ଭୁବନେଶ୍ୱର: ସହରାଞ୍ଚଳରେ ବସବାସ କରୁଥିବା ଫ୍ଲାଟ ମାଲିକ, ଘର କିଣୁଥିବା ଲୋକ, ଭଡ଼ାଟିଆ ଏବଂ ବିଲ୍ଡରଙ୍କ ପାଇଁ ଓଡ଼ିଶା ସରକାର ଆଣିଛନ୍ତି ବଡ଼ ଆଶ୍ୱସ୍ତି। ସହରାଞ୍ଚଳ ଶାସନ ବ୍ୟବସ୍ଥାକୁ ଅଧିକ ସ୍ୱଚ୍ଛ, ସରଳ ଓ ନାଗରିକମୁଖୀ କରିବା ଲକ୍ଷ୍ୟରେ ଗୃହ ଓ ନଗର ଉନ୍ନୟନ ବିଭାଗ ଏକାଧିକ ଗୁରୁତ୍ୱପୂର୍ଣ୍ଣ ସଂସ୍କାର ଲାଗୁ କରିଛି। ଏହି ସଂସ୍କାର ମାଧ୍ୟମରେ ଆପାର୍ଟମେଣ୍ଟ ମାଲିକାନା, ରେଜିଷ୍ଟ୍ରେସନ୍, ଜମି ହସ୍ତାନ୍ତର, ଭଡ଼ା ବ୍ୟବସ୍ଥା ଏବଂ ସହର ଯୋଜନା ପ୍ରକ୍ରିୟାକୁ ସହଜ କରାଯାଇଛି।

ଓଡ଼ିଶା ଆପାର୍ଟମେଣ୍ଟ (ମାଲିକାନା ଓ ପରିଚାଳନା) ଆଇନ-୨୦୨୩କୁ କାର୍ଯ୍ୟକାରୀ କରିବା ପାଇଁ ସରକାର ବିଭିନ୍ନ ସ୍ୱତନ୍ତ୍ର ନିର୍ଦ୍ଦେଶ ଜାରି କରିଛନ୍ତି। ବିଶେଷକରି RERA ଲାଗୁ ହେବା ପୂର୍ବରୁ ନିର୍ମିତ ଆପାର୍ଟମେଣ୍ଟଗୁଡ଼ିକର ରେଜିଷ୍ଟ୍ରେସନ୍ ଓ ପୁନଃବିକ୍ରୟରେ ଥିବା ସମସ୍ୟାକୁ ସମାଧାନ କରାଯାଇଛି। ଏହା ଫଳରେ ହଜାର ହଜାର ଫ୍ଲାଟ ମାଲିକ ଓ ଘର କିଣୁଥିବା ଲୋକ ଉପକୃତ ହେବେ।

ସରକାର ଆପାର୍ଟମେଣ୍ଟ ରେଜିଷ୍ଟ୍ରେସନ୍ ପାଇଁ ଏକ ନୂତନ SOP ମଧ୍ୟ ଜାରି କରିଛନ୍ତି। ଏହା ଦ୍ୱାରା ରେଜିଷ୍ଟ୍ରେସନ୍ ପ୍ରକ୍ରିୟା ଅଧିକ ସ୍ୱଚ୍ଛ ଓ ଡିଜିଟାଲ ହେବ। SUJOG ପ୍ଲାଟଫର୍ମ ସହ ସଂଯୋଗ ହେବା ଫଳରେ ସେବା ପ୍ରଦାନ ଆହୁରି ସହଜ ହେବ।

ଏହା ସହ ରାଜ୍ୟରେ ଏକ ନୂଆ ଭଡ଼ା ଆଇନ ଆଣିବା ପାଇଁ ମଧ୍ୟ ପଦକ୍ଷେପ ନିଆଯାଇଛି। ପ୍ରସ୍ତାବିତ ‘ଓଡ଼ିଶା ସହରାଞ୍ଚଳ ଭଡ଼ା ନିୟନ୍ତ୍ରଣ ଆଇନ-୨୦୨୬’ ଭଡ଼ାଟିଆ ଓ ଘରମାଲିକଙ୍କ ମଧ୍ୟରେ ସମ୍ପର୍କକୁ ସ୍ୱଚ୍ଛ ଓ ସନ୍ତୁଳିତ କରିବାରେ ସହାୟକ ହେବ।

ଜମି ବିଭାଜନ ଓ ପ୍ଲଟ ବିକ୍ରୟ ନିୟମରେ ମଧ୍ୟ ବଡ଼ ପରିବର୍ତ୍ତନ ଆଣାଯାଇଛି। ପରିବାର ମଧ୍ୟରେ ଜମି ବଣ୍ଟନ, ଛୋଟ ପ୍ଲଟର ବିଭାଜନ ଓ ଉତ୍ତରାଧିକାର ସମ୍ପର୍କିତ ପ୍ରକ୍ରିୟାକୁ ସରଳ କରାଯାଇଛି। ଏହା ଫଳରେ ସାଧାରଣ ଲୋକଙ୍କୁ ବିଭିନ୍ନ ଅନୁମତି ଓ ଜଟିଳ ପ୍ରକ୍ରିୟାରୁ ମୁକ୍ତି ମିଳିବ।

ଗୃହ ଓ ନଗର ଉନ୍ନୟନ ମନ୍ତ୍ରୀ ଡଃ କୃଷ୍ଣଚନ୍ଦ୍ର ମହାପାତ୍ର କହିଛନ୍ତି, ଏହି ସଂସ୍କାରଗୁଡ଼ିକ ନାଗରିକଙ୍କ ଦୀର୍ଘଦିନର ସମସ୍ୟାର ସମାଧାନ କରିବା ସହ ସହରାଞ୍ଚଳ ଶାସନ ବ୍ୟବସ୍ଥାକୁ ଅଧିକ ସ୍ୱଚ୍ଛ, ଦାୟିତ୍ୱବାନ ଓ ଜନସାଧାରଣଙ୍କ ପାଇଁ ଉପଯୋଗୀ କରିବ।

ସରକାରଙ୍କ ଏହି ପଦକ୍ଷେପ ସହରାଞ୍ଚଳରେ ରହୁଥିବା ଲକ୍ଷାଧିକ ଲୋକଙ୍କ ଜୀବନକୁ ସହଜ କରିବା ସହ ଭବିଷ୍ୟତରେ ଯୋଜନାବଦ୍ଧ ଓ ସ୍ଥାୟୀ ସହର ବିକାଶ ପାଇଁ ନୂଆ ଦିଗ ଦେଖାଇବ।