କଟକ: ପ୍ରସିଦ୍ଧ ଦୁର୍ଗା ପୂଜା ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି । ପାର୍ବଣ ପାଇଁ ହାଇକୋର୍ଟଙ୍କ ନିର୍ଦ୍ଦେଶକୁ କଡାକଡି ପାଳନ କରିବା ପାଇଁ କଟକ ଡିସିପି ସୂଚନା ଦେଇଛନ୍ତି । ହାଇକୋର୍ଟଙ୍କ ନିର୍ଦ୍ଦେଶକୁ ଅବମାନନା କଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ମିଳିଛି ।
ହାଇକୋର୍ଟଙ୍କ ନିର୍ଦ୍ଦେଶ ଅନୁସାରେ, ରାସ୍ତାର ସ୍ଥିତିକୁ ଦେଖି ତୋରଣ, ଇଲେକ୍ଟ୍ରିକ୍ ଗେଟ୍ ଓ ଶବ୍ଦ ବ୍ୟବହାର କରିବାକୁ ପୂଜା କମିଟିକୁ ପରାମର୍ଶ ଦିଆଯାଇଛି । ଇଲେକ୍ଟ୍ରିକ୍ ଗେଟ୍ ମଧ୍ୟ ଲୋକଙ୍କ ସୁରକ୍ଷାକୁ ଦେଖି କରିବାକୁ ଜିଲ୍ଲାପାଳ ନିବେଦନ କରିଛନ୍ତି । ରାତି ସାଢ଼େ ଦଶଟା ସୁଦ୍ଧା ସାଂସ୍କୃତିକ କାର୍ଯ୍ୟକ୍ରମ ବନ୍ଦ କରାଯିବ । ୬୫ ଡେଶିବଲ ରୁ ଅଧିକ ଶବ୍ଦ କରୁଥିବା ସାଉଣ୍ଡବକ୍ସ ବଜାଇ ବାକୁ ଅନୁମତି ଦିଆଯିବ ନାହିଁ । ଶବ୍ଦ ପ୍ରଦୂଷଣକୁ ନେଇ ମଧ୍ୟ ଗାଇଡ ଲାଇନ ପ୍ରସ୍ତୁତ କରାଯାଇଛି । ଏ ସମସ୍ତ ବିଷୟରେ ଆବଶ୍ୟକ ଅନୁମତି ବା ଲାଇସେନ୍ସ ନେବାକୁ ପ୍ରଶାସନ ପୂଜା କମିଟିକୁ କହିବା ସହ ସିଙ୍ଗଲ ୱିଣ୍ଡୋ ବ୍ୟବସ୍ଥାରେ ଅନୁମତି ଦେବାକୁ ବ୍ୟବସ୍ଥା କରିଛି।
ସେହିପରି ଭଷାଣି ଉତ୍ସବକୁ ଶୃଙ୍ଖଳିତ ଢଙ୍ଗରେ କରିବାକୁ ପରାମର୍ଶ ଦିଆଯାଇଛି । ରାତି ୧୨ ଟା ପର୍ଯ୍ୟନ୍ତ ବାଜା ଓ ରୋଷଣୀ କରିବାକୁ ଅନୁମତି ଦେବାକୁ ପ୍ରଶାସନକୁ ପ୍ରସ୍ତାବ ଦିଆଯାଇଛି । ଆଇନ ଗତ ଶୃଙ୍ଖଳାକୁ ଦୃଷ୍ଟିରେ ରଖି ହାଇକୋର୍ଟଙ୍କ ନିର୍ଦ୍ଦେଶକୁ ଠିକ ଭାବରେ ପାଳନ କରିବା ପାଇଁ କଟକ ଡିସିପି ସୂଚନା ଦେଇଛନ୍ତି । ଯେପରି ପାର୍ବଣ ସମୟରେ କୌଣସି ଅଘଟଣ ନ ଘଟେ ସେଥିପ୍ରତି ମଧ୍ୟ ଦୃଷ୍ଟି ଦିଆଯିବ ।