ଭୁବନେଶ୍ୱର:ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଅପରାହ୍ଣରେ ଏକ ଦିନିକିଆ ଓଡ଼ିଶା ଗସ୍ତରେ ଆସୁଛନ୍ତି। ଏହି ଗସ୍ତ କାଳରେ ସେ ଭାରତୀୟ ରିଜର୍ଭ ବ୍ୟାଙ୍କ (RBI)ର ନୂତନ ଡାଟା ସେଣ୍ଟର ଏବଂ ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନର ଉଦ୍ଘାଟନ କରିବେ। ରାଜ୍ୟରେ 'ଡବଲ ଇଞ୍ଜିନ' ସରକାର ଗଠନ ହେବା ପରେ ପ୍ରଧାନମନ୍ତ୍ରୀଙ୍କର ଏହା ୯ମ ଓଡ଼ିଶା ଗସ୍ତ।

ପ୍ରଧାନମନ୍ତ୍ରୀଙ୍କ ଗସ୍ତସୂଚୀ:

ଅପରାହ୍ଣ ୪:୧୦ - ବାୟୁସେନାର ସ୍ୱତନ୍ତ୍ର ବିମାନ ଯୋଗେ ଭୁବନେଶ୍ୱର ବିମାନବନ୍ଦରରେ ଆଗମନ।

ଅପରାହ୍ଣ ୪:୧୫ - ବିମାନବନ୍ଦରରୁ ସ୍ୱତନ୍ତ୍ର ହେଲିକପ୍ଟର ଯୋଗେ ଖୋର୍ଦ୍ଧାସ୍ଥିତ RBI ଡାଟା ସେଣ୍ଟର ଅଭିମୁଖେ ଯାତ୍ରା।

ଅପରାହ୍ଣ ୪:୪୫ ରୁ ୫:୪୫ - RBI ଡାଟା ସେଣ୍ଟର ଓ ସାଇବର ସୁରକ୍ଷା ପ୍ରଶିକ୍ଷଣ ପ୍ରତିଷ୍ଠାନର ଉଦ୍ଘାଟନୀ ସମାରୋହ।

ଅପରାହ୍ଣ ୫:୫୦ - ଖୋର୍ଦ୍ଧାରୁ ସଡ଼କ ପଥରେ ଭୁବନେଶ୍ୱର ବିମାନବନ୍ଦର ଅଭିମୁଖେ ପ୍ରତ୍ୟାବର୍ତ୍ତନ।

ସଞ୍ଜ ୬:୩୫ - ଭୁବନେଶ୍ୱରରୁ ଦିଲ୍ଲୀ ଫେରିଯିବେ।

ସମ୍ମାନିତ ଅତିଥି ଓ ସୁରକ୍ଷା ବ୍ୟବସ୍ଥା:

ଏହି ଉଦ୍ଘାଟନୀ କାର୍ଯ୍ୟକ୍ରମରେ ଓଡ଼ିଶାର ରାଜ୍ୟପାଳ ବ୍ରଜମୋହନ ରାମ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, RBI ଗଭର୍ଣ୍ଣର ସଞ୍ଜୟ ମାଲହୋତ୍ରା ଏବଂ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ପ୍ରମୁଖ ଉପସ୍ଥିତ ରହିବେ। ପ୍ରଧାନମନ୍ତ୍ରୀ ପ୍ରାୟ ଅଢ଼େଇ ଘଣ୍ଟା ଓଡ଼ିଶାରେ ରହିବାକୁ ଥିବାବେଳେ ସଡ଼କ ପଥରେ ଫେରିବା କାର୍ଯ୍ୟକ୍ରମ ଥିବାରୁ କମିସନରେଟ୍ ପୁଲିସ ପକ୍ଷରୁ ଭୁବନେଶ୍ୱର ଓ ଖୋର୍ଦ୍ଧାରେ ସୁରକ୍ଷା ବ୍ୟବସ୍ଥା ଅତ୍ୟନ୍ତ କଡ଼ାକଡ଼ି କରାଯାଇଛି।

ପ୍ରକଳ୍ପର ମହତ୍ତ୍ୱ ଓ ଆର୍ଥିକ ବିକାଶ:

ବିତ୍ତୀୟ ଭିତ୍ତିଭୂମିର ସୁଦୃଢ଼ୀକରଣ: RBIର ଏହି ନୂତନ ଡାଟା ସେଣ୍ଟର ଭାରତର ବ୍ୟାଙ୍କିଂ କ୍ଷେତ୍ର ପାଇଁ ଏକ ସୁରକ୍ଷିତ ଓ ସ୍ଥିର କମ୍ପ୍ୟୁଟିଂ ଇକୋସିଷ୍ଟମ ପ୍ରଦାନ କରିବ।

ଅତ୍ୟାଧୁନିକ ଗବେଷଣା: ସାଇବର ସୁରକ୍ଷା ତାଲିମ ପ୍ରତିଷ୍ଠାନ ଦ୍ୱାରା କ୍ୱାଣ୍ଟମ୍ କମ୍ପ୍ୟୁଟିଂ, ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ଏବଂ ଆଗଧାଡ଼ିର ପ୍ରଯୁକ୍ତିବିଦ୍ୟା ଉପରେ ଗବେଷଣା ଓ ଦକ୍ଷତା ବିକାଶ କରାଯିବ।

ସମୃଦ୍ଧ ଓଡ଼ିଶା ଦିଗରେ ପଦକ୍ଷେପ: ବିଜେପି ରାଜ୍ୟ ସଭାପତି ମନମୋହନ ସାମଲ କହିଛନ୍ତି ଯେ, ସେମିକଣ୍ଡକ୍ଟର, ଆଇଟି, ପେଟ୍ରୋକେମିକାଲ୍ସ ଓ ଶକ୍ତି କ୍ଷେତ୍ରରେ ବିଶାଳ ପୁଞ୍ଜିନିବେଶ ସହ ଆଗାମୀ ଦିନରେ ଓଡ଼ିଶା ପୂର୍ବ ଭାରତର ପ୍ରଗତିର ମୁଖଶାଳା ହେବାକୁ ଯାଉଛି।