ପୁରୀ: ଆସନ୍ତାକାଲି ପୁରୀ ଶ୍ରୀମନ୍ଦିର ଯିବାକୁ ଯୋଜନା କରିଛନ୍ତି କି? ତେବେ ଭକ୍ତଙ୍କ ପାଇଁ ରହିଛି ଜରୁରୀ ସୂଚନା। ଶ୍ରୀମନ୍ଦିରରେ ଆସନ୍ତାକାଲି ୪ ଘଣ୍ଟା ପାଇଁ ସାଧାରଣ ଦର୍ଶନ ବନ୍ଦ ରହିବ। ଏନେଇ ଶ୍ରୀଜଗନ୍ନାଥ ମନ୍ଦିର ପ୍ରଶାସନ (SJTA) ପକ୍ଷରୁ ସୂଚନା ଜାରି କରାଯାଇଛି।

ମହାପ୍ରଭୁଙ୍କର ସ୍ୱତନ୍ତ୍ର ବନକଲାଗି ନୀତି ପାଇଁ ଏହି ଦର୍ଶନ ବନ୍ଦ ରହିବ। ଶ୍ରୀଜିଉଙ୍କ ଏହି ଗୁପ୍ତ ନୀତି ସମୟରେ ଭକ୍ତଙ୍କୁ ମନ୍ଦିର ଭିତରେ ସାଧାରଣ ଦର୍ଶନର ଅନୁମତି ମିଳିବ ନାହିଁ।

SJTAର ସୂଚନା ଅନୁଯାୟୀ, ଆସନ୍ତାକାଲି ସନ୍ଧ୍ୟା ୬ଟାରୁ ରାତି ୧୦ଟା ପର୍ଯ୍ୟନ୍ତ ଶ୍ରୀଜିଉଙ୍କ ସାଧାରଣ ଦର୍ଶନ ବନ୍ଦ ରହିବ। ଦ୍ୱିତୀୟ ଭୋଗମଣ୍ଡପ ଭୋଗ ନୀତି ଶେଷ ହେବା ପରେ ବନକଲାଗି ନୀତି ଆରମ୍ଭ ହେବ।

ବନକଲାଗି ହେଉଛି ମହାପ୍ରଭୁ ଶ୍ରୀଜଗନ୍ନାଥ, ବଳଭଦ୍ର ଓ ଦେବୀ ସୁଭଦ୍ରାଙ୍କର ଏକ ସ୍ୱତନ୍ତ୍ର ନୀତି। ଏହି ସମୟରେ ଦଇତାପତି ସେବକମାନେ ଶ୍ରୀଜିଉଙ୍କ ଶ୍ରୀମୁଖକୁ ପାରମ୍ପରିକ ରଙ୍ଗ ଓ ପ୍ରାକୃତିକ ଦ୍ରବ୍ୟରେ ସଜ୍ଜିତ କରିଥାନ୍ତି। ନୀତିଟି ଗୁପ୍ତ ଭାବେ ସମ୍ପନ୍ନ ହୋଇଥିବାରୁ ଏହି ସମୟରେ ଦର୍ଶନ ବନ୍ଦ ରହିଥାଏ।

ତେଣୁ ଆସନ୍ତାକାଲି ଶ୍ରୀମନ୍ଦିର ଆସିବାକୁ ଥିବା ଭକ୍ତମାନେ ଏହି ସମୟସୂଚୀକୁ ଧ୍ୟାନରେ ରଖି ନିଜର ଯାତ୍ରା ଯୋଜନା କରିବାକୁ ମନ୍ଦିର ପ୍ରଶାସନ ପକ୍ଷରୁ ଅନୁରୋଧ କରାଯାଇଛି। ଦର୍ଶନ ବନ୍ଦ ସମୟରେ ଶ୍ରୀମନ୍ଦିର ପରିସରରେ ଅନାବଶ୍ୟକ ଭିଡ଼ ନକରିବାକୁ ମଧ୍ୟ ଭକ୍ତମାନଙ୍କୁ କୁହାଯାଇଛି।