ଭଟିଣ୍ଡା: ପଞ୍ଜାବର ଭାଟିଣ୍ଡାରେ ଏକ ଯାତ୍ରୀବାହୀ ବସ୍ ଦୁର୍ଘଟଣା ଗ୍ରସ୍ତ ହୋଇଛି । ଏକ ପୋଲ୍ ତଳକୁ ବସଟି ଖସି ପଡ଼ିବାରୁ ୮ ଜଣଙ୍କର ମୃତ୍ୟୁ ହୋଇଛି । ଭଟିଣ୍ଡାର ଜୀବନ ସିଂହ ଗ୍ରାମ ନିକଟରେ ଏହି ଦୁର୍ଘଟଣା ହୋଇଛି । ୧୫ରୁ ଉର୍ଦ୍ଧ୍ୱ ଯାତ୍ରୀ ଆହତ ହୋଇଥିବା ସୂଚନା ମିଳିଛି । 

ବସରେ ପ୍ରାୟ ୩୦ ଜଣ ଯାତ୍ରୀ ଯାତ୍ରା କରୁଥିଲା ବେଳେ ଏକ ନାଳକୁ ଖସି ପଡ଼ିଥିଲା ବୋଲି ଜଣାପଡ଼ିଛି । ତୁରନ୍ତ ସ୍ଥାନୀୟ ଲୋକେ ପୋଲିସକୁ ଖବର ଦେଇଥିଲେ । ଏନଡିଆରଏଫ୍ ଟିମ୍ ମଧ୍ୟ ତୁରନ୍ତ ଦୁର୍ଘଟଣା ସ୍ଥଳରେ ପହଁଚି ଉଦ୍ଧାର କାର୍ଯ୍ୟ ଆରମ୍ଭ କରିଛି । ଖବର ଲେଖା ହେବା ବେଳକୁ ୮ ଜଣଙ୍କର ଜୀବନ ହାନି ହୋଇଥିବା ଜଣାପଡ଼ିଛି । ତେବେ ଦୁର୍ଘଟଣାର ସ୍ଥିତିକୁ ଦେଖିଲେ ମୃତକଙ୍କ ସଂଖ୍ୟାର ବଢ଼ିବାର ଆଶଙ୍କା କରାଯାଉଛି ।