ନିରପେକ୍ଷ, ଶାନ୍ତିପୂର୍ଣ୍ଣ ଓ ପ୍ରଲୋଭନମୁକ୍ତ ନିର୍ବାଚନ ଉପରେ ନିର୍ବାଚନ ଆୟୋଗ ଗୁରୁତ୍ୱାରୋପ କରିଛନ୍ତି । ଆନ୍ତଃରାଜ୍ୟ ଓ ଅନ୍ତର୍ଜାତୀୟ ସୀମାରେ ଆଇନ ଶୃଙ୍ଖଳା ପରିସ୍ଥିତି, ବେଆଇନ କାର୍ଯ୍ୟକଳାପ ରୋକିବା ଏବଂ ଏହା ଉପରେ କଡ଼ା ନଜର ରଖିବା ପାଇଁ ନିର୍ବାଚନ ଆୟୋଗ ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳମାନଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକରେ ସମୀକ୍ଷା କରିଛନ୍ତି । ମୁଖ୍ୟ ନିର୍ବାଚନ ଆୟୁକ୍ତ ରାଜୀବ କୁମାରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ନିର୍ବାଚନ ଆୟୁକ୍ତ ଜ୍ଞାନେଶ କୁମାର ଏବଂ ସୁଖବୀର ସିଂ ସାନ୍ଧୁଙ୍କ ସହ ସୀମା ସୁରକ୍ଷାରେ ନିୟୋଜିତ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ଏବଂ କେନ୍ଦ୍ରୀୟ ସୁରକ୍ଷା ଏଜେନ୍ସିର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
ଶ୍ରୀ ରାଜୀବ କୁମାର ଅବାଧ, ନିରପେକ୍ଷ ଏବଂ ଶାନ୍ତିପୂର୍ଣ୍ଣ ନିର୍ବାଚନ ପାଇଁ କମିଶନଙ୍କ ପ୍ରତିବଦ୍ଧତା ଉପରେ ଗୁରୁତ୍ୱାରୋପ କରିଥିଲେ । ନିର୍ବାଚନ ପ୍ରକ୍ରିୟାର ଅଖଣ୍ଡତା ବଜାୟ ରଖିବା ଏବଂ ସମାନ ସୁଯୋଗ ସୁନିଶ୍ଚିତ କରିବା ପାଇଁ ସମସ୍ତ ଅଂଶୀଦାରମାନେ ମିଳିତ ଭାବେ କାର୍ଯ୍ୟ କରିବାକୁ ସେ ଆହ୍ୱାନ ଦେଇଛନ୍ତି । ପ୍ରତ୍ୟେକ ଭୋଟର ଯେଭଳି ବିନା ଭୟରେ ନିଜର ମତାଧିକାର ସାବ୍ୟସ୍ତ କରିପାରିବେ ସେ ନେଇ ଶ୍ରୀ କୁମାର ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳଗୁଡ଼ିକୁ ନିର୍ଦ୍ଦେଶ ଦେଇଛନ୍ତି । ଏହି ବୈଠକରେ ପଡ଼ୋଶୀ ରାଜ୍ୟ/କେନ୍ଦ୍ରଶାସିତ ଅଞ୍ଚଳ ମଧ୍ୟରେ ସମନ୍ୱୟ ବଢ଼ାଇବା, ସମସ୍ତ ରାଜ୍ୟ/କେନ୍ଦ୍ରଶାସିତ ଅଞ୍ଚଳରେ ପର୍ଯ୍ୟାପ୍ତ ପରିମାଣରେ ପ୍ରଦାନ କରାଯାଉଥିବା ସିଏପିଏଫର କଡ଼ାକଡ଼ି ମୁତୟନ ଉପରେ ଆଲୋଚନା ହୋଇଥିଲା । ରାଜ୍ୟ/କେନ୍ଦ୍ରଶାସିତ ଅଞ୍ଚଳରେ ସୀମାବର୍ତ୍ତୀ ନିର୍ବାଚନରେ କେନ୍ଦ୍ରୀୟ ସଶସ୍ତ୍ର ପୁଲିସ ବଳ (ସିଏପିଏଫ୍) ଯବାନଙ୍କ ଗମନାଗମନ ଓ ପରିବହନ ପାଇଁ ଲଜିଷ୍ଟିକ୍ ସହାୟତା; ନିର୍ବାଚନ ପ୍ରକ୍ରିୟା ଉପରେ ପ୍ରଭାବ ପକାଇଥିବା ସୀମାନ୍ତ ଅଞ୍ଚଳରେ ଫ୍ଲାସ୍ ପଏଣ୍ଟ ଚିହ୍ନଟ ଏବଂ ତଦାରଖ, ଅତୀତର ଅନୁଭୂତି ଆଧାରରେ ସାମ୍ପ୍ରଦାୟିକ ଉତ୍ତେଜନାର ସମାଧାନ ପାଇଁ ପ୍ରାଥମିକ ପଦକ୍ଷେପ ତଥା ବେଆଇନ କାର୍ଯ୍ୟକଳାପ ବିରୋଧରେ ସୀମାକୁ ସୁରକ୍ଷିତ ରଖିବାର ଜରୁରୀ ଆବଶ୍ୟକତା ଉପରେ ବୈଠକରେ ଜୋର ଦିଆଯାଇଥିଲା । ଅନ୍ତର୍ଜାତୀୟ ସୀମାରେ ନିଶାଦ୍ରବ୍ୟ, ମଦ କାରବାର, ଅସ୍ତ୍ରଶସ୍ତ୍ର ଓ ବିସ୍ଫୋରକ ସମେତ ନିଷିଦ୍ଧ ସାମଗ୍ରୀ ପରିବହନ ଉପରେ ରୋକ୍ ଲଗାଇବା ପାଇଁ କଡ଼ା ସତର୍କତା ଅବଲମ୍ବନ କରିବା ଉପରେ ଆୟୋଗ ଗୁରୁତ୍ୱାରୋପ କରିଛନ୍ତି ମୁଖ୍ୟ ନିର୍ବାଚନ ଆୟୁକ୍ତ । ସୀମାରେ ମଦ ଓ ନଗଦ ଟଙ୍କା ପରିବହନ ପାଇଁ ପ୍ରସ୍ଥାନ ଓ ପ୍ରବେଶ ପଥ ଚିହ୍ନଟ କରିବା ସହ କେତେକ ରାଜ୍ୟରେ ବେଆଇନ ଗଞ୍ଜେଇ ଚାଷ ଉପରେ ରୋକ୍ ଲଗାଇବାକୁ ନିର୍ଦ୍ଦେଶ ଦିଆଯାଇଛି ।
ତେବେ ଅରୁଣାଚଳ ପ୍ରଦେଶ, ଛତିଶଗଡ଼, ମହାରାଷ୍ଟ୍ର ଭଳି ୧୧ ରାଜ୍ୟର ଗୁରୁତ୍ୱପୂର୍ଣ୍ଣ ଅଞ୍ଚଳକୁ ନିର୍ବାଚନ ଟିମ୍ ପରିବହନ ପାଇଁ ଭାରତୀୟ ବାୟୁସେନା ଏବଂ ରାଜ୍ୟ ବେସାମରିକ ବିମାନ ଚଳାଚଳ ବିଭାଗର ସହଯୋଗର ସମୀକ୍ଷା କରିଥିଲେ । ବିଶେଷ କରି ଛତିଶଗଡ଼ ଏବଂ ଜମ୍ମୁ ଓ କଶ୍ମୀର ଭଳି ରାଜ୍ୟରେ ବିପଦ ଅଭିଜ୍ଞତା ଆଧାରରେ ରାଜନୈତିକ କର୍ମୀ ଏବଂ ପ୍ରାର୍ଥୀଙ୍କୁ ସୁରକ୍ଷା ଦେବା ପାଇଁ ପର୍ଯ୍ୟାପ୍ତ ସୁରକ୍ଷା ବ୍ୟବସ୍ଥା ପାଇଁ ନିର୍ଦ୍ଦେଶ ଦିଆଯାଇଛି । ମଣିପୁରରେ ସାମ୍ପ୍ରତିକ ହିଂସା ଓ ଅସ୍ଥିରତା ଏବଂ ଶାନ୍ତିପୂର୍ଣ୍ଣ ନିର୍ବାଚନ ପରିଚାଳନାରେ ପଡ଼ିଥିବା ପ୍ରଭାବକୁ ମଧ୍ୟ ସମାଧାନ କରାଯାଇଥିଲା ଏବଂ ଆଭ୍ୟନ୍ତରୀଣ ବିସ୍ଥାପିତ ବ୍ୟକ୍ତିମାନଙ୍କୁ ସହାୟତା କରିବା ଏବଂ ନିର୍ବାଚନ ପ୍ରକ୍ରିୟାରେ ସେମାନଙ୍କ ଅଂଶଗ୍ରହଣ ସୁନିଶ୍ଚିତ କରିବା ପାଇଁ ଆୟୋଗ ତ୍ୱରିତ ପଦକ୍ଷେପ ନେବାକୁ ଅନୁରୋଧ କରିଥିଲେ ।
ଅଧିକ ପଢ଼ନ୍ତୁ : ନିର୍ବାଚନ ପାଇଁ 4 ଦିନ ଛୁଟି