ନୂଆଦିଲ୍ଲୀ: ଓଡ଼ିଶା ସମେତ ସମଗ୍ର ଦେଶର ଚିକିତ୍ସା ଜଗତ ପାଇଁ ଆସିଛି ଏକ ଦୁଃଖଦ ଖବର। ବିଶିଷ୍ଟ ସ୍ନାୟୁ ଶଲ୍ୟ ଚିକିତ୍ସକ, ପ୍ରଖ୍ୟାତ ଶିକ୍ଷାବିତ୍ ତଥା ପଦ୍ମଶ୍ରୀ ସମ୍ମାନପ୍ରାପ୍ତ ପ୍ରଫେସର ଡାକ୍ତର ଅଶୋକ କୁମାର ମହାପାତ୍ର ଆଉ ନାହାନ୍ତି। ୭୪ ବର୍ଷ ବୟସରେ ନୂଆଦିଲ୍ଲୀସ୍ଥିତ ଏମ୍ସ (AIIMS)ରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ସେ ବ୍ରେନ୍ କ୍ୟାନ୍ସରରେ ପୀଡ଼ିତ ଥିଲେ।

ସୂଚନା ଅନୁଯାୟୀ, ଗୁରୁତର ଅସୁସ୍ଥ ହେବା ପରେ ତାଙ୍କୁ ଦିଲ୍ଲୀ ଏମ୍ସରେ ଭର୍ତ୍ତି କରାଯାଇଥିଲା। ସେପ୍ଟେମ୍ବର ୨୭ ତାରିଖରୁ ହସ୍ପିଟାଲର ନ୍ୟୁରୋ ସର୍ଜରୀ ବିଭାଗରେ ତାଙ୍କର ଚିକିତ୍ସା ଚାଲିଥିଲା। ବରିଷ୍ଠ ନ୍ୟୁରୋ ସର୍ଜନ ପ୍ରଫେସର ଡାକ୍ତର ଆଶିଷ ସୁରୀଙ୍କ ତତ୍ତ୍ୱାବଧାନରେ ଚିକିତ୍ସା କରାଯାଉଥିଲା। ତେବେ ଶେଷରେ ମୃତ୍ୟୁ ସହ ସଂଗ୍ରାମରେ ହାରିଯାଇଛନ୍ତି ଏହି ମହାନ ଚିକିତ୍ସକ।

ଏମକେସିଜିରୁ ଆରମ୍ଭ ହୋଇଥିଲା ଚିକିତ୍ସା ଯାତ୍ରା

ଡାକ୍ତର ଅଶୋକ ମହାପାତ୍ରଙ୍କ ଶିକ୍ଷା ଜୀବନର ଆରମ୍ଭ ହୋଇଥିଲା ଓଡ଼ିଶାରୁ। ୧୯୭୫ ମସିହାରେ ବ୍ରହ୍ମପୁରସ୍ଥିତ ଏମକେସିଜି ମେଡିକାଲ କଲେଜରୁ ସେ ଏମବିବିଏସ୍ ଡିଗ୍ରୀ ହାସଲ କରିଥିଲେ। ଏହାପରେ ଉଚ୍ଚଶିକ୍ଷା ପାଇଁ ନୂଆଦିଲ୍ଲୀ ଏମ୍ସରେ ନାମ ଲେଖାଇଥିଲେ।

ସେଠାରୁ ୧୯୭୯ ମସିହାରେ ଏମ୍ଏସ୍ ଏବଂ ୧୯୮୨ ମସିହାରେ ନ୍ୟୁରୋ ସର୍ଜରୀରେ ଏମ୍‌ସିଏଚ୍ ଡିଗ୍ରୀ ହାସଲ କରିଥିଲେ। ଏହାପରେ ନ୍ୟୁରୋ ସର୍ଜରୀ କ୍ଷେତ୍ରରେ ନିଜର ଦୀର୍ଘ ଓ ସଫଳ କ୍ୟାରିୟର ଗଢ଼ିଥିଲେ।

ଏମ୍ସରେ ୪୦ ବର୍ଷରୁ ଅଧିକ ସମୟର ଅବଦାନ

ଡାକ୍ତର ମହାପାତ୍ର ନୂଆଦିଲ୍ଲୀ ଏମ୍ସ ସହ ଚାରି ଦଶନ୍ଧିରୁ ଅଧିକ ସମୟ ଧରି ଜଡ଼ିତ ରହିଥିଲେ। ଏହି ଦୀର୍ଘ କାର୍ଯ୍ୟକାଳ ମଧ୍ୟରେ ସେ ନ୍ୟୁରୋ ସର୍ଜରୀ ବିଭାଗର ମୁଖ୍ୟ, ନ୍ୟୁରୋସାଇନ୍ସ ସେଣ୍ଟରର ମୁଖ୍ୟ ଏବଂ ଗବେଷଣା ବିଭାଗର ଡିନ୍ ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଥିଲେ। ଚିକିତ୍ସା ସେବା ସହ ଗବେଷଣା, ଡାକ୍ତରୀ ଶିକ୍ଷା ଏବଂ ନୂତନ ଚିକିତ୍ସକ ଗଢ଼ିବାରେ ମଧ୍ୟ ତାଙ୍କର ଅବଦାନ ଅତୁଳନୀୟ ଥିଲା।

ଜଗା-କାଳିଆଙ୍କ ଚିକିତ୍ସାରେ ରହିଥିଲା ଉଲ୍ଲେଖନୀୟ ଭୂମିକା

ଯୋଡ଼ାମୁଣ୍ଡ ଶିଶୁ ଜଗା ଓ କାଳିଆଙ୍କ ଜଟିଳ ଅସ୍ତ୍ରୋପଚାର ସହ ମଧ୍ୟ ଡାକ୍ତର ମହାପାତ୍ରଙ୍କ ନାମ ଜଡ଼ିତ। ୨୦୧୭ରେ ଦିଲ୍ଲୀ ଏମ୍ସରେ ହୋଇଥିବା ଏହି ବିରଳ ଅସ୍ତ୍ରୋପଚାର ଭାରତୀୟ ଚିକିତ୍ସା ବିଜ୍ଞାନ ପାଇଁ ଏକ ବଡ଼ ସଫଳତା ଥିଲା। ଏହି ଚିକିତ୍ସା ପ୍ରକ୍ରିୟା ତାଙ୍କୁ ଅନ୍ତର୍ଜାତୀୟ ସ୍ତରରେ ମଧ୍ୟ ପରିଚିତି ଦେଇଥିଲା।

ଚିକିତ୍ସା କ୍ଷେତ୍ରରେ ଜୀବନବ୍ୟାପୀ ଅବଦାନ ପାଇଁ ୨୦୨୪ରେ ତାଙ୍କୁ ପଦ୍ମଶ୍ରୀ ସମ୍ମାନରେ ଭୂଷିତ କରାଯାଇଥିଲା। ଜଣେ ଦକ୍ଷ ନ୍ୟୁରୋ ସର୍ଜନ, ଅଭିଜ୍ଞ ଶିକ୍ଷାବିତ୍ ଓ ପ୍ରତିଷ୍ଠିତ ପ୍ରଶାସକ ଭାବେ ଡାକ୍ତର ଅଶୋକ ମହାପାତ୍ରଙ୍କ ଅବଦାନ ସବୁଦିନ ପାଇଁ ସ୍ମରଣୀୟ ହୋଇ ରହିବ। ତାଙ୍କ ବିୟୋଗରେ ଓଡ଼ିଶା ଜଣେ ବିଶିଷ୍ଟ ଚିକିତ୍ସାବିତ୍‌ଙ୍କୁ ହରାଇଛି।