ନୂଆଦିଲ୍ଲୀ: ହୋଟେଲ, ରେଷ୍ଟୁରାଣ୍ଟ ଏବଂ କ୍ଷୁଦ୍ର ଶିଳ୍ପ ସହ ଜଡ଼ିତ ବ୍ୟବସାୟୀଙ୍କ ପାଇଁ  ବଡ଼ ଆଶ୍ଵାସ୍ତିକର ଖବର ସାମ୍ନାକୁ ଆସିଛି । ଗ୍ୟାସ ସିଲିଣ୍ଡର ଯୋଗାଣକୁ ନେଇ କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି । ପଶ୍ଚିମ ଏସିଆ ସଙ୍କଟ ସମୟରେ ଅଣ-ଘରୋଇ  ବା କମର୍ସିଆଲ୍ ଏଲ୍‌ପିଜି ସିଲିଣ୍ଡର ଉପରେ ଲଗାଯାଇଥିବା କଟକଣାକୁ ସରକାର ପ୍ରାୟ ସମ୍ପୂର୍ଣ୍ଣ ଭାବେ ହଟାଇ ଦେଇଛନ୍ତି । ଏହା ସହିତ ଦେଶରେ ବ୍ୟବସାୟିକ ଗ୍ୟାସ ଯୋଗାଣ ପୂର୍ବ ସ୍ଥିତିକୁ ଫେରିଆସିଛି ।

କାହିଁକି ଲଗାଯାଇଥିଲା କଟକଣା ?

ପଶ୍ଚିମ ଏସିଆରେ ଦେଖାଦେଇଥିବା ଭୂ-ରାଜନୈତିକ ତିକ୍ତତା ଏବଂ ଯୋଗାଣ ଶୃଙ୍ଖଳା ବାଧାପ୍ରାପ୍ତ ହେବା ଯୋଗୁଁ ଭାରତ ସରକାର ଘରୋଇ ଗ୍ରାହକ ବା ରୋଷେଇ ଗ୍ୟାସର ଯୋଗାଣକୁ ସୁରକ୍ଷିତ ରଖିବା ପାଇଁ ପ୍ରାଥମିକତା ଦେଇଥିଲେ । ଏହି କାରଣରୁ କମର୍ସିଆଲ୍ ଏବଂ ଶିଳ୍ପ କ୍ଷେତ୍ରରେ ବ୍ୟବହାର ହେଉଥିବା ଏଲ୍‌ପିଜି ଉପରେ କିଛି ଅସ୍ଥାୟୀ କଟକଣା ଜାରି କରାଯାଇଥିଲା । 

ପରିସ୍ଥିତିରେ ସୁଧାର, ବଢ଼ିଲା ଉତ୍ପାଦନ

ଏବେ ସ୍ଥିତିରେ ବେଶ୍ ସୁଧାର ଆସିଛି । ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରାଳୟ ଅନୁଯାୟୀ, ଦେଶରେ ଏଲ୍‌ପିଜିର ଘରୋଇ ଉତ୍ପାଦନ ବୃଦ୍ଧି ପାଇଛି ଏବଂ ଆମଦାନୀ ହେଉଥିବା ଏଲ୍‌ପିଜିର ଉପଲବ୍ଧତା ମଧ୍ୟ ବଢ଼ିଛି । ଏହାକୁ ଦୃଷ୍ଟିରେ ରଖି ସରକାର ଅଣ-ଘରୋଇ ପ୍ୟାକ୍ଡ ଏଲ୍‌ପିଜି ଯୋଗାଣକୁ ସମ୍ପୂର୍ଣ୍ଣ ସ୍ଵାଭାବିକ କରିଛନ୍ତି । ଏହା ସହିତ ବଲ୍କ ଏଲ୍‌ପିଜି  ଯୋଗାଣକୁ ମଧ୍ୟ ସଙ୍କଟ ପୂର୍ବ ବ୍ୟବହାରର ୫୦ ପ୍ରତିଶତ ପର୍ଯ୍ୟନ୍ତ ବୃଦ୍ଧି କରାଯାଇଛି ।

କାହାକୁ ମିଳିବ ଲାଭ ?

ସରକାରଙ୍କ ଏହି ନିଷ୍ପତ୍ତି ଫଳରେ ଦେଶର ହଜାର ହଜାର ହୋଟେଲ, ରେଷ୍ଟୁରାଣ୍ଟ, ଛୋଟ ବଡ଼ କାରଖାନା ଏବଂ ଶିଳ୍ପାନୁଷ୍ଠାନକୁ ବଡ଼ ଆଶ୍ଵାସନା ମିଳିବ, ଯେଉଁମାନେ ଗତ କିଛି ମାସ ହେବ ଗ୍ୟାସ ସଙ୍କଟ ଯୋଗୁଁ ସମସ୍ୟାର ସମ୍ମୁଖୀନ ହେଉଥିଲେ । ସେହିପରି C3-C4 ହାଇଡ୍ରୋକାର୍ବନକୁ ପୁଣିଥରେ ପେଟ୍ରୋକେମିକାଲ୍ସ ଶିଳ୍ପକୁ ଆବଣ୍ଟନ କରାଯିବ, ଯାହାଦ୍ୱାରା ଶିଳ୍ପକ୍ଷେତ୍ରକୁ ମଧ୍ୟ ଗତି ମିଳିବ । ଏଥିସହିତ ଦେଶରେ ଯେପରି ଦୈନିକ ଅତିକମରେ ୪୦ ହଜାର ମେଟ୍ରିକ ଟନ ଏଲ୍‌ପିଜି ଉତ୍ପାଦନ ଜାରି ରହିବ, ସେଥିପ୍ରତି ମଧ୍ୟ ସରକାର ସତର୍କ ନଜର ରଖିଛନ୍ତି ।