁ ପ୍ରତିଶ୍ରୁତି ଦେଇଥିବା ବିଏମସି ପକ୍ଷରୁ କୁହାଯାଉଛି । ଏହା ଦ୍ୱାରା ପୁଣି ଥରେ ଉକ୍ତ ଅଞ୍ଚଳ ସାଧାରଣ ଅବସ୍ଥାକୁ ଫେରିପାରିବ ଏବଂ ସାଧାରଣ ଲୋକ ଉପକୃତ ହୋଇପାରିବେ ।